Manyalo a Mathateng

“Ga ke sa kgona go kgotlelela le gatee!” Na o kile wa kwa batho ba bolela bjalo ka manyalo a bona? Ge e ba o le lenyalong, na ka nako e nngwe o ile wa ikwa ka tsela e swanago?

BANYALANI ba dikete ba thomile bophelo bja lenyalo ka morago ga go hlagolela lerato—goba ba nyalane ka pela ka baka la kganyogo e matla ya dikopano tša botona le botshadi—gomme ba be ba letetše gore ba tla thaba ka morago ga moo. Moeletši yo mongwe wa tša manyalo o itše: “Eupša ge ba be ba e-tla go mpona, bontši bja bona ba be ba se sa hlwa ba e-na le kholofelo ya gore ba tla thaba. Ba be ba nyamišitšwe ke balekane ba bona, lenyalo, lerato gomme ka dinako tše dingwe ba nyamišitšwe le ke bophelo bja bona.” Lebaka le nnoši leo le dirago gore banyalani bao ba be le tswalano ke gore ba na le lengwalo la bohlatse la lenyalo le gore ba dula gotee.

Manyalo a mangwe a thubega ka lebaka la go oketšega ga kgateletšego le dipelaelo. Mešomo e bakago kgateletšego, go šoma thapama goba bošego le go šoma diiri tše dintši go ka dira gore gaešita le banyalani bao ba ratanago ba se be le matla a go fetša nako ba le gotee. Lerato le tlhompho le tšona di ka fedišwa ganyenyane-ganyenyane ke mathata a tša ditšhelete, ditlhohlo tša go godiša bana, go hudugela ntlong e mpsha, go fetoša mošomo le mathata a tša maphelo. Ge e le gabotse, diphetogo tšeo di tlišwago ke go feta ga nako di ka baka kgateletšego yeo e ka aroganyago banyalani.

Bo-mma ba bantši ba šoma mešomo e mebedi ya nako e tletšego—mošomo wa boiphedišo le wa ka gae. Se se ka dira gore ba hlokomologe dilo ka moka ntle le mošomo wa bona wa boiphedišo le go hlokomela bana. Kgateletšego le go lapa kudu di ka dira gore banyalani ba se be le nako yeo ba ka e fetšago ba le gotee. Ka baka leo, ba bantši ba ikwa eka ga ba kgone go laola maphelo a bona gomme seo se a ba ferekanya le go dira gore ba nyake go ba noši. Ke ka baka la’ng manyalo a mantši a le ka tlase ga kgateletšego e ntši gakaakaa? O ka dira’ng gore o be le lenyalo leo le thabilego le leo atlegilego?