Go Swarwa Bjalo ka Motho yo a sa Rego Selo

“Ngwageng wa-ka wa mathomo sekolong sa mephato ya tlase kua Sepania, bana ba bangwe ka klaseng ya-ka ba be ba dula ba mpitša ka maina a dikwero, ka ge ke be ke le yo mokopana go ba feta. Ke be ke boela gae ke lla mo e nyakilego go ba letšatši le lengwe le le lengwe.”—Jennifer, morwedi wa bafaladi ba ma-Philippine.

“Ge ke be ke hudugela sekolong se sefsa, barutwana-gotee ba bašweu ba be ba mpitša ka maina a go rogana. Ke be ke tseba gore ba be ba nthumola. Lega go le bjalo, ke ile ka kgona go laola kgalefo ya-ka ka tsela e itšego—eupša ka gare ke ile ka kwa bohloko le go ikwa ke sa ratwe.”—Timothy, motho-moso wa Amerika.

“Ge ke be ke e-na le nywaga e šupago, ma-Igbo le ma-Hausa kua Nigeria a be a thulana. Lehloyo leo le ile la ntutuetša gomme ke ile ka thoma go kwera yo mongwe ka klaseng ya-ka yo e bego e le mo-Hausa, gaešita le ge e be e le mogwera wa-ka.”—John, setho sa morafo wa ma-Igbo.

“Nna le moromiwa-gotee le nna re be re bolela le baagišani ba rena ka molaetša wa Beibele ge bana, bao ba bego ba tutueleditšwe ke moruti wa moo, ba be ba thoma go re šala morago le go re foša ka mafsika. Moruti yoo o be a nyaka gore re tloge moo motseng.”—Olga.

NA O kile wa lebeletšana le go hloka seriti ga kgethollo e bontšhago go hloka toka, yeo e theilwego go bebeng sefahlego? Mohlomongwe e be le ka baka la mmala wa letlalo la gago, bodumedi bja gago, maemo a gago a tša boiphedišo, bong bja gago, goba gaešita le nywaga ya gago. Bao ba dulago ba swarwa ka tsela e bontšhago kgethollo gantši ba dula ba tšhogile go swarwa ka tsela yeo e mpe gape. Ge ba feta sehlopha sa batho, ba tsena ka lebenkeleng, ba hudugela sekolong se sefsa, goba ba e-ya moletlong wa boithabišo, ba ka ikwa ba imelwa ke dipelaelo.

Go oketša moo, bahlaselwa ba go beba sefahlego le kgethollo ba ka ba le mathata a go hwetša mošomo, goba ba ka hwetša tlhokomelo ya maemo a tlase ya tša maphelo, thuto e nyatšegago, gotee le ditokelo tše sego kae setšhabeng le ditshwanelo tše sego kae tša tša molao. Ge e kgothaletšwa ke bao ba nago le matla a taolo, kgethollo e ka lebiša bobeng bjo bo swanago le go fsielelwa ga morafo le polao ya molokwana-rite. Mohlala wa bogologolo wa maiteko a polao ya molokwana-rite o hwetšwa ka pukung ya Beibele ya Esitere. Ela hloko tema yeo e kgathwago ke lehloyo le go beba sefahlego.—Esitere 3:5, 6.

Go hloka kgotlelelo go ka tšwela pele gaešita le moo go nago le melao yeo e lego kgahlanong le kgethollo. Yo e kilego ya ba Mokomosasa yo Mogolo wa Ditshwanelo tša Batho wa Ditšhaba tše Kopanego o re: “Nywaga-some e tshela ka morago ga go amogelwa ga Boipolelo bja Kakaretšo bja Ditshwanelo tša Batho . . . , melao ya motheo ya go lekana ga batho le go hloka kgethollo e sa dutše e sa latelwe.” Seo ga se kgahliše ka gobane go hudugela nageng e nngwe le go ba gona ga bafaladi ba bantši go fetošitše dipalo-palo tša dinaga tše dintši.

Ka baka leo, na go ba gona ga setšhaba seo se se nago kgethollo ke toro feela? Goba na go beba sefahlego le kgethollo di ka fenywa? Dihlogo tše di latelago di araba dipotšišo tše.