Dinotlelo tše Tshela tše di Dirago Gore Motho a Atlege

KATLEGO ya kgonthe ke go fihlelela tsela e phalago tšohle bophelong, tsela yeo e tlišwago ke go diriša ditekanyetšo tša Modimo le yeo e dumelelanago le morero wa gagwe bakeng sa rena. Beibele e re motho yo a phelago bophelo bjo bjalo o tla “swana le sehlare-se-šingwa-nokeng ya meetse, sa xo enywa dienywa lebaka la xôna, sa xo se pône matlakala; ’me tšohle tše a di diraxo di a lêtlêxa.” (Mongwalo o sekamego ke wa rena.)—Psalme 1:3.

Ee, gaešita le ge re sa phethagala gomme re dira diphošo, maphelo a rena ka moka a ka atlega kudu! Na o kgahlwa ke tebelelo yeo? Ge e ba go le bjalo, melao ya motheo ya Beibele ye e latelago e ka go thuša go fihlelela pakane yeo gomme ka go rialo ya go nea bohlatse bjo bo kwagalago bja gore ruri dithuto tše di lego ka Beibeleng ke bohlale bjo bo tšwago go Modimo.—Jakobo 3:17.

1 Boloka Tšhelete e le mo e Swanetšego go ba Gona

“Lerato la tšhelete ke modu wa mehuta ka moka ya dilo tše di gobatšago, gomme ka go phegelela lerato le, ba bangwe ba . . . itlhabile gohle ka mahloko a mantši.” (1 Timotheo 6:10) Ela hloko gore tšhelete ka boyona ga se bothata—ka ge ka moka re e hloka bakeng sa go itlhokomela le go hlokomela malapa a rena—eupša bothata ke lerato la tšhelete. Ge e le gabotse, lerato leo le dira gore tšhelete e be mong wa motho, goba modimo wa gagwe.

Go etša ge re bone dihlogong tša mathomo tša lelokelelo le la dihlogo, batho bao ka mafolofolo ba fagahlelago mahumo e le senotlelo sa katlego ge e le gabotse ba phegelela toro feela. Ka ntle le gore ba no ipiletša manyami, ba ipakela mahloko a mantši. Ka mohlala, gaešita le ge ba phegelela lehumo ka mafolofolo, gantši batho ba bea kotsing ditswalano tša bona le malapa a bona gotee le bagwera. Ba bangwe ga ba robale ka mo go lekanego—ge e se ka baka la mošomo, e ba ka baka la dipelaelo goba go tshwenyega. Mmoledi 5:11 (PK) e re: “Boroko bja modiri ke bjo bobose, le ge a e-ja ka gonyenyane goba ka kudu; eupša go hora ga mohumi go mo hlokiša boroko.”

Tšhelete ga se feela mong yo šoro eupša gape ke yo a forago. Jesu Kriste o boletše ka “matla a forago a mahumo.” (Mareka 4:19) Ka mantšu a mangwe, mahumo a holofetša lethabo eupša ga a le tliše. A fo ba a dira gore motho a nyake mo go oketšegilego. Mmoledi 5:9 (PK) e re: “Yo a ratago ditšhelete ga a hore tšona.”

Ka boripana, lerato la tšhelete le baka mathata gomme mafelelong le lebiša manyaming, pherekanong goba gaešita le bosenying. (Diema 28:20) Dilo tše di tswalanago kudu le lethabo le katlego ke go nea ka seatla se se bulegilego, moya wa go lebalela, go hlweka boitshwarong le go ba le boemo bjo bobotse bja moya.

2 Hlagolela Moya wa go Nea

“Go na le lethabo le legolo go neeng go feta go amogeleng.” (Ditiro 20:35) Gaešita le ge go nea ka dinako tše dingwe go ka dira gore motho a thabe ka dinako tše itšego, boemo bja go ba le seatla se se bulegilego bo ka dira gore motho a dule a thabile. Go ba gona, go ba le seatla se se bulegilego go ka bonagatšwa ka ditsela tše dintši. E nngwe ya ditsela tše di phalago tšohle, yeo gantši e lebogwago kudu, ke boikgafo.

Ka morago ga go hlahloba dinyakišišo tše mmalwa mabapi le go se be le boithati, lethabo le bophelo bjo bobotse bja mmele, monyakišiši e lego Stephen G. Post o phethile ka gore go se be le boithati le go thuša ba bangwe go tswalana le go phela ka nako e telele, go ikwa ga motho a iketlile le bophelo bja mmele le bja monagano bjo bokaone, go akaretša le go fokotšega ga kgateletšego.

