Lebaka Leo ka Lona re sa Kago ra Ntšha Mpa

VICTORIA, yo go boletšwego ka yena sehlogong sa mathomo, o ile a botša lesogana la gagwe, Bill, gore o be a ka se ntšhe mpa. Victoria o itše: “Ke be ke na le maikwelo a gore go be go e-na le bophelo ka go nna. Ka go lemoga gore ge nka tšwela pele ke dula le Bill, o be a ka se nthekge nakong ya boimana bja-ka, ke ile ka mo tlogela.”

Lega go le bjalo, Bill o ile a fetoša monagano wa gagwe gomme a kgopela Victoria gore ba nyalane. Eupša go hlokomela leseana la bona la mošemanyana go be go bonagala go le boima. Victoria o hlalosa ka gore: “Re be re se na koloi, re se na tšhelete, re e-na le diaparo tše sego kae, gomme dilo ka moka tšeo re bego re e-na le tšona di be  di se kae. Bill o be o e-na le mošomo wo o mo lefago mogolo o monyenyane gomme re dula ka ngwakong woo re bego re o lefelela rente ya tlasana, eupša re ile ra kgotlelela.”

Ba bangwe le bona ba ile ba lebeletšana le maemo a thata ka baka la boimana bjo bo sa rulaganyetšwago. Lega go le bjalo, le bona ba ile ba gana go ntšha mpa. Ke’ng seo se ba kgontšhitšego go dira phetho e bjalo le go lebeletšana le kgateletšego ya go godiša ngwana yoo ba bego ba sa mo nyake goba yo ba bego ba se ba rulaganyetša go ba le yena? Ba thušitšwe ke bohlale bjo bo tšwago Beibeleng.

Phema Lepotlapotla —Dira Dithulaganyo tše Šomago

Beibele e bolela ka bohlale gore: “’Kêlêllô tša serôtô di iša mokhoreng; e a pôtlakaxo ó y’o hlôka.”—Diema 21:5.

Go Connie, mmago bašemanyana ba bararo, go akaretša le yo a bego a golofetše, kgopolo ya go ba le ngwana yo mongwe e be e bonagala e le boima. O boletše gore: “Re be re sa nyake ngwana yo mongwe yo a bego a tlo oketša pitša. Ka gona re ile ra nagana go ntšha mpa.” Eupša pele a ka dira phetho ka lepotlapotla, o ile a tšhollela Kay, mošomi-gotee, sa mafahleng. Kay o ile a mo thuša go lemoga gore o be a rwele motho yo a sego a hlwa a belegwa, e lego seo se ilego sa mo thuša go fetoša monagano wa gagwe.

Lega go le bjalo, Connie o be a nyaka thušo e šomago ya go loga leano. Ka ge Connie a be a e-na mmamogolo’agwe yo a bego a dula lefelong leo, Kay o ile a šišinya gore Connie a ikgokaganye le yena. Ge a se na go ikgokaganya le yena, mmamogolo’agwe o ile a thabela go mo thuša. Go oketša moo, monna wa Connie o be a fela a šoma mešomo e oketšegilego, gomme ba ile ba hwetša lefelo la bodulo leo le sa bitšego kudu. Ka go rialo, ba ile ba kgona go hlokomela ngwana yo yo mofsa.

Kay gape o ile a thuša Connie gore a ikgokaganye le mekgatlo ya go thuša batho bao ba imilego ba sa ikemišetša. Dinageng tše dintši, go na le mekgatlo e bjalo yeo e thušago bo-mma ba se nago sa bona. Inthanete goba dipuku tša dinomoro tša megala, tšeo gantši di hwetšwago makgobapukung a mantši a batho bohle, di dirišwa bakeng sa go nyaka mekgatlo e bjalo. Go tsoma thušo go ka nyaka maiteko a magolo, eupša “’kêlêllô tša serôtô” ke tšona tšeo di atlegago.

