Pono ya Beibele

Na Batho ba Babe ba tla fsa Diheleng?

GERTRUDE, yo e lego moruti wa Pentekoste, o be a kgomaretše ka go tia tumelo ya gagwe ya dihele tše tukago. Kgopolo ya gore go ka direga gore lefelo le bjalo ga le gona e be e thulana le kwešišo ya gagwe ya mabapi le toka. O be a bea mabaka ka gore ntle le mollo wa dihele, mehuta ka moka ya bosenyi bjo šoro e ka se hwetše kotlo. Gertrude o ile a dula a tiile tumelong ya gagwe. O itše, “Ga ke nagane gore ke be ke tla nyaka go hlankela Modimo ge e ba go be go se na mollo wa dihele bakeng sa ba kgopo.”

Na batho ba babe ba tla fsa diheleng, bjalo ka ge madumedi a mantši a ruta? Ge e ba go se bjalo, gona ba tla hwetša kotlo efe?

Kotlo ya Pele e Tšwago go Modimo

Go ya ka Beibele, Modimo o bopile batho ba babedi ba pele ba phethagetše. (Genesi 1:27; Doiteronomio 32:4) O ile a ba bea serapeng sa paradeise gomme a ba nea sebaka sa go phela ka mo go sa felego. Lega go le bjalo, batho ba pele e lego Adama le Efa, ba be ba thibetšwe selo se tee. Modimo o ba lemošitše ka gore: “Dihlare ka moka tša thšemo yé O ka di ja. Fêla, sehlare sa xo tseba botse le bobe sôna O se kê wa se ja; ka xobane mohla ò tl’o xo se ja O tlo hwa lehu.”—Genesi 2:16, 17.

Ka manyami, batswadi ba rena ba pele ba ile ba palelwa ke teko yeo e bonolo ya potego le go kwa. Mmopi o ile a swanelwa ke go ba ahlolela lehu. “Boxôbê O tlo bo ja ka dikudumêla tša sefahloxô sa xaxo; wa bá wa boêla mmung; ka xobane O nthšitšwe mmung; O lerole; ’me sa xaxo ké xo boêla leroleng.”—Genesi 3:19.

Ge e ba Adama le Efa ba be ba le kotsing ya go fsa diheleng, na Modimo o be a ka se ba lemoše  ka kotlo e bjalo? Ge e le gabotse, ga se a ka a bolela selo mabapi le tlaišo ya ka morago ga lehu. Ba be ba ka tlaišega bjang? Ba be ba se na moya o sa hwego wo o bego o tla phologa lehu. Beibele e bea taba ye gabotse ge e re: “Moya o senyago ona o tlo hwa.”—Hesekiele 18:4, PK (mongwalo o sekamego ke wa rena). *

Ka ge e le Monei wa bophelo, Mmopi wa rena o tseba sohle mabapi le bophelo le lehu. O re botša ka Lentšung le gagwe gore, “xo bahu xa xo se se tsebyaxo.” (Mmoledi 9:5) Ke ka baka leo Adama le Efa ba sa kago ba tlaišega mollong wa dihele ka morago ga lehu la bona. Ba ile ba fo boela leroleng gomme ba kgaotša go ba gona. Go be go “se se tsebyaxo” go bona.

Na re ka Tlaišega ka Morago ga Lehu?

Beibele e bolela go Baroma 5:12 gore: “Ka motho o tee sebe se tsene lefaseng, gomme lehu la tsena ka sebe, ka baka leo lehu le aparetše batho bohle.” Ka gona ge, na ruri go a kwagala go dumela gore batho ba tlaišega mollong wa dihele ka baka la dibe tša bona, mola Adama, yena yo a tlišitšego lehu molokong ka moka wa batho, a ile a fo fetoga lerole ka morago ga lehu?—1 Bakorinthe 15:22.

Ka moka ga rena re ka tlase ga molao woo Adama a bego a le ka tlase ga wona. “Moputso woo sebe se o lefago ke lehu.” Go feta moo, ge motho a e-hwa, o “hunologile sebeng sa gagwe.” (Baroma 6:7, 23) Ge e ba batho ba lokilego le ba babe ba sa tlaišege ka morago ga lehu, gona Modimo o bontšha bjang toka ya gagwe?

Toka ya Modimo

Morero wa Modimo bakeng sa batho ba kwago ga se wa fetoga go tloga ge a bopa balekane ba pele gomme a ba laela gore ba be le bana le go hlokomela lefase. (Genesi 1:28) Go molaleng gore wo e sa dutše e le morero wa gagwe, ka ge a ile a bolela ka morago gore: “Baloki e ba beng ba naxa, ba dula mo xo yôna ka mehla le ka mehla.”—Psalme 37:29.

Ela hloko gore baloki ba tla phela lefaseng lona le. Ba tla ba le bophelo bjo bo phethagetšego le lethabo. Morero wa Modimo wa mathomong wa gore lefase le tlale ka batho ba lokilego ruri o ‘tlo phethagala.’ Se se tlo phethagala ge a dira gore tshepedišo ye e kgopo ya dilo e tšeelwe legato ke lefase le lefsa.—Jesaya 55:11; Daniele 2:44; Kutollo 21:4.

Batho ba dimilione tše dikete bao ba hwilego ba sa tsebe ditekanyetšo tša Modimo ba tla tsošwa bahung gomme ba hwetša ditaelo tša bophelo lefaseng le lefsa la Modimo. (Jesaya 11:9; Johane 5:28, 29) Ka lehlakoreng le lengwe, motho le ge e le ofe yo a ganago go dira ka go dumelelana le melao ya Modimo o tla otlwa ka “lehu la bobedi.” Le ke lehu leo le se nago tsogo le ka mohla.—Kutollo 21:8; Jeremia 51:57.

Go molaleng gore bjalo ka Modimo yo lerato, Jehofa a ka se hlokofatše batho mollong wa dihele. (1 Johane 4:8) E bile a ka se dumelele bokgopo go ya go ile. Ge e le gabotse, Psalme 145:20 e re kgonthišetša gore “bohle ba ba mo rataxo ó ba hlôkômetše; ba babe bôná ó tlo ba fediša.” Na seo ga se bontšhe lerato le toka?

[Mongwalo wa tlase]

NA O KILE WA IPOTŠIŠA?

▪ Na re na le moya o sa hwego?—Hesekiele 18:4.

▪ Boemo bja bahu ke bofe?—Mmoledi 9:5.

▪ Modimo o tla otla ba kgopo bjang?—Psalme 145:20.

[Ntlhakgolo go letlakala 27]

“Xo bahu xa xo se se tsebyaxo.”—Mmoledi 9:5

[Mothopo wa Seswantšho go letlakala 26]

Photo: www.comstock.com