Go feta moo, bao ba neago ka seatla se se bulegilego go ya kamoo ba kgonago ka gona ga ba ikwe ba lahlegetšwe. Diema 11:25 e re: “Xo nôna mo-setša-wa-xabô;  moxêla-bang’ le yêna ó tlo xêlwa.” Ka go dumelelana le mantšu ao, batho bao ba tlogago ba e-na le seatla se se bulegilego go tšwa pelong—bao ba neago ba sa letela gore ba bušetšwe seo ba se neilego—ba a lebogwa le go ratwa, kudu-kudu ke Modimo.—Baheberu 13:16.

3 Lebalela ka Bolokologi

“Tšwelang pele . . . le lebalelana ka bolokologi ge e ba motho a e-na le lebaka la go ba le pelaelo ka yo mongwe. Go etša ge Jehofa a le lebaletše ka bolokologi, le lena le dire bjalo.” (Bakolose 3:13) Lehono, gantši tebalelo e phaelwa ka thoko; batho ba kgetha go itefeletša go e na le go gaugela. Ka mafelelo afe? Thogako e gakatša thogako gomme bošoro bo baka bošoro.

Tshenyo e ka no se felele moo. Pego yeo e lego ka go The Gazette ya Montreal, kua Canada e re ge banyakišiši “ba be ba nyakišiša bathong ba fetago 4 600 ba nywaga e 18 go ya go 30 ba hweditše [gore] ge ba tšwela pele ba e-ba le semelo sa go ba le lehloyo, go ferekana le go se be botho” ke mo ba bago le maswafo ao a sa šomego gabotse. Ge e le gabotse, a mangwe a mafelelo a gobatšago a be a feta le a motho yo a kgogago! Ka kgonthe, boemo bja kgopolo bja go ba yo a lebalelago ga se feela makhura a mabotse a bogwera eupša gape le sehlare se sebotse!

O ka kgona bjang go ba yo a lebalelago kudu? Thoma ka go itlhahloba ka potego. Na ga o kgopiše ba bangwe ka dinako tše dingwe? Le gona na ga o leboge gore ba a go lebalela? Ka gona ke ka baka la’ng o sa lebalele ba bangwe ka bolokologi? (Mateo 18:21-35) Go bile go bohlokwa tabeng ye go hlagolela boitshwaro. “Bala go fihla go lesome” goba ka tsela e itšego o iphe nako ya go okobala. Ke moka o lebelele boitshwaro e le matla. Diema 16:32 (PK) e re: “Motho wa pelo e telele o fetiša le mogale.” “O fetiša le mogale”—seo se bontšha katlego, na ga go bjalo?

4 Dumelelana le Ditekanyetšo tša Modimo

“Ditayô tša Morêna di sekile, di boniša mahlô.” (Psalme 19:8) Ge re e bea ka tsela e bonolo, ditekanyetšo tša Modimo di hola rena—mmeleng, monaganong le maikwelong. Tše dingwe tša dilo tšeo di re šireletšago go tšona ke mekgwa e gobatšago e bjalo ka go dirišwa gampe ga dihlare-tagi, botagwa, boitshwaro bjo bo gobogilego bja tša botona le botshadi le go bogela diswantšho tše di kgothaletšago bootswa. (2 Bakorinthe 7:1; Bakolose 3:5) Mafelelo a gobatšago a dilo tše a ka tla ka mokgwa  wa bosenyi, bodiidi, go se botwe, go thubega ga malapa, mathata a monagano le a maikwelo, bolwetši le go hwa go sa letelwa.

Se se kgahlišago ke gore bao ba dirago dilo ka go dumelelana le ditekanyetšo tša Modimo ba hlagolela ditswalano tše di šireletšegilego, gotee le boitlhompho le khutšo ya monagano. Go Jesaya 48:17, 18, Modimo o re “ke Xo ruta tše di Xo holaxo; ke Xo sepediša mo tseleng ye O swanetšexo xo e swara.” Gomme o oketša ka gore: “Mola O ka be O theeditše xe ke Xo laêla, moláô wa xaxo o ka be o swana le noka, xo loka xa xaxo xo ka be xo etša maphoto a lewatlê.” Ee, Mmopi wa rena o nyaka gore dilo di re sepelele gabotse. O nyaka go re “sepediša mo tseleng” ya katlego ya kgonthe.

5 Bontšha Lerato le le se Nago Boithati

“Lerato le a aga.” (1 Bakorinthe 8:1) Na o ka nagana ka bophelo bjo bo se nago lerato? Bjo e tla ba bophelo bjo bo se nago mohola le bjo bo sa thabišego gakaakang! Moapostola wa Mokriste Paulo o be a buduletšwe go ngwala gore: “Ge e ba ke . . . se na lerato [bakeng sa ba bangwe], gona ga ke selo. . . . Ga ke boelwe ke selo.”—1 Bakorinthe 13:2, 3.

