Pono ya Beibele

Modimo ke Motho wa Mohuta Mang?

BEIBELE e hlalosa gore: “Modimo ke Moya, gomme bao ba mo rapelago ba swanetše go mo rapela ka moya le ka therešo.” Mantšu a a bontšha therešo ya motheo mabapi le sebopego sa Modimo goba gore ke motho wa mohuta mang—ke moya! (Johane 4:19-24) Lega go le bjalo, go bolelwa ka yena ka Beibeleng e le motho. Leina la gagwe ke Jehofa.—Psalme 68:4.

Babadi ba bangwe ba Beibele ba ile ba bontšha kgakanego mabapi le gore Modimo ke motho wa mohuta mang. Ka ge Modimo e le moya o sa bonagalego go e-na le go ba motho yo a bonagalago, ke ka baka la’ng go e-na le ditemana tše dintši ka Beibeleng tšeo di bolelago ka Modimo a e-na le mahlo, ditsebe, nko, pelo, matsogo, diatla, menwana le maoto? * Ba bangwe ba ka phetha ka gore Modimo o na le sebopego sa motho ka gobane Beibele e bolela gore motho o bopilwe ka seswantšho sa gagwe. Go hlahloba seo Beibele e se bolelago go ka dira gore go se be le kgakanego e bjalo.—Genesi 1:26.

Ke ka Baka La’ng a Hlaloswa ka Dika tša Batho?

Bangwadi ba Beibele ba ile ba budulelwa ke Modimo gore ba diriše dika tša batho ge ba bolela ka yo Matla-ohle bakeng sa go thuša batho go kwešiša gore Modimo ke motho wa mohuta mang. Diithuti di bitša dika tšeo gore ke “tlhaloso goba kgopolo yeo e lego ka sebopego goba dika tša motho.” Dipolelwana tše di bontšha gore tsela ya motho ya go hlalosa Modimo wa therešo, Jehofa, e lekanyeditšwe. Maikemišetšo e be e le go kwešiša tsela yeo go phelwago ka yona legodimong le go fetišetša kgopolo ye ka ditsela tšeo batho ba ka di kwešišago. Se ga se bolele gore re swanetše go tšea dipolelwana tše e le tša kgonthe go fo swana le ge re ka se dire bjalo ditšhupetšong tša Beibele mabapi le Modimo e le “Lefsika,” “letšatši” goba “kôtsê.”—Doiteronomio 32:4; Psalme 84:11.

Ka mo go swanago, e le gore e fetišetše kgopolo ya gore ka tekanyo e itšego motho o na le dika tšeo di swanago le tšeo Jehofa a nago le tšona go fihla bokgoleng bjo itšego, Beibele e re motho o bopilwe ka seswantšho sa Modimo. Go molaleng gore ga e bolele gore batho ke meoya goba gore Modimo o ka sebopego sa motho.

Na Modimo ke Monna Goba Mosadi?

Go fo swana le ge go nea Modimo dika tša batho go sa swanela gore re go kwešiše ka tsela ya kgonthe,  go dirišwa ga bong bja monna go hlalosa Modimo ga se gwa swanela go tšwewa ka tsela ya kgonthe. Go fapana ga bong go lekanyeditšwe feela go dibopiwa tše di bonagalago gomme se e fo ba go bontšha go lekanyetšwa ga leleme la batho go hlalosa ka botlalo Modimo yo Matla-ohle Jehofa.

Go diriša ga Beibele leina ‘Tate’ go re thuša go kwešiša gore Mmopi wa rena a ka bapetšwa le tate wa motho yo lerato, yo a šireletšago le yo a hlokomelago. (Mateo 6:9) Se ga se bolele gore re swanetše go lebelela Modimo, goba gaešita le dibopiwa tše dingwe tša moya legodimong, e le yo motona goba yo motshadi. Ga ba tsebje ka bong bja bonna goba bja bosadi. Se se kgahlišago, Beibele e bontšha gore bao ba bileditšwego go ba bajabohwa le Kriste Mmušong wa gagwe wa legodimong ga se ba letela go dula ba e-na le bong bja bona ge ba tagafatšwa bjalo ka barwa ba Modimo ba moya. Moapostola Paulo o ile a ba gopotša gore “ga go na yo motona goba yo motshadi” maemong a bona ge ba e-ba barwa ba Modimo ba moya bao ba tagafaditšwego. Le gona ba hlaloswa ka tsela ya seswantšhetšo e le “monyadiwa” wa Kwana e lego Jesu Kriste. Sohle se se bontšha gore ditho tša batho tšeo Modimo a hlaloswago a e-na le tšona—go akaretša le Morwa wa gagwe yo a tswetšwego a nnoši e lego Jesu le dibopiwa tše dingwe tša moya—ga se tša swanela go kwešišwa ka tsela ya kgonthe.—Bagalatia 3:26, 28; Kutollo 21:9; 1 Johane 3:1, 2.

Ka ge ba be ba kwešiša gabotse tema yeo e kgathwago ke monna, bangwadi ba Beibele ba dirišitše bong bja monna ge ba bolela ka Modimo. Ba ile ba bona tema yeo e kgathwago ke monna e le ponagatšo ya lerato la Jehofa le go kgahlegela bana ba gagwe ba lefaseng.—Maleaki 3:17; Mateo 5:45; Luka 11:11-13.

Seka se Segolo sa Modimo

Gaešita le ge e le moya, Mmuši yo a phagamego ga a kgole kudu, ga se motho yo a iphihlilego goba yo go sa kgonegego go boledišana le yena. Go ba ga gagwe motho wa moya ga go dire gore go se kgonege gore batho ba dipelo tše di botegago ba boledišane le yena, bao ba nyakago go tseba le go leboga lerato la gagwe, matla a gagwe, bohlale bja gagwe le toko ya gagwe, tšeo di bontšhago gabotse gore ke motho wa mohuta mang le tšeo di bonagalago tlholong.—Baroma 1:19-21.

Lega go le bjalo, tsela yeo Modimo a lego ka yona e ka akaretšwa ka seka sa gagwe se segolo e lego lerato. Lerato la gagwe ke le legolo kudu mo go bolelwago gore ke mothofatšo wa lona. (1 Johane 4:8) Seka se se akaretša dika tše dingwe tša seo a lego sona, tše bjalo ka kgaugelo, tebalelo le go se fele pelo. (Ekisodo 34:6; Psalme 103:8-14; Jesaya 55:7; Baroma 5:8) Ruri Jehofa ke Modimo yo lerato yo a laletšago rena batho gore re batamele kgaufsi le yena.—Johane 4:23.

[Mongwalo wa tlase]

NA O ILE WA IPOTŠIŠA?

▪ Leina la Modimo ke mang?—Psalme 68:4.

▪ Ponagatšo ya dika tša Modimo re ka e hwetša kae?—Baroma 1:19-21.

▪ Seka se segolo sa Modimo ke sefe?—1 Johane 4:8.