Amogela Gore bjo ke Bophelo bja Motho

Beibele e re: “Yo bohlale ò ne mahlô mo hloxong ya xaxwe; xe e le setlatla se sepela lefsifsing.”—Mmoledi 2:14.

Mosadi yo bohlale e le ka kgonthe ga a hlokomologe seo e lego therešo gomme a “sepela lefsifsing.” O diriša ‘mahlo a lego mo hlogong ya gagwe,’ ao ge e le gabotse a fepago matla a gagwe a tlhaologanyo. Se se dira gore ka mo go nepagetšego a kgone go bona ditla-morago tša ditiro tša gagwe. Ka go rialo, ka go fapana le yo a hlokomologago therešo ya seo se diregago ka popelong ya gagwe, mosadi yo bohlale o dira dilo ka kwelobohloko e le gore a šireletše ngwana yo a sa dutšego a bopega ka go yena.

Stephanie, ngwanenyana yo a imilego yo a bego a nagana go ntšha mpa, o ile a bontšhwa seswantšho sa ngwana wa gagwe wa dikgwedi tše pedi yo a sa lego ka teng ga gagwe. Stephanie o itše: “Ke ile ka lla. Ke ile ka ipotšiša gore: Ke ka baka la’ng nka nyaka go bolaya selo se se phelago?”

Kgarebe e nngwe ya moimana yeo e sego ya nyalwa, e bitšwago Denise, le yena o ile a se hlokomologe therešo ya gore o rwele motho yo a phelago ka go yena. Ge lesogana la gagwe le be le mo nea tšhelete gomme le mmotša gore “ntšha mpa yeo,” Denise o ile a araba ka gore: “Ke ntšhe mpa? Nka se tsoge ke dirile selo se bjalo!” Ka go rialo o ile a gana go bolaya ngwana wa gagwe.

Seo go Boifa Batho go ka se Dirago

Ge ba tutueletšwa go ntšha mpa, bao ba ka thomago ka go nyaka go ntšha mpa ba ka dira ka bohlale ge ba ka naganišiša ka seema sa Beibele se se rego: “Go boifa batho go ka go wetša mathateng,  eupša ge e ba o bota MORENA, o tla phologa.”—Diema 29:25, New Century Version.

Monica wa nywaga e 17 o ile a imišwa ke lesogana la gagwe gatee-gatee ge a be a swanetše go thoma go tsena sekolo sa tša kgwebo. Mmagwe, mohlologadi yo a nago le bana ba hlano, o ile a nyama kudu. O be a nyaka gore morwedi’agwe a ithute bokgoni bjo e le gore a tle a ba ntšhe bodiiding. Ka baka la tlalelo, mmagwe o ile a gapeletša gore Monica a ntšhe mpa. Monica o hlalosa ka gore: “Ge ngaka e be e mpotšiša gore na ke nyaka go tšwela pele ka go ntšha mpa, ke ile ka re ‘Aowa!’”

A ferekantšwe ke go bona bokamoso bjo bo holofetšago bja Monica bo felela sebaka-bakeng le go nagana ka kgateletšego yeo e tlago go bakwa ke go ba le ngwana yo mongwe, mmagwe o ile a mo raka ka gae. Monica o ile a kgona go yo dula le mmamogolo’agwe. Ka morago ga dibeke tše mmalwa, mmagwe o ile a phohliša maswafo gomme a mo dumelela go boa gae le gore a be le ngwana. Mmago Monica o ile a mo thuša go hlokomela Leon, ngwana wa gagwe, gomme o ile a rata mošemanyana yoo ka mo go tseneletšego.

