Tshwanelo ya Molwetši ya go Ikgethela

KA MONGWADI WA PHAFOGA! KUA ITALY

▪ Dihlatse tša Jehofa di gana tšhelo ya madi. Go gana mo go theilwe melaong ya Beibele, yeo wa pele-pele wa yona o rego: “Fêla, Le se kê la ja nama e naxo le bophelô bya yôna, e lexo madi a yôna.” Bakriste ba lekgolong la pele la nywaga ba ile ba fo botšwa gore: “Le dule le ila . . . madi.”—Genesi 9:4; Ditiro 15:29; Lefitiko 17:14.

Kua Monterenzio, Italy, bana ba sekolo se se phagamego ba ile ba kgopelwa gore ba ngwale taodišo mabapi le bohlokwa bja go neela ka madi. Yo mongwe wa barutwana bao e be e le Benedetta, yo mongwe wa Dihlatse tša Jehofa, yo a ngwadilego se se latelago:

“Go tloga go tsebja gore Dihlatse tša Jehofa di gana tšhelo ya madi ka baka la go kgomarela melao ya motheo ya Beibele, eupša se ga se bolele gore di gana mekgwa e mengwe ya tša kalafo. Ge e le gabotse, Dihlatse tša Jehofa di tšeela godimo boemo bja tšona bja tša maphelo. Di katanela go hwetša tlhokomelo e kaone-kaone ya tša maphelo bakeng sa tšona le bana ba tšona. Di tloga di ikemišeditše go dirišana le dingaka, ge feela di hlompha ditumelo tša tšona.”

Ke moka Benedetta o ile a oketša ka gore: “Molwetši yo mongwe le yo mongwe o na le tshwanelo ya go kgetha kalafo yeo a dumelago gore ke e kaone-kaone, tshwanelo ya go hlompšha, le tshwanelo ya go tseba dikotsi le mehola ya kalafo yeo a kgethago go e amogela.”

Lekala la Monterenzio la AVIS (Association of Italian Blood Donors) le ile la putsa barutwana bao ba kgonnego go ntšha sa mafahleng a bona mabapi le taba yeo gakaone-kaone. Pego e lego ka makasineng wa Monterenzio Vivace e boletše gore: “Go ile gwa bolelwa ka mo go kgethegilego ka Benedetta Barbi ka baka la taodišo ya gagwe yeo e bego e e-na le pono e fapanego—yeo dikagare tša yona di fapanego kudu le boemo bja AVIS tabeng ye—eupša yeo ka yona morutwana a ilego a kgona go hlalosa ditumelo tša gagwe ka tsela e nago le teka-tekano le e botho.”

Gaešita le ge Dihlatse tša Jehofa di “e-na le pono e fapanego” tabeng ya madi, dingaka tše dintši gona bjale di bona bohlokwa bja boemo bja tšona. Boemo bja Dihlatse e bile selo se segolo seo se dirilego gore go be le ditsela tše mpsha tša tša kalafo tšeo di fokotšago tahlegelo ya madi nakong ya go buiwa. Se se feleleditše ka go hola balwetši ba Dihlatse le bao e sego Dihlatse. Lega go le bjalo, lebaka le legolo la gore Dihlatse tša Jehofa di gane go tšhelwa madi le theilwe ka mo go tiilego Beibeleng, bjalo ka ge go boletšwe matsenong.

Ge Dihlatse tša Jehofa di etela legaeng la gago nakong e tlago, o reng o sa di botšiše mabapi le pono ya Mmopi ka madi? Di ka thabela go ahla-ahla taba yeo le wena, e bile di ka dira bjalo ka “tlhompho e tseneletšego.”—1 Petro 3:15.

[Box/​Picture on page 30]

TSEBIŠO E OKETŠEGILEGO

Ka thušo ya ditsebi tše di tumilego, DVD ya Transfusion Alternatives e utolla melao ya motheo ya tša kalafo, tša molao, le ya tša boitshwaro yeo e dikologilego ditsela tše dingwe tšeo di ka dirišwago ntle le tšhelo ya madi. E ka hwetšwa go Dihlatse tša Jehofa.