Bafsa ba a Botšiša

Nka Lebeletšana Bjang le go Hwelwa ke Motswadi?

“Ge mma a be a e-hwa ke ile ka ikwa ke lahlegile ka mo go feletšego gomme ke se na morero. E be e le yena yo a bego a momagantše lapa lešo.”—Karyn. *

KE DILO tše mmalwa feela bophelong tšeo di ka go kgomago kudu go feta lehu la motswadi. Ga se feela gore o tlo kgotlelela bohloko bjo bo tseneletšego bja go lahlegelwa eupša gape o lebeletšana le bokamoso bjo bo fapanego go feta bjoo o bego o bo letetše.

Mohlomongwe o be o duma gore mmago goba tatago yo a rategago a be gona ge mafelelong o hwetša lengwalo la go otlela goba o aloga sekolong goba gore a thabe le wena ka letšatši le lenyalo la gago. Ga bjale, ditebelelo tšeo di senyegile, tša go tlogela o nyamile, o gakanegile goba e bile o galefile. O ka lebeletšana bjang le maikwelo a fapa-fapanego ao a tlišwago ke go lahlegelwa ke motswadi ka lehu?

‘Na ke ga Tlhago go Ikwa ke Tsela ye?’

Ge mathomong o kwešiša gabotse gore mmago goba tatago o hlokofetše, o ka gapeletšega go lwantšhana le maikwelo a fapa-fapanego ao o sa kago wa ba le ona pele. Brian, yo a bego a e-na le nywaga e ka bago e 13 ge tatagwe a be a bolawa ke bolwetši bja pelo o re, “Bošegong bjo re kwelego ka bjona, seo re bego re ka kgona go se dira ke go lla le go gokarelana.” Natalie, yo a bego a e-na le nywaga e lesome ge tatagwe a be a bolawa ke kankere o gopola ka gore: “Ke be ke sa tsebe gore ke ikwe bjang. Ka gona, ga se ka kwa selo. Ke be ke se na maikwelo.”

Lehu le kgoma motho yo mongwe le yo mongwe ka tsela e fapanego. Ke therešo gore Beibele e re “yo mongwe le yo mongwe” o na le “mohlako wa gagwe le bohloko bja gagwe.” (2 Koronika 6:29, NW) O e-na le seo ka kgopolong, tšea motsotso o nagana kamoo lehu la batswadi ba gago le go kgomilego ka gona. Ka mo fase, hlalosa (1) kamoo o ilego wa ikwa ka gona ge o be o tseba ka lehu la motswadi wa gago ka lekga la pele le (2) kamoo o ikwago ka gona ga bjale. *

(1) ․․․․․

(2) ․․․․․

Mohlomongwe dikarabo tša gago di utolla gore  maikwelo a gago a a kaonefala, bonyenyane ka tekanyo e itšego. Se se tlwaelegile. Ga se bolele gore o lebetše motswadi wa gago. Ka lehlakoreng le lengwe, o ka hwetša gore maikwelo a gago a sa dutše a swana goba a oketšegile le go feta. Mohlomongwe bohloko bja gago bo tla bjalo ka maphoto ao a bonagalago a fokotšega le go elela ke moka a betha lebopo ka dinako tšeo o sa di letelago. Seo le sona se tlwaelegile—gaešita le ge se direga nywaga ka morago ga lehu la motswadi wa gago. Potšišo ke gore, O ka lebeletšana bjang le bohloko bja gago—go sa šetšwe gore bo tla ka tsela efe?

Ditsela tša go Lebeletšana le Bohloko

O se ke wa tšhaba go lla! Go lla go thuša go fokotša bohloko bja go nyama. Lega go le bjalo, o ka ikwa ka tsela yeo Alicia, yo a bego a e-na le nywaga e 19, a ilego a ikwa ka yona ge mmagwe a be a e-hwa. O anega ka gore, “Ke be ke nagana gore ge ke be nka lla kudu, bangwe ba be ba tla nagana gore ke hloka tumelo.” Eupša nagana: Jesu Kriste e be e le motho ya phethagetšego yo a bego a e-na le tumelo e tiilego go Modimo. Lega go le bjalo, o ile “a ntšha megokgo” ka baka la lehu la mogwera wa gagwe Latsaro. (Johane 11:35) Ka gona, o se ke wa tšhaba go ntšha megokgo. Seo ga se bolele gore o hloka tumelo! Alicia o re: “Mafelelong, ke ile ka lla. Ka lla kudu. Letšatši le lengwe le lengwe.” *

