NAGENG e nngwe kua Asia, lešaba la batho le keteka moletlo wa go hlompha meoya. Moletlo o fihla tlhorong ge basadi ba babedi ba kgethwa gore ba tsenwe ke meoya. Mahlo a bona a a fetoga gomme ba thoma go thothomela bjalo ka ge e ka ba tšhungwa ka mohlagase.

Kua Puerto Rico, motho yo a boledišanago le meoya o leka go boledišana le motemona yo a bitšwago Changó, e lego modimo wa modumo wa legadima. Motho yo a boledišanago le meoya o hlalosa seo a se bonago gomme bohle bao ba lego ka phapošing yeo ba thoma go thothomela bjalo ka ge eka ba na le batemona.

Dinageng tše dintši go tlwaelegile gore batho ba dirišane le meoya. Go dumela matleng a phagametšego a tlhago go atile gomme batho ba gogelwa tumelong ye. Dipuku, dipapadi, mananeo a thelebišene le difilimi di bontšha batemona le boloi gomme ditiragalo tša matla a phagametšego a tlhago di tletše go feta le ge e le neng pele.

Lega go le bjalo, Beibele e ruta gore go tšea karolo dilong tšeo di sepedišanago le matla a phagametšego a tlhago goba maleatlana ge e le gabotse ke go dirišana le meoya. Go dirišana le meoya ga se go itloša bodutu mo go sego kotsi. Ga se feela go nyakišiša dilo tše sa tsebjego. Ke go ikgokaganya le batemona, e lego barongwa ba kgopo bao ba rabetšego kgahlanong le Modimo.—Kutollo 12:9, 12.

Ge e le gabotse, go dirišana le meoya go thuša batemona go etša ge melaba e thuša barei ba dihlapi. Barei ba dihlapi ba diriša melaba e fapa-fapanego go swara mehuta e fapa-fapanego ya dihlapi. Ka mo go swanago, batemona ba diriša mekgwa e sa swanego ya go dirišana le meoya e le gore ba laole batho ba fapa-fapanego. Moetapele wa batemona o hlaloswa e le “modimo wa tshepedišo ye [e kgopo] ya dilo.” O foufatša ka katlego menagano ya bao ba sa dumelego therešo ya Lentšu la Modimo le morero wa gagwe.—2 Bakorinthe 4:4.

Pakane ya batemona ke ye: Ba nyaka go re aroša e le gore re se ke ra ba le tswalano ya kgaufsi le Mmopi wa rena. Ba tutueletša batho go se kwe melao ya Modimo e lokilego, go sa šetšwe gore ba a tseba goba ga ba tsebe. Ka gona, go dirišana le meoya go lebiša go se amogelweng ke Modimo, go hlokeng kholofelo gomme mafelelong go lebiša phedišong.—Kutollo 21:8.

 Luis yo a tšwago Puerto Rico o re: “Go tloga ke sa le yo monyenyane, lapa lešo le be le dirišana le meoya. E be e le karolo ya bodumedi bja rena le bophelo bja lapa. Ke be ke nagana gore go kgona ga-ka go bolela bokamoso e sa le pele le go bala dikarata tšeo di dirišetšwago go botša batho seo se tlago go ba diragalela nakong e tlago ke dilo tša tlhago. Gantši ke be ke kgona go kgetha dinomoro tša lothari gomme ke thuša batho gore ba thope tšhelete. Bokgoni bjo bjoo bo bego bo bonala e le mpho ge e le gabotse bo be bo ntšhitiša go hwetša tsebo ya Beibele le go ba le tswalano le Modimo.”—Johane 17:3.

Ba bantši ba nagana gore go dirišana le meoya ga go kotsi e bile go a hola. Ba ka bolela gore dipoko di na le bogwera goba ba bolela gore go dirišana le meoya go ka dira gore motho a be le tsebo e oketšegilego, gwa mo tlišetša mahumo goba lethabo. Ao ke maaka a matala. Luis o re: “Ka mehla go dula go e-na le selo se sa kgahlišego seo o swanetšego go se dira e le gore o holege.”

Lesogana leo le bitšwago Chad le ile la thoma go bona dipono tše tšhošago le go tlaišwa ka go tsošwa nako le nako ge le robetše. Le re: “Batemona ba ile ba thoma go ntlaiša bošegong bjo bong le bjo bongwe.” Re ka itšhireletša bjang kgahlanong le tlaišo e bjalo?

E le gore re itšhireletše, re swanetše go phema dilo ka moka tšeo di sepedišanago le go dirišana le meoya. (Bagalatia 5:19-21) Ka gona, Jehofa Modimo o laela bahlanka ba gagwe go phema mekgwa e latelago: “Xo wêna xo se kê xwa hwetšwa e a . . . diraxo tša bonoxê le tša maphalô, le e a upaxo ka meupô le boloi. Xo se kê xwa hwetšwa wa malôpô, le e a botšišaxo badimo, le xe e le sedupê, le e a nyakaxo selô bahung. Ka xobane ba ba diraxo tše byalo, Morêna ó bôna e le makxapa.”—Doiteronomio 18:10-12.

Ka go dumelelana le mantšu ao, ba bantši ba gatile megato ya go itšhireletša ka go lahla dipuku le ge e le dife goba dilo le ge e le dife tšeo di sepedišanago le meoya. Ken, yo a lokologilego go dirišaneng le meoya o re: “Ke ile ka fetlekolla dithoto tša-ka gomme ka senya dilo ka moka tšeo ke bego ke nagana gore ke tše mpe.”—Bona Ditiro 19:19, 20.

Tšhireletšo e kgolo ke go ba le tswalano ya kgaufsi le Modimo wa therešo, Jehofa. Ela hloko seo re swanetšego go se dira bjalo ka ge se hlalositšwe go Jakobo 4:7, 8: “Ka gona, ikokobeletšeng Modimo; eupša le ganetše Diabolo, o tla le tšhaba. Batamelang Modimo, gomme o tla le batamela. Hlwekišang diatla tša lena, lena badiradibe, le sekiše dipelo tša lena, lena ba pelo-pedi.”

Jehofa Modimo o ruta bao ba batamelago kgaufsi le yena le go ba šireletša. Ba ‘tseba maano a Sathane’ gomme ga ba forwe ke diponagalo tša gagwe tša boradia. (2 Bakorinthe 2:11; 11:14) Le gona, Jehofa ke yo Matla-ohle. Ge a bitšwa ka tumelo, Jehofa o tla hlakodiša batho go tlaišweng ke batemona. Chad, yo go boletšwego ka yena pejana, o re: “Go tseba mothopo wa ditlhaselo tša-ka le go kgopela Jehofa gore a ntšhireletše tutuetšong ya batemona go ile gwa dira gore ditlhaselo tšeo di kgaotše.”—Psalme 91:1, 2.

Go molaleng gore ba nago le dipelo tše dibotse ba ka thabela tšhireletšo ya Modimo gona bjale gotee le go lemoga gore kgaufsinyane batemona le bohle bao ba ineelago tutuetšong ya bona ba tla fedišwa. Akanya feela ka lethabo le khutšo tšeo di tlago go ba gona lefaseng ge batho ba lokolotšwe ditla-moragong tša go dirišana le meoya!—Jesaya 11:9; Kutollo 22:15.