Bafsa ba a Botšiša

Na ke Swanetše go ba le Bagwera ba Bakaone?

“Ge ke galefile, ke nyaka motho yoo nka mo tšhollelago sa mafahleng. Ge ke nyamile, ke nyaka motho yoo a tlago go mpotša gore go tla loka. Ge ke thabile, ke nyaka motho yo nka thabago le yena. Go ya ka nna, bagwera ba bohlokwa.”—Brittany.

GO BE go dutše go thwe bana ba banyenyane ba nyaka bao ba ka bapalago le bona, mola bao ba lego mahlalagading ba nyaka bagwera. Phapano ke efe?

Yo o bapalago le yena ke motho yoo a go tlošago bodutu.

Mogwera ke motho yoo a ratago seo o se ratago.

Go feta moo, Beibele e bolela gore “moxwêra ké moratwa wa ka mehla; ké ngwan’ešo e a ntswáletšwexo wa mohla wa tlalêlô.” (Diema 17:17) Se ruri se hlalosa mohuta o tseneletšego wa bogwera o fetago bjo bo hwetšwago papading!

Therešo: Ge o dutše o e-ba motho yo mogolo, o nyaka bagwera bao ba

(1) Nago le dika tše di rategago.

(2) Phelago ka ditekanyetšo tše di retegago.

(3) Nago le tutuetšo e botse go wena.

Potšišo: O ka tseba bjang gore bagwera ba gago ba fihlelela dinyakwa tšeo? A re ahla-ahleng dinyakwa tše ka se tee ka se tee.

Senyakwa sa Bogwera #1 Dika tše di Rategago

Seo o swanetšego go se tseba. Ga se batho ka moka bao ba rego ke bona bagwera bao e lego bagwera e le ka kgonthe. Le gona, Beibele e bolela gore “go na le bagwera bao ba ratago go jana ka meno.” (Diema 18:24, NW) Seo se ka kwagala e le pheteletšo. Eupša ela hloko se se latelago: Na o kile wa ba le motho yoo go thwego ke mogwera yoo a bego a ikhola ka wena? Go thwe’ng ka yoo a bego a seba ka wena goba a phatlalatša mabarebare ka wena? Phihlelo e bjalo e ka dira gore o se sa bota batho. * Dula o gopola gore ge go tliwa tabeng  ya bagwera, se bohlokwa ke mohuta wa bagwera e sego gore o na le bagwera ba bakae!

Seo o ka se dirago. Kgetha bagwera bao ba nago le dika tšeo di swanelwago ke go ekišwa.

“Motho yo mongwe le yo mongwe o bolela gabotse ka mogwera wa-ka Fiona. Le nna ke nyaka gore batho ba mpolele gabotse. Ke nyaka go ba le botumo bjoo a nago le bjona. Go ya ka nna, seo se a retega.”—Yvette, 17.

Leka boitlwaetšo bjo.

1. Bala Bagalatia 5:22, 23.

2. Ipotšiše gore, ‘Na bagwera ba-ka ba bonagatša dika tšeo di bopago “dienywa tša moya”?’

3. Dira lelokelelo la maina a bagwera ba gago ba paala ka mo tlase. Kgaufsi le le lengwe le le lengwe o ngwale dika tšeo di mo hlalosago gabotse.

Leina Seka

․․․․․ ․․․․․

․․․․․ ․․․․․

․․․․․ ․․․․․

Ela hloko: Ge e ba o gopola dika tše di sa kgahlišego feela, e ka ba e le nako ya gore o nyake bagwera ba bakaone!

Senyakwa sa Bogwera #2​—Ditekanyetšo tše di Retegago

Seo o swanetšego go se tseba. Ge o le tlalelong e kgolo ya go hwetša bagwera, gantši o ka kgetha ba mohuta o fošagetšego. Beibele e re: “Mokxônana-le-mašilo ó tlo thsereana.” (Diema 13:20) Lentšu le le rego ‘mašilo’ ga le bolele ka batho bao ba sego bohlale. Go e na le moo, le hlalosa bao ba sa amogelego mabaka a kwagalago gomme ba latela tsela ya boitshwaro yeo e bontšhago go se kwe—mohuta wa bagwera wo o swanetšego go o phema!