Bolela ka Maikwelo a go ba Molato. Karyn, yo a bego a e-na le nywaga e 13 ge mmagwe a be a e-hwa, o re: “Ke be ke tlwaetše go ya lebatong la ka godimo gomme ke atla mma ke re a robale gabotse. Go ile gwa ba le nako e nngwe yeo ke sa kago ka dira bjalo. Mesong e latelago, mma o ile a hwa. Go sa šetšwe gore taba ye e bonagala e sa kwagale, ke ikwa ke le molato ka gobane ga se ka ka ka mmona bošegong bja mafelelo—le ka baka la dilo tšeo di diregilego mesong e latetšego. Tate o be a tšere leeto la tša kgwebo gomme a nyaka gore nna le mogolo’a-ka re hlokomele mma. Eupša re ile ra robala bošego kudu. Ge re e-ya ka phapošing ya go robala ra hwetša mma a sa buše moya. Ke ile ka nyama kudu, ka gobane o be a phetše gabotse ge tate a be a tloga!”

Go swana le Karyn, mohlomongwe o ikwa o le molato ka tekanyo e itšego ka baka la dilo tšeo o ilego wa hlokomologa go di dira. O ka ba wa itlhokofatša ka gore “ge nkabe.” ‘Ge nkabe ke ile ka kgothaletša tate go yo bona ngaka.’ ‘Ge nkabe ke ile ka lekola mma pejana.’ Ge e ba o tshwenywa ke dikgopolo tše bjalo, gopola se: Ke mo go tlwaelegilego go ikwa o itshola ka baka la dilo tšeo o dumago eka nkabe o ile wa di dira ka tsela e fapanego. Go molaleng gore o be o tla dira dilo ka tsela e fapanego ge nkabe o be o tseba seo se bego se tla direga. Eupša o be o sa tsebe. Ka baka leo, ga se wa swanela go ikwa o le molato. Ga o ikarabele ka lehu la motswadi wa gago! *

Bolela ka Maikwelo a Gago. Diema 12:25 e re: “Lentšu la botho le thabiša pelo.” (PK) Go se bolele ka maikwelo a gago go ka dira gore o thatafalelwe ke go lebeletšana le bohloko bja go hwelwa. Ka lehlakoreng le lengwe, go boledišana ka maikwelo a gago le motho yo mongwe yo o mmotago go tla go  bulela sebaka sa go hwetša “lentšu la botho” la kgothatšo ge o ikwa o nyamile. Ka baka leo, o re’ng o sa leke go diriša e tee goba tše mmalwa tša ditšhišinyo tše latelago?

Boledišana le motswadi wa gago yo a phelago. Gaešita le ge ye e le nako e thata bakeng sa mma goba tate yo a phelago, go molaleng gore o sa dutše a nyaka go go nea thušo e nyakegago. Ka go rialo, tsebiša motswadi wa gago yo a phelago kamoo o ikwago ka gona. Dipoledišano tše bjalo ka ntle le pelaelo di tla imolla bjo bongwe bja bohloko bjoo le bo kwago gomme tša dira gore le batamelane kgaufsi.

Go go thuša go thoma poledišano, leka mokgwa wo: Lokeletša dilo tše pedi goba tše tharo tšeo o dumago nkabe o di tsebile mabapi le tatago goba mmago yo a hwilego, ke moka o kgopele go ahla-ahla e nngwe ya tšona le motswadi wa gago yo a phelago. *

