Lebaka la Gore re Phele

BEIBELE e bolela gore Mmopi wa rena, Jehofa Modimo, ga a dire dilo ka ntle le morero. Ka mohlala, ela hloko tokišetšo yeo a e dirilego ya modikologo wa meetse a lefase, wo o dirago gore re kgone go phela lefaseng. Beibele e e hlalosa ka tsela ya sereto eupša e le e nepagetšego gore: “Tšohle dinoka di ya lewatleng, ’me lewatle xa le tlale. Dinoka mo di yaxo, ké mo di tl’o xo fêla di leba xôna.”—Mmoledi 1:7.

Beibele e bapiša go botega ga dikholofetšo tša Modimo le modikologo wo go sa tšwago go bolelwa ka wona. Go etša ge re tseba lehono, matla a letšatši a dira gore meetse a tšwago lewatleng le matsheng a moyafale gomme ka morago a boele lefaseng ka go na. Jehofa o lebiša tlhokomelo modikologong wo gomme o hlalosa gore: “Le Lentšu la-ka le le tšwaxo molomong wa-ka, le ka se boêle xo Nna lè le fêla; le tlo dira se nkxahlaxo,  le tlo phêtha se ke le rometšexo sôna.”—Jesaya 55:10, 11.

Meetse a hlwekilego a boela lefaseng a e-tšwa marung go dira gore go be le bophelo lefaseng. Ka mo go swanago, ‘lentšu le le tšwago molomong wa Modimo’ le kgona go matlafatša maphelo a rena a moya. Go bjalo ka ge Jesu Kriste ka boyena a hlalositše gore: “Motho a ka se phele ka senkgwa feela, eupša o tla phela ka polelo e nngwe le e nngwe e tšwago molomong wa Jehofa.”—Mateo 4:4.

Go ja dijo tša moya tše di tšwago go Modimo go dira gore re kgone go dumelelanya maphelo a rena le morero wa gagwe. Lega go le bjalo, pele ga ge re ka thoma go dira bjalo, re swanetše go kwešiša gore morero wa Modimo ke ofe. Ka mohlala, ke ka baka la’ng Modimo a ile a bopa lefase? Morero wa gagwe ka lona o re kgoma bjang? A re boneng.

Morero wa Modimo ka Lefase

Ka ge Modimo a nyaka gore dilo di sepelele batho gabotse, o beile monna wa pele le mosadi, Adama le Efa kua Edene e lego serapana sa paradeise. Ke moka o ile a ba laela gore ba be le bana, a re: “Tswalang Le atê, tlalang lefase, Le le fenyê Le bušê ’hlapi tša lewatlê le ’nonyana tša xodimo, le nyabanyaba yohle ya diphedi mó ’faseng.” (Mongwalo o sekamego ke wa rena.)—Genesi 1:26-28; 2:8, 9, 15.

Re ka fihlelela phetho efe ditaelong tše? Na ga go molaleng gore Modimo o be a nyaka gore lefase ka moka le lengwe gore le fetošwe legae la paradeise bakeng sa batho? Lentšu la gagwe le re: “Maxodimo ké maxodimo a Morêna; ’me lefase ó le neetše bana ba batho.”—Psalme 115:16.

Lega go le bjalo, gore batho ba lemoge go phethagala ga morero wa Modimo wa gore ba thabele go phela lefaseng ka mo go sa felego, ba tla swanela ke go godiša Jehofa ka go mo kwa. Eupša na Adama o dirile bjalo? Aowa, o dirile sebe ka go se kwe Modimo. Mafelelo e bile afe? Ditlogolo ka moka tša Adama, go akaretša le rena lehono, di abetše sebe le lehu, go etša ge Beibele e bolela gore: “Go etša ge ka motho o tee sebe se tsene lefaseng, gomme lehu la tsena ka sebe, ka baka leo lehu le aparetše batho bohle gobane bohle ba dirile sebe.”—Baroma 5:12.

Ka baka leo, batho ka moka ba a hwa gomme lefase ga se la hlwa le lengwa e le paradeise ya lefase ka bophara. Ka gona, na go ka direga gore morero wa Modimo o fetogile?

