Pono ya Beibele

Na o Swanetše go Boifa Bahu?

Ditho tša setšhaba sa Annang kua Nigeria di dumela gore ge e ba bahu ba sa bolokwe ka hlompho le kgodišo e swanetšego, meoya ya bona e tla tlišetša ditho tša lapa mathata—go akaretša le lehu. Ma-China a mangwe le ona a dumela gore ge e ba meetlo ya go boloka bahu e sa latelwe, meoya ya bahu e tla hlasela gaešita le go bolaya batho ba bangwe.

TUMELO ya gore ge motho a e-hwa go na le selo seo se tlogelago mmele—moya (soul), moya (spirit), sepoko—ke e tlwaelegilego ditšong tše dintši lefaseng ka bophara. Batho ba bantši gape ba dumela gore moya (soul) goba moya (spirit) o ka tsena gare ditaba tša ditho tša lapa goba tša bagwera.

Lega go le bjalo, na ruri go na le selo seo se tšwelago pele se phela ka morago ga gore motho a hwe? Le gona, na sona selo seo se ka gobatša bao ba phelago? Pono ya Beibele ke efe?

Na Bahu ba a kwa?

Beibele e bolela gore go bahu “xa xo se se tsebyaxo.” Le gona e bolela gore bahu ke “ba se nago matla.” (Mmoledi 9:5; Jesaya 26:14, NW) Ge le bolela mabapi le motho wa pele e lego Adama, Lentšu la Modimo le hlalosa gore: “Morêna Modimo a na a bopa motho, lerole la mmu; mo dinkong tša xaxwe a budulêla môya wa bophelô, motho a napa a ba môya o phelaxo.”—Genesi 2:7.

Ela hloko gore Adama o bopilwe e le moya (soul), ke gore, motho yo a phelago. Go ya ka Beibele, Adama ga se a newa moya (soul) woo o bego o ka phela ka ntle le mmele wa gagwe. Ka gona, ge Adama a be a dira sebe, o ile a hwa. O ile a ba “mohu,” goba moya o hwilego. (Numeri 6:6) Beibele gape e re: “Moya o senyago ona o tlo hwa.” (Hesekiele 18:4, PK) Ka moka ga rena re abetše sebe goba go se phethagale go tšwa go motho wa pele, Adama. Ka gona, ge re e-hwa, moya (soul) o a hwa.—Baroma 5:12.

Ge Beibele e hlalosa boemo bja bahu, ga e diriše mantšu a sa kwešišegego, eupša e diriša mantšu ao re ka a kwešišago, a bjalo ka go “robala boroko bja lehu.” (Psalme 13:4, PK) Jesu o kile a bolela mabapi le ngwanenyana wa nywaga e 12 gore: “Ga se a hwa, eupša o robetše.” Batho ba ile “ba thoma go mo sega ka lenyatšo, gobane ba be ba tseba gore o hwile.” Lega go le bjalo, Beibele e hlalosa gore Jesu o mo tsošitše borokong bja lehu.—Luka 8:51-54.

Go diregile se se swanago ge Latsaro a be a e-hwa. Jesu o boditše barutiwa ba gagwe gore o be a etela Latsaro “go yo mo tsoša borokong.” Barutiwa ba be ba sa kwešiše seo Jesu a bego a se bolela, ka gona “Jesu a re go bona ka go lebanya: ‘Latsaro o hwile.’” Moapostola Paulo le yena o ile a bolela ka ‘bao ba robetšego lehung’ gomme o boletše gore ka nako e swanetšego ya Modimo, ba tla bušetšwa bophelong.—Johane 11:11-14; 1 Bathesalonika 4:13-15.

Se se lemogegago ke gore ga go na moo Beibele e rutago gore moya (soul) o tšwela pele o phela ge motho a e-hwa. Ka gona, ga go na lebaka la gore re boife bahu. Bjale, ke’ng seo se bakilego tumelo e tlwaelegilego ya gore karolo e nngwe ya motho e tšwela pele e phela ka morago ga lehu? Le gona, ke’ng seo se dirilego gore go be le poifo ya gore bahu ba ka gobatša bao ba phelago?

Maaka—Bofora

Bodumedi bja maaka bo godišitše kgopolo ya gore ge motho a e-hwa, ge e le gabotse ga a hwe. Mathomong a histori ya batho, thuto ya go se hwe ga moya e ile ya amogelwa lefaseng ka bophara. Ka baka leo, ge babuši ba bangwe ba e-hwa—ba bjalo ka Farao wa Egipita ya bogologolo—makgoba a bona a be a bolawa e le gore a ka kgona go ba hlankela nakong e tlago ya bophelo bja bona.

 Batho ba bantši ba ile ba tshwenywa ke seo ba dirilwego gore ba dumele gore ke meoya (souls), goba meoya (spirits), ya bahu. Ba kgodišegile gore go tlaišwa moo go tšwa go meoya e sa thabago ya ba leloko bao ba hwilego le ba bangwe. Lega go le bjalo, ka ge Mangwalo a bontšha ka mo go kwagalago, se ga se therešo. Madira a sa bonagalego a moya ao a bitšwago batemona ke ona a bakago ditlhaselo tše bjalo, e bile a thabela go tshwenya le go tšhoša batho.—Luka 9:37-43; Baefeso 6:11, 12.

Mangwalo a bolela ka Sathane e le “tatago maaka,” yo ‘a dulago a itira morongwa wa seetša.’ Yena le batemona ba gagwe ba ‘timetša lefase ka moka le go agilwego go lona.’ (Johane 8:44; 2 Bakorinthe 11:14; Kutollo 12:9) Ge e le gabotse, Sathane ke yena a thomilego maaka a gore moya ga o hwe le gore o ka gobatša ba phelago.

Lega go le bjalo, bao ba dumelago Beibele ba šireleditšwe maakeng a bjalo. Ba tseba therešo ka maiteko a Sathane a go fora batho ka go dira gore ba dumele gore bahu ba ka boledišana le bao ba phelago. Taba ke gore, bjalo ka ge Beibele e bolela: “Ba ba phelaxo ba tseba xore ba tlo hwa; ’me xo bahu xa xo se se tsebyaxo, xa ba sa newa selô, xobane ba lebetšwe.” (Mmoledi 9:5) Ee, Lentšu la Modimo le hupere ditherešo tšeo di re lokollago tša mabapi le boemo bja bahu!—Johane 8:32.

NA O KILE WA IPOTŠIŠA?

▪ Na go na le seo bahu ba se kwago?—Mmoledi 9:5; Jesaya 26:14.

▪ Ke’ng seo se bakilego tumelo e tlwaelegilego ya gore karolo e nngwe ya motho e tšwela pele e phela ka morago ga lehu?—Johane 8:44.

▪ Ke kae moo re ka hwetšago therešo mabapi le boemo bja bahu? —Johane 8:32; 17:17.

[Ntlhakgolo go letlakala 19]

Dibopiwa tše kgopo tša moya, e sego bahu, di rata go tlaiša batho