Ke ka Baka La’ng Batswadi Ba-ka ba sa Mmpote?
Bafsa ba a Botšiša
Ke ka Baka La’ng Batswadi Ba-ka ba sa Mmpote?
“Ke duma eka batswadi ba-ka ba ka ntumelela go sepela ka ntle le gore ba mpee leihlo. Ga se gore ke nyaka go ralala le lefase. Ka mohlala, ke be nka rata go etela rakgadi ka ntle le gore mma a tshwenyege ka gore ke nagana ka go tloga gae.”—Sarah, 18. *
“Ka mehla ke botšiša batswadi ba-ka gore ke ka baka la eng ba sa mpote ge ke nyaka go sepela le bagwera ba-ka. Gantši ba mpotša gore: ‘Re a go bota. Re fo ba re sa bote bagwera ba gago.’ Ke tshwenyega kudu ge ba bolela seo!”—Christine, 18.
GO BOTWA go swana kudu le tšhelete. Go thata go e hwetša eupša go e loba go bonolo, le gona go sa šetšwe gore o filwe e kaakang, ga e ke e bonagala e lekane. Iliana yo a nago le nywaga e 16 o re: “Neng goba neng ge ke nyaka go intšha, batswadi ba-ka ba mphara ka dipotšišo tša mabapi le moo ke yago gona, batho bao ke tlago go sepela le bona, seo ke tla bego ke se dira le gore ke tla boa neng. Ke a tseba gore ke batswadi ba-ka, eupša ge ba mpotšiša ka tsela yeo ke a tenega!”
Na ka dinako tše dingwe o ikwa eka batswadi ba gago ga ba go bote gakaalo? Ge e ba go le bjalo, o ka dira’ng ka seo? Sa pele, anke re boneng gore ke ka baka la eng go bota e le taba e boima magareng ga batswadi bantši le bafsa.
Bohloko bjo bo Golago
Beibele e a dumela gore “monna ó tlo tloxêla tata’xwê le mma’xwê.” (Genesi 2:24) Ke therešo gore go ka bolelwa se se swanago le ka mosadi. Go sa šetšwe gore o mošemane goba ngwanenyana, morero wa bohlokwa wa nywaga ya mahlalagadi ke go go lokišeletša go ba motho yo mogolo—nako yeo ka yona o tla bego o hlametšwe go tloga gae gomme mohlomongwe le go thoma lapa la gago ka noši.
Lega go le bjalo, go fetogela bogolong ga go swane le mojako woo o tsenago ka wona gabonolo ge o fihla nywageng e itšego. Go swana le manamelo ao o a namelago, kgato ka kgato, nywageng ya gago ka moka ya mahlalagadi. Ke therešo gore wena le batswadi ba gago le ka ba le dikgopolo tše di thulanago mabapi le bokgole bjoo o šetšego o le go bjona manamelong. Maria, yo a naganago gore ga a botwe ge go tliwa tabeng ya go kgetha bagwera o re: “Ke na le nywaga e 20 gomme se e sa dutše e le bothata. Batswadi ba-ka ba nagana gore nka se be le matla a go tloga maemong a mabe. Ke ile ka leka go ba hlalosetša gore ke šetše ke ile ka tloga maemong a mabe eupša seo go bona ga se a lekana!”
Go etša ge seo se boletšwego ke Maria se bontšha, taba ya go bota e ka ba mothopo wa go se kwane mo gogolo magareng ga bafsa le batswadi. Na se ke sa therešo ka lapeng leno? Ge e ba go le bjalo, o ka dira’ng e le gore batswadi ba gago ba go bote ka mo go oketšegilego? Le gona, ge e ba ba se
sa go bota ka gobane o ile wa dira tiro ya bošilo, o ka dira’ng go lokiša tshenyo yeo o e dirilego?Itlhatsele o le yo a Botegago
Moapostola Paulo o ngwaletše Bakriste ba lekgolong la pele la nywaga gore: “Dulang le itlhatsela seo lena ka noši le lego sona.” (2 Bakorinthe 13:5) Ke therešo gore o be a sa bolele le bafsa bao ba lego mahlalagading ka go lebanya. Lega go le bjalo, molao wo wa motheo o a šoma le go bona. Tekanyo yeo o botwago ka yona gantši e sepedišana le tekanyo yeo o itlhatselago o botega ka yona. Ga se gore o swanetše go ba yo a phethagetšego. Go ba gona, motho yo mongwe le yo mongwe o dira diphošo. (Mmoledi 7:20) Lega go le bjalo, ka godimo ga moo, na tsela yeo o itshwarago ka yona e nea batswadi ba gago lebaka la gore ba se go bote?