Aowa, ka gobane gopola gore Modimo o itše: “Lentšu la-ka le le tšwaxo molomong wa-ka, le ka se boêle xo Nna lè le fêla; le tlo dira se nkxahlaxo, le tlo phêtha se ke le rometšexo sôna.” Go feta moo, Modimo o holofeditše ka gore: “Ke dira tšohle tše ke di rataxo.” (Jesaya 45:18; 46:10; 55:11) E bile ke seo se thabišago Modimo—ke morero wa gagwe—gore lefase e be paradeise ya lefase ka bophara yeo e dulwago ke batho bao ba mo hlankelago ka lethabo ka mo go sa felego, go etša ge a be a rerile bjalo mathomong.—Psalme 37:29; Jesaya 35:5, 6; 65:21-24; Kutollo 21:3, 4.

Morero wa Modimo o Phethagaditšwe—Bjang?

Jehofa o bonagaditše bohlale bja gagwe bjo bogolo le lerato ge a be a dira tokišetšo ya gore  batho ba lopollwe sebeng sa leabela le go mafelelo a sona—go se phethagale le lehu. O dirile se ka go dira gore morwa a belegwe gomme a lokolle bohle sebeng seo ba se abetšego go motho wa pele, e lego Adama. Tokišetšo ye e bitšwa topollo, yeo e ilego ya newa bakeng sa gore batho bao ba swanelegago ba ka hwetša bophelo bjo bo sa felego. (Mateo 20:28; Baefeso 1:7; 1 Timotheo 2:5, 6) Topollo e neilwe bjang?

Morongwa wa Jehofa e lego Gabriele o ile a tsebiša kgarebe yeo e bitšwago Maria mabapi le go belega ga yona ngwana ka tsela ya mohlolo mo go bego go batamela, a hlalosa kamoo a bego a tla ima ngwana ka gona gaešita le ge a be a sa “tsebe monna.” Mohlolo wo Modimo a o dirilego e bile wa go fetišetša bophelo bja Morwa wa gagwe wa leitšibulo go tloga mo a bego a le gona legodimong go ya popelong ya Maria. Ka baka leo o ile a ima ka baka la go šoma ga moya o mokgethwa wa Modimo.—Luka 1:26-35.

Jesu o ile a belegwa ka morago ga dikgwedi tše senyane e le motho yo a phethagetšego, a swana le motho wa pele, e lego Adama. Ge nako e dutše e e-ya, o ile a kgona go neela bophelo bja gagwe bjo bo phethagetšego e le motho lehung la sehlabelo. Ka go dira bjalo, Jesu o bile ‘Adama wa bobedi’ gomme ka go rialo a ala motheo wa gore batho ka moka bao ba botegelago Modimo ba ka lopollwa sebeng le lehung.—1 Bakorinthe 15:45, 47.

Ka kgonthe re swanetše go kgongwa ke lerato le le legolo leo Modimo a re bontšhitšego lona! Go etša ge Beibele e bolela, “Modimo o ratile lefase kudu mo a ilego a gafa Morwa wa gagwe yo a tswetšwego a nnoši gore yo mongwe le yo mongwe yo a dumelago go yena a se ke a fedišwa, eupša a be le bophelo bjo bo sa felego.” (Johane 3:16) Potšišo ke gore, Re tla arabela bjang leratong la Modimo? Na ga se ra swanela go mo leboga go tšwa dipelong ka baka la mpho ye a re filego yona? Ela hloko mehlala ya bao ba ilego ba mo leboga.

 Go ba le Morero Maphelong a Rena

Denise, yo go boletšwego ka yena sehlogong se se fetilego, o lemogile gore go godiša Modimo ka go kwa melao le ditaelo tša gagwe go dirile gore a be le tlhahlo le morero bophelong. O a laodiša: “Ke ithutile go tšwa Beibeleng gore ntle le taba ya gore Modimo o na le morero wa nako e telele ka batho, e bile o na le mošomo o itšego bakeng sa bao ba mo rapelago. Ga ke nagane gore go na le bophelo bjo bo kgotsofatšago kudu go feta go diriša tokologo ya boikgethelo yeo a nneilego yona gore ke mo tumiše ka go phela ka go dumelelana le morero wa gagwe.”