Mohuta wa lerato leo go boletšwego ka lona mo ga se wo o sepedišanago le dikopano tša botona le botshadi, leo le lona le nago le maemo a lona. Go e na le moo, ke lerato le le humilego le le le swarelelago kudu leo le laolwago ke melao ya motheo ya Modimo. * (Mateo 22:37-39) Go feta moo, ga se leo le sa rego selo ge le bontšhwa wena, eupša le bonala kudu ge le bontšhwa ba bangwe. Paulo o tšwetše pele ka go bolela gore gape lerato le ga le fele pelo e bile le botho. Ga le na lehufa e bile ga le ikgantšhe. Ka go hloka boithati le nyaka gore ba bangwe ba iketle gomme ga le kgopišege gabonolo eupša le a lebalela. Lerato le bjalo le a aga. Go feta moo, le re thuša go atlega ditswalanong tša rena le ba bangwe, kudu-kudu ditho tša lapa.—1 Bakorinthe 13:4-8.

Go batswadi, lerato le bolela go swara bana ba bona ka borutho le go ba beela mellwane e kwagalago ya boitshwaro yeo e theilwego Beibeleng le e mengwe. Bana bao ba godišeditšwego boemong bjo bjalo ba ikwa ba šireletšegile e bile ba le lapeng leo le tsepamego gomme ba ikwa ba ratwa le go tšeelwa godimo e le ka kgonthe.—Baefeso 5:33–6:4; Bakolose 3:20.

Jack, lesogana la kua United States, o goletše lapeng leo le dirišago melao ya motheo ya Beibele. Ge a se na go tloga gae, Jack o ile a ngwalela batswadi ba gagwe lengwalo. Ka boripana o itše: “Selo seo ka mehla ke lekilego go se latela ke taelo [ya Beibele] ya gore: ‘Xodiša tat’axo le mm’axo, . . . xore . . . O bê le mahlatse.’ (Doiteronomio 5:16) Dilo di ntshepeletše gabotse. Gomme ga bjale go feta le ge e le neng pele, ke a lemoga gore seo e bile ka baka ka lerato la lena le le tseneletšego la botswadi. Ke leboga go šoma ga lena ka thata le go thekgana ge le be le nkgodiša.” Ge e ba o le motswadi, o be o tla ikwa bjang ge o be o ka amogela lengwalo le le swanago le leo? Na o be o ka se thabe kudu?

Le gona, lerato le le sepedišanago le melao ya motheo “le thaba le therešo”—therešo ya moya yeo e hwetšwago ka Beibeleng. (1 Bakorinthe 13:6; Johane 17:17) Ka mohlala: Banyalani bao ba nago le mathata a lenyalo ba dira phetho ya go bala gotee  mantšu a Jesu ao a hwetšwago go Mareka 10:9 a rego: “Se Modimo a se tlemagantšego jokong go se be le motho yo a se aroganyago.” Ga bjale ba swanetše go hlahloba dipelo tša bona. Na ruri ba ‘thabela therešo ya Beibele’? Na ba tla swara le go lebelela lenyalo e le le lekgethwa, go swana le ge Modimo a dira bjalo? Na ba ikemišeditše go dira maiteko a go rarolla mathata a bona ka moya wa lerato? Ge e ba go le bjalo, ba ka dira gore lenyalo la bona le atlege gomme ka baka leo ba ka kgona go thaba.

6 Lemoga go Nyaka ga Gago Dilo tša Moya

“Go thaba bao ba lemogago go nyaka ga bona dilo tša moya.” (Mateo 5:3) Go fapana le diphoofolo, batho ba na le bokgoni bja go kwešiša dilo tša moya. Ka baka leo, re botšiša dipotšišo tše bjalo ka tše rego, Morero wa bophelo ke ofe? Na Mmopi o gona? Go direga’ng go rena ge re e-hwa? Bokamoso bo re swaretše’ng?

Lefaseng ka bophara, batho ba dimilione ba dipelo tše di botegago ba lemogile gore Beibele e araba dipotšišo tšeo. Ka mohlala, potšišo ya mafelelo e tswalana le morero wa Modimo bakeng sa batho. Morero woo ke ofe? Ke wa gore lefase e be paradeise yeo e dulwago ka mo go sa felego ke batho bao ba ratago Modimo le ditekanyetšo tša gagwe. Psalme 37:29 e re: “Baloki e ba beng ba naxa, ba dula mo xo yôna ka mehla le ka mehla.”