․․․․․

Bolela le bagwera ba kgaufsi. Beibele e re bagwera ba kgonthe ba ‘tswaletšwe wa mohla wa tlalelo.’ (Diema 17:17) Alicia o re, “Motho yo a ka go thušago e ka ba yoo o sa mo naganego. Ka gona, o se ke wa tšhaba go bolela.” Ke therešo gore dipoledišano tše bjalo di ka ba thata, ka ge wena le mogwera wa gago le katanela go hwetša mantšu a swanetšego. Lega go le bjalo, ge nako e dutše e e-ya, go boledišana le ba bangwe ka maikwelo a gago go tla go hola. David, yo a bego a e-na le nywaga e senyane feela ge tatagwe a be a bolawa ke bolwetši bja pelo, o gopola ka gore: “Ga se ka ka ka bolela ka maikwelo a-ka. Go ka be go nthušitše gore ke phele gabotse maikwelong le mmeleng ge nkabe ke ile ka bolela ka mo go oketšegilego ka ona. Nkabe ke ile ka lebeletšana le bohloko bja-ka gakaone.”

Bolela le Modimo. Go na le kgonagalo ya gore o  tla ikwa o le kaone kudu ge o fetša go ‘tšhollela pelo ya gago’ go Jehofa Modimo ka thapelo. (Psalme 62:8) Ye ga se tsela ya go fo go dira gore o ikwe bokaone. Ka thapelo, o lopa “Modimo wa khomotšo yohle, yo a re homotšago ditlaišegong tša rena tšohle.”—2 Bakorinthe 1:3, 4.

Tsela e nngwe yeo Modimo a re homotšago ka yona ke ka moya wa gagwe o mokgethwa. O ka go nea “matla a fetago a tlwaelegilego,” e le gore o kgone go kgotlelela bohloko bja go hwelwa. (2 Bakorinthe 4:7) Modimo gape o re nea “khomotšo e tšwago Mangwalong.” (Baroma 15:4) Ka gona, kgopela Modimo bakeng sa moya wa gagwe o mokgethwa gomme o tšee nako o bala kgothatšo yeo e hwetšwago ka Lentšung la gagwe, Beibele. (2 Bathesalonika 2:16, 17) Ke ka baka la’ng o sa dule o e-na le lelokelelo la mangwalo ao a tlogago a go kgothatša e le ka kgonthe? *

Na Bohloko bo tla ka bja Fela?

Go nyama ga go fele ka bošego bjo tee. Brianne, yo mmagwe a hwilego ge a be a e-na le nywaga e 16, o re, “Ga se selo seo o ka phethago ka go fo se lebala. Ke na le matšatši ao ke llago go fihlela ke robala. Ka dinako tše dingwe, ke leka go se tsepamiše kgopolo ya-ka go seo se ntahlegetšego eupša ke leka go e tsepamiša dikholofetšong tšeo Jehofa a mpoloketšego tšona gore ke di thabele ke e-na le mma Paradeiseng.”

Beibele e re kgonthišetša gore Paradeiseng yeo Brianne a bolelago ka yona, “lehu le ka se hlwe le sa ba gona, le ge e le manyami goba sello goba bohloko di ka se hlwe di sa ba gona.” (Kutollo 21:3, 4) Le wena ka mo go swanago o ka hwetša gore go naganišiša ka dikholofetšo tše bjalo go tla go thuša go lebeletšana le go lahlegelwa ke motswadi.

Dihlogo tše oketšegilego go tšwa lelokelelong la dihlogo tša “Bafsa ba a Botšiša” di ka hwetšwa mokerong wa Web wa www.watchtower.org/ype

[Mengwalo ya tlase]

SEO GO KA NAGANWAGO KA SONA

▪ Ke ditšhišinyo dife tšeo di lego sehlogong se tšeo o tlago go di diriša? ․․․․․

▪ Ka mo fase, lokeletša mangwalo a mmalwa ao a tlago go go homotša ge bohloko bo kwagala bo oketšega. ․․․․․

[Lepokisi go letlakala 19]

GO LOKILE GO LLA . . . BA ILE BA LLA!

Aborahama—Genesi 23:2.

Josefa—Genesi 50:1.

Dafida—2 Samuele 1:11, 12; 18:33.

Maria, kgaetšedi’a Latsaro —Johane 11:32, 33.

Jesu—Johane 11:35.

Maria Magadalena—Johane 20:11.