Seo o ka se dirago. Go e-na le go gwerana le motho yo mongwe le yo mongwe yoo a tlwaelanago le wena, e-ba yo a kgethago. (Psalme 26:4) Aowa, seo ga se bolele gore o swanetše go ba le kgethollo. Mo tabeng ye, go ba yo a kgethago go bolela gore o na le temogo e lekanego ya go “hlatha moloki le e a sa lokaxo, Lè [go] hlaoloxanya modirêla-Morêna le e a sa Mo direlexo.”—Maleaki 3:18.

Modimo ga a na kgethollo, eupša o a kgetha ge go tliwa tabeng ya gore ke mang yo a tlago go ‘dula ngwakong wa gagwe.’ (Psalme 15:1-5) Le wena o ka dira se se swanago. Phela ka ditekanyetšo tše di lokilego, gomme bao ba katanelago go dira se se swanago gantši ba tla kopana le wena. Mafelelong, e tla ba mohuta o mokaone-kaone wa bagwera!

“Ke leboga gore batswadi ba-ka ba nthušitše go hwetša bagwera—dithaka tša-ka tšeo di dirago gabotse moyeng.”—Christopher, 13.

Leka boitlwaetšo bjo.

Araba dipotšišo tše di latelago:

▪ Ge ke e-na le bagwera ba-ka, na ke dula ke  tšhogile gore ba ka nkgothaletša go dira selo seo ke tsebago gore se fošagetše?

□ Ee □ Aowa

▪ Na ke dika-dika go tsebiša bagwera ba-ka go batswadi ba-ka, ke tšhaba gore batswadi ba ka no se ba amogele?

□ Ee □ Aowa

Ela hloko: Ge e ba o arabile dipotšišo tše di lego ka mo godimo ka ee, nyaka bagwera bao ba nago le ditekanyetšo tše di phagamego. O re’ng o sa thome ka go hwetša bao ba go fetago ganyenyane ka bogolo gomme ba bea mohlala o mobotse bophelong bja Bokriste?

Senyakwa sa Bogwera #3​—Tutuetšo e Botse

Seo o swanetšego go se tseba. Beibele e bolela gore: “Bagwera ba babe ba senya semelo se sebotse.” (1 Bakorinthe 15:33, Today’s English Version) Mofsa yo a bitšwago Lauren o re: “Bao ke tsenago le bona sekolo ba be ba nkamogela ge feela ke dira seo ba rego ke se dire. Ke be ke lewa ke bodutu, ka gona ke ile ka phetha ka go itshwara bjalo ka bona e le gore ke amogelwe.” Lauren o lemogile gore ge o itumelelanya le ditekanyetšo tša ba bangwe, o ka ba bjalo ka sebapadišwa sa bona gomme ba go bapadiša ka tsela yeo ba ratago. Seo ga se go swanele le gatee!

Seo o ka se dirago. Fediša bogwera le bao ba go gapeletšago gore o fetoge le gore o itumelelanye le tsela ya bona ya bophelo. Ge e ba o gata mogato wo, o tla ikwa bokaone ka wena ka noši e bile o tla bula sebaka sa go hwetša bagwera ba bakaone—mohuta woo o ka go tutuetšago gabotse.—Baroma 12:2.

“Mogwera wa-ka wa paala e lego Clint o na le kahlolo e botse gomme o kwešiša maikwelo a ba bangwe, ka go rialo ke kgothatšo e kgolo kudu go nna.”—Jason, 21.

Leka boitlwaetšo bjo.

Ipotšiše dipotšišo tše di latelago:

▪ Na ke fetoša tsela yeo ke aparago ka yona, ke bolelago ka yona goba ke dirago dilo ka yona e le gore ke kgahle bagwera ba-ka?

□ Ee □ Aowa

▪ Na ke ikhwetša ke e-ya mafelong ao a belaetšago tabeng ya boitshwaro ao ke bego nka se ye go ona ge e be e se ka bagwera ba-ka?