Re ka dira se se swanago ka go ithuta seo thato ya Modimo e lego sona gomme ra e dira. Ke therešo gore se sengwe sa dilo tšeo re swanetšego go di lemoga ka botlalo ke mohola wa sehlabelo sa topollo, seo se tlago go dira gore re thabele go phela bophelo bjo bo phethagetšego lefaseng le lefsa la go loka. Eupša mo nakong ye, go akgofile gore re kgotsofatše senyakwa sa moya seo Modimo a se neilego yo mongwe le yo mongwe wa rena.

Dave, yo go boletšwego ka yena sehlogong sa pele sa lelokelelo le la dihlogo, ke yo mongwe wa bao ba ilego ba kgotsofatša tlala ya bona ya moya. O hweditše dikarabo tša dipotšišo tšeo a bego a e-na le tšona mabapi le morero wa bophelo. O re: “Ge ke lebelela tša kua morago, ke bona bophelo bja pele ga ge nka ithuta ka morero wa Modimo e le lelokelelo la maiteko a lefeela. Ke be ke sa tsebe ka nako yeo, eupša selo seo se bego se dira gore ke se ke ka ikwa ke kgotsofetše e be e le gore senyakwa sa-ka sa moya ga se sa kgotsofatšwa. Ga ke ikwe ka tsela yeo gona bjale. Ke kwešiša gore ke phelela eng le gore ke swanetše go dira eng ka bophelo bja-ka.”

Ee, ka go se swane le dikgopolo tšeo batho bao ba sa phethagalago ba nago le tšona, pono ya Modimo mabapi le morero wa bophelo go etša ge Beibele e bolela e a kgotsofatša e le ruri. Re phela ka baka la morero wo Modimo a re bopetšego wona—gore re tumiše leina la gagwe, re be le tswalano e botse le yena gomme ka go rialo re kgotsofatše senyakwa sa rena sa moya. Lehono le go iša ka mo go sa felego, re ka thabela phethagalo ya mantšu a ao a buduletšwego: “Mahlatse [ke] a sethšaba seo Morêna e lexo Modimo wa sôna.”—Psalme 144:15.

[Box/​Picture on page 8]

BOTHATA BJA TLAIŠEGO

Tlaišego e hlaloswa e le e nngwe ya ditlhohlo tše dikgolo mabapi le go kwešiša gore re phelela eng. Viktor Frankl o itše: “Ge e ba bophelo bo tloga bo e-na le morero, gona go swanetše go ba le lebaka la gore re tlaišege. Tlaišego ke karolo ya bophelo yeo e ka se fedišwego, go fo swana le ditiragalo tše di rulagantšwego e sa le pele le lehu.”

Beibele e hlalosa lebaka la gore re tlaišege le go hwa. Ga se Modimo a di bakago. Go e na le moo, ao ke mafelelo a phetho e kotsi ya banyalani ba pele ba batho ya go dira gore maphelo a bona a se ke a laolwa ke Mmopi wa bona. Tshekamelo ye ya sebe e ile ya latelwa ke ditlogolo tša bona e bile ke sebaki se segolo sa tlaišego ya batho.

Gaešita le ge go kwešiša gore ke ka baka la eng re phela go sa rarolle mathata ka moka a bophelo, go re nea motheo wa go swaragana le ona. Le gona, re newa kholofelo ya bokamoso, e lego nako yeo ka yona Modimo a tla bago a fedišitše tlaišego le lehu sa ruri.

[Diagram/​Picture on page 7]

Beibele e bapetša go botega ga dikholofetšo tša Modimo le modikologo o kgahlišago wa meetse

[Seswantšho]

(Bakeng sa mongwalo o beakantšwego ka mokgwa wa kgatišo, bona kgatišo ka boyona)

Pula ← Moyafalo ← Moyafalo

↓ ↑

↓ ↑

Matsha, dinoka ↑

↓

→ → Mawatle

[Seswantšho go letlakala 8, 9]

Ke ka baka la’ng re ka kgodišega gore ge nako e dutše e e-ya, lefase e tla ba paradeise yeo e tletšego ka batho bao ba thabilego le ba phetšego gabotse mmeleng?

[Seswantšho go letlakala 9]

‘Ga ke nagane gore go na le bophelo bjo bo kgotsofatšago kudu go feta go diriša tokologo ya boikgethelo yeo Modimo a nneilego yona gore ke mo hlankele.’—Denise