Kgateletšo ya mosadi yo a nyetšwego yo a bitšwago Robin e be e e-tšwa mothopong o fapanego. Robin o boletše gore: “Ge ke be ke ima, ngaka ya-ka e be e nkalafa bolwetši bja dipshio pele e lekola ge e ba ke imile. Ke ile ka botšwa gore go be go e-na le kgonagalo e kgolo ya gore ngwana a belegwe a se a itekanela monaganong.” Ke moka ngaka e ile ya mo kgothaletša gore a ntšhe mpa. Robin o anegile ka gore: “Ke ile ka e hlalosetša pono ya Beibele ka bophelo. Ke ile ka e botša gore ke be nka se ntšhe mpa yeo le gatee.”

Gaešita le ge go tshwenyega ga ngaka e be e le mo go kwagalago, seo se be se sa bee bophelo bja Robin kotsing. * Robin o okeditše ka gore: “Ge morwedi wa-ka a be a belegwa gomme a hlahlobja, dipoelo di ile tša bontšha gore o be a se a itekanela ganyenyane feela e bile a e-na le mokokotlo o fokolago ganyenyane. O phela gabotse. Gona bjale o na le nywaga e 15, gomme tsela ya gagwe ya go bala e kaonefala le go feta. Ke mo rata kudu e bile ke leboga Jehofa gantši ka letšatši bakeng sa go mpha yena.”

Go Gwerana le Modimo go na le Matla

Beibele e re: “Jehofa o gwerana le bao ba mmoifago.”—Psalme 25:14, American Standard Version.

Seo se tutuetšago phetho ya ba bantši bao ba ganago go ntšha mpa ke go ela hloko kamoo Mmopi wa bona a ikwago ka gona ka taba ye. Seo ba tshwenyegilego kudu ka sona, ke go thabela bogwera le Modimo gotee le go dira seo se mo kgahlago. Go tshwenyega mo go bjalo ke gona go tutueditšego kudu Victoria, yo go boletšwego ka yena pejana. O boletše gore: “Ke na le tumelo e tiilego ya gore Modimo ke yena a neago bophelo le gore ga ke na tshwanelo ya go fediša bophelo bjoo a bo neilego.”

Ge Victoria a be a thoma go ithuta Beibele ka mo go tseneletšego, bogwera bja gagwe le Modimo bo ile bja gola. O boletše gore: “Go dira phetho ya go se ntšhe mpa go ntirile gore ke ikwe ke le kgaufsi  kudu le Modimo gwa ba gwa dira le gore ke nyake go mo kgahliša dikarolong ka moka tša bophelo bja-ka. Ge ke be ke mo kgopela tlhahlo ka thapelo, dilo di ile tša ntshepelela gabotse.”

Go gwerana le Modimo, Mothopo wa bophelo, go dira gore re hlomphe bophelo bjo bo lego ka popelong ka mo go tseneletšego. (Psalme 36:9) Go oketša moo, Modimo a ka nea “matla a fetago a tlwaelegilego” go thuša mosadi le lapa la gagwe go lebeletšana le boimana le ge e le bofe bjo bo sa rulaganyetšwago. (2 Bakorinthe 4:7) Ge ba lebelela morago, bao ba ilego ba bontšha go hlompha pono ya Modimo ka bophelo ba ikwa bjang ka phetho ya bona?

Ga ba Itshole

Batswadi ba ga ba tshwenywe ke maikwelo a go ipona molato goba maikwelo a sa felego a go nyama le a go lahlegelwa. Ge nako e dutše e e-ya, ba ile ba lebelela “kenyo ya mmele” e le mpho e le ka kgonthe, e sego thogako! (Psalme 127:3) Connie, yo go boletšwego ka yena pejana, o ile a lemoga se diiri tše pedi feela ka morago ga go belega! Ka lethabo, o ile a bitša mošomi-gotee le yena e lego Kay gomme a mmotša kamoo a bego a thabile ka gona ka go ba le tebelelo ya go godiša ngwana wa gagwe wa ngwanenyana. A e-tšwa megokgo ya lethabo, Connie o ile a oketša ka gore: “Ke therešo e le ruri gore Modimo o šegofatša bao ba dirago seo se mo kgahlago.”