□ Ee □ Aowa

Ela hloko: Ge e ba o araba dipotšišo tše di lego ka mo godimo ka ee, e-ya go tsoma keletšo go batswadi ba gago goba go motho yo mongwe yo a godilego tsebong. Ge e ba o le yo mongwe wa Dihlatse tša Jehofa, o ka batamela mogolo wa Mokriste gomme o mmotše gore o nyaka thušo ya kamoo o ka kgethago bagwera bao ba ka go tutuetšago gabotse.

Dihlogo tše di oketšegilego go tšwa lelokelelong la dihlogo tša “Bafsa ba a Botšiša” di ka hwetšwa mokerong wa Web wa www.watchtower.org/ype

[Mongwalo wa tlase]

SEO GO KA NAGANWAGO KA SONA

▪ Ke dika dife tšeo o thabelago gore mogwera wa gago a be le tšona, gona ka baka la’ng?

▪ Ke dika dife tšeo wena o swanetšego go di hlagolela e le gore o be mogwera yo mokaone?

[Box/​Pictures on page 27]

SEO BAGWERA BA GAGO BA SE BOLELAGO

“Ge batswadi ba-ka ba be ba nkgothaletša go tlogela dihlopha tše itšego tša bagwera, ke ile ka ipotša gore ba ke bona feela bao ke nyakago go gwerana le bona. Lega go le bjalo, keletšo ya batswadi ba-ka e be e le e botse gomme gatee-tee ge ke se na go bona seo, ke ile ka lemoga gore go be go e-na le bagwera ba bantši ba babotse.”—Cole.

“Go tšea karolo bodireding bja Bokriste ke tsela e kaone-kaone go nna ya go tseba batho ka phuthegong. Mo ke moo ke kgonago go tswakana le batho ba fapa-fapanego, ba bagolo le ba banyenyane. Ke fetša nako ke e-na le batho bao ba ratago Jehofa.”—Yvette.

“Ke be ke rapelela go hwetša bagwera, eupša ke ile ka lemoga gore ke be ke sa dire maiteko a go ba hwetša. Ka baka leo ke ile ka thoma go gata mogato wa pele wa go bolediša ba bangwe dibokeng tša Bokriste. Kapejana ke ile ka ba le bagwera bantši ba bafsa. Ga ke sa lewa ke bodutu.”—Sam.

[Lepokisi go letlakala 28]

LEKA DITŠHIŠINYO TŠE

Bolela le batswadi ba gago mabapi le go dira bagwera. Ba botšiše gore ba be ba e-na le bagwera ba mohuta mang ge ba be ba sa lekana le wena. Na ba itshola mabapi le mohuta wa bagwera woo ba ilego ba o kgetha? Ge e ba go le bjalo, ke ka baka la’ng? Ba botšiše kamoo o ka phemago a mangwe a mathata ao ba kilego ba ba le ona.

Tsebiša bagwera ba gago go batswadi ba gago. Ge e ba o dika-dika go dira bjalo, ipotšiše gore, ‘Ke ka baka la’ng go le bjalo?’ Na go na le se sengwe ka bagwera ba gago seo o bonago gore batswadi ba gago ba ka se se amogele? Ge e ba go le bjalo, o ka swanelwa ke go ba yo a kgethago kudu ge go tliwa tabeng ya go kgetha bagwera.

[Lepokisi go letlakala 28]

DITSELA TŠE THARO TŠA GO DULA O E-NA LE BAGWERA BA BABOTSE

▪ E-ba motheetši yo mobotse. Bontšha gore o tshwenyega ka boiketlo bja bagwera ba gago le dilo tšeo di ba tshwenyago.​—Bafilipi 2:4.

▪ E-ba yo a lebalelago. O se ke wa letela phethagalo. “Re kgopša gantši.”​—Jakobo 3:2.

▪ Ba fe nako ya go dira tša bona. Ga go na lebaka la gore o ba kgomarele ka mo go feteletšego. Bagwera ba kgonthe ba tla go thekga dinakong tša mathata.​—Mmoledi 4:9, 10.

[Seswantšho go letlakala 26, 27]

Ge o itumelelanya le ditekanyetšo tša ba bangwe feela e le gore ba go amogele, o ka ba bjalo ka sebapadišwa sa bona, seo ba ka se bapadišago ka tsela yeo ba ratago