Ka mohlala, Paulo o ngwadile gore: “Re rata go itshwara ka go botega dilong tšohle.” (Baheberu 13:18) Ipotšiše gore: ‘Ke itlhatsetše ke botega gakaaka’ng ge ke botša batswadi ba-ka moo ke yago gona le seo ke tla bego ke se dira?’ Ela hloko seo se bolelwago ke bafsa ba mmalwa bao ba ilego ba swanelwa ke go itlhahloba tabeng ye.
Lori: “Ke be ke romela melaetša ka sephiring ka e-mail go mošemane yo a itšego yo ke bego ke mo kgahlegela. Batswadi ba-ka ba ile ba tseba ka seo gomme ba mpotša gore ke kgaotše go dira bjalo. Ke ile ka ba holofetša gore ke tla kgaotša eupša ka se dire bjalo. Se se ile sa tšwela pele se direga ka lebaka la ngwaga. Ke be ke mo romela melaetša, batswadi ba-ka ba tsebe ka seo, ke kgopele tshwarelo gomme ke holofetše go kgaotša, eupša ke dire seo gape. Ke ile ka fihla bokgoleng bja gore batswadi ba-ka ba se sa hlwa ba mpota selong le ge e le sefe!”
O nagana gore ke ka baka la’ng batswadi ba Lori ba ile ba kgaotša go mmota, le gona Lori a ka ba a ile a itshwara bjang ka tsela yeo e bontšhago go ikarabela ka morago ga gore batswadi ba gagwe ba boledišane le yena la mathomo ka bothata? Ngwala karabo ya gago ka mo tlase.
․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․
․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․
․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․
Beverly: “Batswadi ba-ka ba be ba sa bote gore nka itshwara gabotse ge ke le gare ga bašemane, eupša ga bjale ke kwešiša lebaka. Ke be ke bapala ka lerato le bašemane ba mmalwa bao ba bego ba mpheta ka nywaga e mebedi. Le gona, ke be ke fetša diiri tše dintši ke boledišana le bona ka mogala gomme ge re le dipokanong ke be ke tla boledišana le bona feela. Batswadi ba-ka ba ile ba nkamoga mogala mo e ka bago kgwedi gomme ba be ba gana ke e-ya mafelong ao bašemane bao ba bego ba e-ba go ona.”
O nagana gore ke ka baka la’ng batswadi ba Beverly ba ile ba se sa mmota ka nakwana, le gona a ka ba a ile a dira’ng e le gore ba mmote gape?
․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․
․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․
․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․
Annette: “Ge ke be ke le sekolong sa magareng, nna le mogwera wa-ka re ile ra ya le bjala gae re e-tšwa pokanong—gaešita le ge re be re tseba gore batswadi ba rena ba ka se dumelele seo—gomme ra kgetha go bo nwa ka morago bakeng sa go fo ithabiša. Bjala bja mogwera wa-ka bo ile bja hwetšwa ke mmagwe. Go ile gwa hwetšagala gore le nna ke na le bjona. Se sebe le go feta ke go nyama ga mma mo go bego go bonagala sefahlegong sa gagwe!”
Ge e ba Annette e be e le ngwaneno, ke keletšo efe yeo o bego o tla mo nea yona e le gore a ka boela a botwa ke mmago gape?
․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․
․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․
․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․
Go Botwa Gape
Go thwe’ng ge e ba ditiro tša gago di dirile gore batswadi ba gago ba se sa go bota, go swana le bafsa bao ba tsopotšwego ka mo godimo? Gaešita le ge
go le bjalo, kgonthišega gore o ka dira gore ba go bote gape. Eupša bjang?Go ka direga gore batswadi ba gago ba tla go bota ka mo go oketšegilego ge o dutše o bontšha boitshwaro bjo bo bontšhago go ba yo a ikarabelago. Ka mohlala: Akanya ka monna yo a kolotago panka tšhelete. Ge e ba a lefa ka mehla, panka e tla mmota e bile e ka ba ya mo adima tšhelete gape nakong e tlago. Go bjalo le ka gae. Ge e ba o itlhatsela o le yo a botegago—gaešita le dilong tše dinyenyane—go molaleng gore batswadi ba gago ba tla go bota ka mo go oketšegilego nakong e tlago.
Mafelelong Annette o ile a kwešiša ntlha yeo. O re: “Ge o sa le yo monyenyane, ga o kgone go lemoga bohlokwa bja go botwa. Ga bjale ke ikwa ke le yo a ikarabelago ka mo go oketšegilego e bile ke ikwa ke tutueletšega go dira dilo ka tsela yeo e tlago go nthuša gore batswadi ba-ka ba boele ba mpote gape.” Re ithuta’ng go se? Go e na le go ngongorega ka gore batswadi ba gago ga ba go bote, lebiša tlhokomelo tabeng ya go tsebja ka boitshwaro bjo bo bontšhago gore o a botega.