Ke ka baka la’ng go dira dilo ka go dumelelana le pono ya Modimo ka bophelo go e-na le mohola? Ka gobane bjalo ka Mothopo wa bophelo, Modimo o ngwadile melao le ditekanyetšo tša gagwe ka Beibeleng gore ‘re letlege.’—Doiteronomio 10:13.

Go ya ka Victoria le Bill, bao phihlelo ya bona e lego mathomong a sehlogo se le sehlogong sa mathomo, phetho ya go se ntšhe mpa e ile ya fetola maphelo a bona. Ba e hlalosa ka tsela ye: “Re be re lemaletše dihlare-tagi kudu gomme nkabe re hwile ge re be re ka tšwela pele re di diriša. Eupša go hlompha bophelo bja ngwana wa rena yo a sego a hlwa a belegwa go ile gwa re dira gore re kgaotše gomme re naganišiše ka maphelo a rena. Ka thušo ya Dihlatse tša Jehofa, re ile ra fetoga.”

Lance, morwa wa bona, gona bjale o na le nywaga e nyakilego go ba e 34 gomme o na le nywaga ya ka godimo ga e 12 a nyetše. Lance o hlalosa ka gore: “Go tloga bjaneng, batswadi ba-ka ba ile ba nthuša go dira diphetho tšeo di theilwego Beibeleng. Se se hotše nna, mosadi wa-ka le ngwana wa-ka go fihla bokgoleng bja go lemoga gore re thabile ka baka la seo.” Tatagwe, yo mathomong a bego a nyaka gore Victoria a ntšhe mpa, o boletše gore, “Re nyama kudu ge re lemoga bokgole bjoo re fihlilego go bjona bja go se be le morwa wa rena yo mobotse.”

Ela hloko gape Monica, yo a ilego a gana go ntšha mpa go sa šetšwe kgateletšo ya mmagwe. O bega gore: “Dibeke tše pedi ka morago ga go belegwa ga morwa wa-ka, yo mongwe wa Dihlatse tša Jehofa o ile a ikgokaganya le nna gomme ka ithuta kamoo nka dumelelanyago bophelo bja-ka ka gona le melao ya Modimo. Kapejana ke ile ka thoma go ruta morwa wa-ka Leon bohlokwa bja go kwa Modimo, gomme ge nako e dutše e e-ya o ile a rata Jehofa kudu. Gona bjale Leon ke mohlanka wa mosepedi wa Dihlatse tša Jehofa.”

Ge a nagana ka seo mmagwe a se dirilego, Leon o boletše gore: “Go tseba gore o be nthata kudu moo a ilego a ntumelela gore ke phele go sa šetšwe kgateletšo yeo a bego a le ka tlase ga yona go ntirile gore ke nyake go diriša bophelo bja-ka gakaone-kaone kamoo nka kgonago go bontšha Modimo tebogo ya-ka bakeng sa mpho ye e kgahlišago.”

Ba bantši bao ba ilego ba kwešiša pono ya Modimo ka bophelo ga ba itshole ka phetho yeo ba e dirilego ya go phološa bophelo bja ngwana yoo ba mo ratago kudu gona bjale. Ba ka bolela go tšwa pelong e tletšego tebogo gore, “Ga se ra ntšha mpa!”

[Mongwalo wa tlase]

[Seswantšho go letlakala 7]

Go bona seswantšho sa ngwana wa gagwe wa dikgwedi tše pedi yo a lego ka teng ga gagwe go ile gwa thuša Stephanie go dira phetho

(mothaladi ga se karolo ya seswantšho)

[Seswantšho go letlakala 8]

Victoria le Lance

[Seswantšho go letlakala 8, 9]

Victoria le Bill lehono ba e-na le Lance le lapa la gagwe

[Seswantšho go letlakala 9]

Monica le morwa wa gagwe Leon ba leboga kudu gore o ile a ganetša kgateletšo ya go mo mmolaya nywaga e 36 e fetilego