Nea Bana ba Gago Mathomo-mayo a Mabotse Bophelong

KA MONGWADI WA PHAFOGA! KUA CANADA

▪ Kuranta ya The New York Times e bega gore: “Thelebišene e ka ba sedirišwa se se kgahlišago sa go ithuta. Lega go le bjalo, “go fo dula pele ga thelebišene diiri tše dintši go ba le mafelelo a sa kgahlišego mebeleng le menaganong ya bana,” go ba amoga dibaka tša go ka ba le bokgoni bja go hlama dilo, go ithuta le go dirišana le batho.

Kuranta yeo e bega gore, ka morago ga go ithuta mekgwa ya bana ba 2 500 ya go bogela thelebišene, banyakišiši ba Sepetleleng sa Bana sa Seattle, Washington, U.S.A., “ba hweditše gore ge masea a ngwaga o tee go ya go e meraro ba bogela thelebišene kudu, ba ba kotsing e kgolo ya go ba le mathata a go tsepamiša kgopolo ge ba e-na le nywaga e šupago.” Bana ba bjalo ba be ba le bogale kudu e bile ba fela pelo o šoro gomme ba sa kgone go tsepamiša kgopolo nako e telele. Go ya ka setsebi sa tša thuto e lego Dr Jane M. Healy, “batswadi ba bantši ba bana bao ba nago le tšharakano ya go se kgone go tsepamiša kgopolo ba hweditše gore bothata bo kaonefala kudu ge ba ba amoga ditokelo tša go bogela thelebišene.”

Batswadi ba ka dira’ng go fokotša nako yeo bana ba bona ba e fetšago ba bogetše thelebišene? Pego e nea ditšhišinyo tše di latelago: Lekanyetša gore ke neng le gona ke nako e kaaka’ng yeo ngwana wa gago a ka e fetšago a bogetše thelebišene letšatši le lengwe le le lengwe. Phema go diriša thelebišene bjalo ka moledi. Go e na le moo, akaretša ngwana wa gago gantši kamoo go ka kgonegago ge o dira mešomo ya ka gae. Kgetha mananeo ao ngwana wa gago a ka a bogelago gomme o time thelebišene ge mananeo ao a fela. Ge e ba go kgonega, bogela mananeo ao le ngwana wa gago gomme o bolele ka seo o se bonago. Mafelelong, lekanyetša nako ya gago ya go bogela thelebišene.

Go godiša bokgoni bja bana bja go hlama dilo le bja go dirišana gabotse le batho go tšea nako, boikemišetšo gotee le boitayo. Mafelelo a mabotse a nyaka maiteko. Se se hlatselwa ke seema sa bogologolo seo se rego: “Ngwana mo eteletše tsela y’axwe; ké mo a tl’o xo tšofala à sa ka a e lahla.” (Diema 22:6) Karolo e bohlokwa kudu ya tlwaetšo e bjalo e akaretša go ruta bana ditekanyetšo tše di swanetšego tša boitshwaro.

Dihlatse tša Jehofa ka katlego di diriša puku ya tšona ya Ithute go Morutiši yo Mogolo go tiišetša dithuto tša boitshwaro bjo bo amogelegago baneng ba bona. Ee, poledišano e botse le tlhokomelo e lerato tša batswadi ge ngwana e sa le yo monyenyane di tla ba le meputso e swarelelago. Ke’ng seo se ka kgotsofatšago kudu go feta ge batswadi ba bona bana ba bona ba gola gomme ba e-ba batho bao ba hlomphegago le ba nago le boikarabelo?