Ka mohlala, na o a botega dikarolong tše di lokeleditšwego ka mo tlase? Swaya lepokisi leo le lego kgaufsi le mekgwa le ge e le efe yeo o swanetšego go kaonefatša go yona.
□ Go boa gae ka nako e beilwego
□ Go boloka nako
□ Go phetha mediro ya ka gae
□ Go hlwekiša phapoši ya-ka ya go robala
□ Go diriša mogala
□ Go phetha dikholofetšo tša-ka
□ Go diriša tšhelete ka bohlale
□ Go tsoga ka nako ka ntle le go letela gore batswadi ba ntsoše
□ Go bolela therešo
□ Go amogela diphošo le go kgopela tshwarelo
□ Le e mengwe ․․․․․․․․․․․․․․․․․․․․․․․․․․․․․․․․․․․․․․․․․․․․․
Ke ka baka la’ng o sa dire boikemišetšo bja go itlhatsela o le yo a botegago dikarolong tšeo o di swailego? Latela kgothatšo yeo e hwetšagalago ka Beibeleng e rego: ‘Lahla motho wa kgale yo a dumelelanago le tsela ya gago ya pele ya boitshwaro le yo a senywago go ya ka dikganyogo tša gagwe tše forago.’ (Baefeso 4:22) “Ee ya lena a e be Ee.” (Jakobo 5:12) “Bolelang therešo yo mongwe le yo mongwe wa lena le moagišani wa gagwe.” (Baefeso 4:25) ‘E-kwa batswadi ba gago dilong tšohle.’ (Bakolose 3:20) Ge nako e dutše e e-ya, tšwelopele ya gago e tla bonagala go ba bangwe, go akaretša le batswadi ba gago.—1 Timotheo 4:15.
Eupša go thwe’ng ge e ba o nagana gore go sa šetšwe maiteko a gago a magolo, batswadi ba gago ga ba go bote? Ke ka baka la’ng o sa leke go boledišane le bona ka seo? Go e na le go ngongorega ka gore ba swanetše go go bota ka mo go oketšegilego, ba botšiše ka tlhompho gore ke eng seo ba naganago gore o swanetše go se dira gore ba go bote. Hlalosa dipakane tša gago ka mo go kwagalago tabeng ye.
O se ke wa letela gore batswadi ba gago ba fetoše dithibelo tša bona ka pela. Ka ntle le pelaelo ba tla nyaka go kgodišega gore o tla dira ka go dumelelana le dikholofetšo tša gago. Diriša nako ye bakeng sa go itlhatsela o le yo a botegago. Ge nako e dutše e e-ya, mo gongwe batswadi ba gago ba ka go bota ka mo go oketšegilego. Se ke se se diragaletšego Beverly yo a tsopotšwego pejana. O re: “Go thata kudu go dira gore batho ba bangwe ba go bote eupša go bonolo kudu go dira gore ba se sa go bota. Ga bjale batswadi ba-ka ba a mpota gomme seo se a nthabiša!”
Dihlogo tše di oketšegilego go tšwa lelokelelong la dihlogo tša “Bafsa ba a Botšiša” di ka hwetšwa mokerong wa Inthanete wa www.watchtower.org/ype
SEO GO KA NAGANWAGO KA SONA
▪ Ke ka baka la’ng batswadi ba gago ba ka dika-dika go go bota ka mo go oketšegilego gaešita le ge o katanela go itlhatsela o le yo a botegago?
▪ Ke ka baka la’ng e le gabohlokwa gore o boledišane le batswadi ba gago ge e ba o nyaka go botwa ka mo go oketšegilego?
[Mongwalo wa tlase]
^ ser. 3 Maina sehlogong se a fetotšwe.
[Ntlhakgolo go letlakala 30]
Lebiša tlhokomelo tabeng ya go tsebja ka boitshwaro bjo bo bontšhago gore o a botega
[Diagram/Picture on page 29]
Go fetogela go beng motho yo mogolo yo a botegago go swana le manamelo ao o a namelago, kgato ka kgato, nywageng ya gago ka moka ya mahlalagadi
[Seswantšho]
(Bakeng sa mongwalo o beakantšwego ka mokgwa wa kgatišo, bona kgatišo ka boyona)
GO BA MOTHO YO MOGOLO
MAHLALAGADI
BJANA