Go a kwagala gore Mmopi wa rena o nyaka se se fetago gore re atlege ka nakwana ka go phela nywaga feela e 70 goba e 80. O nyaka gore re atlege ka mo go sa felego! Ka gona, ga bjale ke nako ya gore o ithute ka Mmopi wa gago. Jesu o itše: “Se se bolela bophelo bjo bo sa felego, gore ba hwetše tsebo ka wena Modimo a nnoši wa therešo le ka yo o mo romilego, Jesu Kriste.” (Johane 17:3) Ge o dutše o hwetša tsebo yeo e bile o e diriša bophelong bja gago, o tla lemoga gore “khumišô ké dithšexofatšô tša Morêna; xa e tlale ka xo itapiša.”—Diema 10:22.

[Mongwalo wa tlase]

[Lepokisi go letlakala 25]

DITAELO TŠE DI OKETŠEGILEGO TŠEO DI TLIŠAGO KATLEGO

▪ Boifa Modimo ka tsela e agago. “Mathômô a bohlale ké xo boifa Morêna.”—Diema 9:10.

▪ Kgetha bagwera ka bohlale. “Šika le bahlale O hlalefê; mokxônana-le-mašilo ó tlo thsereana.”—Diema 13:20.

▪ Phema go nwa ka mo go feteletšego. “Monwi le sejatô ba tlo diila.”—Diema 23:21.

▪ O se ke wa itefeletša. “Le se ke la bušetša bobe ka bobe go motho.”—Baroma 12:17.

▪ Šoma ka thata. “Ge e ba motho a sa nyake go šoma le go ja a se ke a ja.”—2 Bathesalonika 3:10.

▪ Diriša Molao wa Gauta. “Dilo tšohle, tše le nyakago batho ba le dira tšona, le lena ka mo go swanago le ba dire tšona.”—Mateo 7:12.

▪ Laola leleme la gago. “Yo a ratago bophelo le go bona mehla e mebotse, a a ke a thibele leleme la gagwe go seo e lego se sebe.”—1 Petro 3:10.

[Box/​Picture on page 26]

LERATO KE SEHLARE SE SEBOTSE

Ngaka ya tša kalafo le mongwadi e lego Dean Ornish o ngwala gore: “Lerato le tswalano ya kgaufsi ke mabaka a magolo a go hlaola dilo tšeo di re dirago gore re babje le tšeo di re fodišago, tšeo di bakago manyami le tšeo di tlišago lethabo, tšeo di dirago gore re tlaišege le tšeo di re kaonefatšago. Ge e ba seokobatši se sefsa se be se e-na le mafelelo a swanago bathong, mo e ka bago ngaka e nngwe le e nngwe nageng e be e tla laela gore balwetši ba yona ba se diriše. Go se laele gore se dirišwe e be e tla ba tshwaro e mpe.”

[Box/​Picture on page 27]

GO TLOGA MANYAMING GO YA KATLEGONG

Milanko, yo a dulago kua Balkans, o ile a tsenela ntwa ge e be e thoma tikologong ya gabo. Ka baka la go ba ga gagwe le sebete, batho ba ile ba thoma go mmitša Rambo, e lego leina la senatla se sešoro sa difilimi. Lega go le bjalo, ge nako e dutše e e-ya Milanko o ile a itokolla go beng yo mongwe wa madira a ntwa ka baka la kgobogo le boikaketši tšeo a bego a di bona. O ngwala gore: “Seo se ile sa lebiša mekgweng e mentši e mebe—bjala, metšoko, dihlare-tagi, go petšha le boitshwarong bjo bo gobogilego. Bophelo bja-ka bo be bo gobogile kudu e bile ke se na kholofelo ya gore bo tla kaonefala.”

Nakong e mpe kudu ya bophelo bja gagwe, Milanko o ile a thoma go bala Beibele. Ka morago, ge a be a etetše motswal’agwe o ile a bona kopi ya makasine wa Morokami, wo o gatišitšwego ke Dihlatse tša Jehofa. O ile a rata seo a bego a se bala gomme ka morago a thoma go ithuta Beibele le Dihlatse. Therešo ya Beibele e mo thušitše go hwetša lethabo le katlego ya kgonthe. O re: “E mmatlafaditše. Ke tlogetše mekgwa ya-ka ka moka, ka ba motho yo mofsa gomme ka kolobetšwa bjalo ka yo mongwe wa Dihlatse tša Jehofa. Batho bao ba bego ba ntseba ga ba sa mpitša Rambo eupša ba mpitša Bunny—e lego leina la-ka la bjaneng—ka baka la ge ga bjale ke le motho yo bonolo.”