Go Swara ka go Tia Seatla sa Modimo sa le Letona

▪ Jezreel wa kua Mexico o ile a belegwa a e-na le bolwetši bjo bo sa tlwaelegago bja letlalo bjo bo bitšwago congenital lamellar ichthyosis. Bo feleleditše ka go mo dira gore a tšwe magapi le go dira gore dikarolo tše dintši tša mmele wa gagwe di be le letlalo le thata. Jezreel o hlalosa ka gore: “Se se dira gore ke be le ponagalo e sa kgahlišego, eupša bolwetši bjo ga bo fetele.”

Go tloga ge Jezreel e sa le yo monyenyane, o ile a hwetša tlhokomelo ya tša maphelo dipetleleng tše di fapa-fapanego. Ge a be a e-na le nywaga e mebedi, o ile a bewa lefelong leo le lego lekatana sepetlele e le ge ba be ba re ba phema ditwatši. Lega go le bjalo, ga go seo se ilego sa kaonefatša letlalo la gagwe. O ile a fiwa kalafo ya tša monagano e le gore a kgone go lebeletšana le maikwelo a go se amogelwe.

Batho bao ba dumelago gore bolwetši bja Jezreel bo a fetela gantši ba a mo katoga. Se se ile sa mo thatafišetša bophelo kudu-kudu ge e be e sa le ngwana gomme a nyaka go bapala le bana ba bangwe. O bolela gore, “Ba be ba tla nkwera le go mpitša ka maina a kwešago bohloko a bjalo ka la Setopo se se Gwamilego le la Motšwa-polaneteng-e-nngwe.”

Ka lehlakoreng le lengwe, go ba le bolwetši bjo bja letlalo go file Jezreel dibaka tša go bolela le batho ba bangwe ka kholofelo ya gagwe e theilwego Beibeleng. Gantši batho ba mmatamela gomme ba mmotšiša ge e ba a ile a fsa. Ge a re aowa, ba mmotšiša sebaki sa ponagalo ya gagwe. O hlalosa bolwetši bja gagwe bja letlalo gomme o ba botša gore ga bjale ga go na pheko e tsebjago.

Ke moka o oketša ka gore, “Ke na le kholofelo e kgolo ka gobane Jehofa Modimo o holofetša gore bao ba kwago melao ya gagwe ba tla phela lefaseng le lefsa leo le se nago malwetši le bohloko.” (Kutollo 21:3, 4) Go boledišana le ba bangwe ka boemo bja gagwe go dirile gore Jezreel a kgone go thoma dithuto tša Beibele le batho, gomme o ile a thabela go bona ba bantši ba bona ba fetoga barapedi-gotee le yena ba Modimo.

Jezreel o re: “Ke leboga gore ke belegetšwe ka lapeng la Bakriste le gore bjalo ka yo mongwe wa Dihlatse tša Jehofa, ke na le bagwera ba kgaufsi. Ga go le o tee wa bona yoo a ntlhokomologago ka baka la ponagalo ya-ka. Ke kolobeditšwe ke e-na le nywaga e 17, gomme nywaga e 14 ga e sa le go tloga ka nako yeo, ke ile ka hwetša ditokelo tše dintši tša tirelo tša go hlankela Mmopi wa rena.”

Jezreel o dula a gopola mantšu a Jehofa a kgothatšago a lego go Jesaya 41:10, 13 (NW), a balegago ka gore: “O se ke wa boifa, gobane ke na le wena. . . . Ruri ke tla go swara ka go tia ka seatla sa-ka sa le letona sa toko. Ka gobane nna Jehofa Modimo wa gago ke go swere ka seatla sa-ka sa le letona, Yena yo a rego go wena, ‘O se ke wa boifa. Ke tla go thuša.’”

Go swara ka go tia seatla sa Jehofa sa le letona go thušitše Jezreel go fenya go tshwenyega kudu ka yena gotee le go lebeletšana le mathata ao a tswalanago le bolwetši bjo. Gotee le batho ba bangwe ba dimilione, o letetše phethagatšo ya kholofetšo e kgolo ya Modimo.