[Box/​Picture on page 20]

NGWALA KAMOO O IKWAGO KA GONA

Go ngwala fase dikgopolo tša gago mabapi le motswadi wa gago yo a hwilego e ka ba tsela e kaone kudu ya go go thuša go lebeletšana le bohloko bja go hwelwa. Go na le dilo tše dintši kudu tšeo o ka ngwalago ka tšona. Ka mo tlase go na le ditšhišinyo tše mmalwa.

▪ Lokeletša dinako tše dibose tšeo o bilego le tšona le motswadi wa gago.

▪ Ngwala fase dilo tšeo o dumago eka o ka be o di boditše motswadi wa gago ge a be a sa phela.

▪ Akanya gore o na le moratho yoo a katanago le maikwelo a go ba molato ka baka la lehu la motswadi wa gago. Ngwala fase seo o tlago go se bolela bakeng sa go homotša moratho wa gago. Se se ka go thuša go ba le pono e leka-lekanego ka maikwelo a gago a go ba molato.

[Lepokisi go letlakala 21]

LENGWALO LEO LE YAGO GO MOTSWADI YO A PHELAGO

Go nyama ka baka la go lahlegelwa ke molekane ke tiragalo e bohloko kudu. Lega go le bjalo, go tlile ka nako yeo ngwana wa gago yo a lego mahlalagading a nyakago thušo ya gago. O ka mo thuša bjang go lebeletšana le bohloko bja go hwelwa, mola o sa hlokomologe bja gago?

Phema tshekamelo ya go uta maikwelo a gago. Ngwana wa gago o ithutile dilo tše dintši tše bohlokwa bophelong ka go lebelela wena. Go ithuta go lebeletšana le bohloko bja go hwelwa ke se sengwe sa tšona. Lega go le bjalo, o se ke wa nagana gore o swanetše go tia bakeng sa ngwana wa gago ka go mo utela maikwelo a gore o nyamile. Se se ka ruta ngwana wa gago yo a lego mahlalagading go dira se swanago. Go fapana le seo, ge e ba o bonagatša maikwelo a gago a go kwa bohloko, ngwana wa gago o ithuta gore go kaone go bonagatša maikwelo go e na le go a uta le gore ke ga tlhago go ikwa a nyamile, a gakanegile goba e bile a galefile.

Kgothaletša ngwana wa gago yo a lego mahlalagading go bolela. Ka ntle le go mo dira gore a ikwe a gapeletšega go bolela, kgothaletša ngwana wa gago yo a lego mahlalagading go boledišana le wena ka seo se lego ka pelong ya gagwe. Ge go bonagala a dika-dika, le re’ng le sa ahla-ahle sehlogo se gotee? Gape le boledišane ka dinako tše dibotse tšeo le bilego le tšona le molekane wa gago yo a hwilego. Amogela gore go tla ba thata go wena go tšwela pele. Go kwa o bolela kamoo o ikwago ka gona go tla thuša ngwana wa gago yo a lego mahlalagading go ithuta go dira se swanago.

Lemoga mafokodi a gago. Ke mo go kwagalago gore o nyaka go dula o nea ngwana wa gago yo a lego mahlalagading thekgo ka nako ye e thata. Eupša gopola gore le wena o kgomilwe ka mo go tseneletšego ke go lahlegelwa ke molekane wa gago yo a rategago. Ka gona, go ka direga gore boemo bja gago bja maikwelo, bja monagano le bja mmele bo felelwe ke matla ka nako e itšego. (Diema 24:10) Ka go rialo, o ka swanelwa ke go nyaka thušo ya ditho tše dingwe tše di godilego tša lapa le bagwera bao ba godilego tsebong bakeng sa gore ba go thekge. Go nyaka thušo ke le leswao la go gola tsebong. Diema 11:2 e re: “Bohlale bo na le moipoetši.”

Thekgo e kaone-kaone yeo o ka e hwetšago e tšwa go Jehofa Modimo ka boyena, yoo a holofetšago barapedi ba gagwe gore: “Nna Morêna ké Modimo w’axo; ke Xo swere ka seatla sa-ka sa le letona, ’me ke bolêla naxô ke re: Se boifê, ké Nna ke Xo phološaxo!”—Jesaya 41:13.

[Seswantšho go letlakala 19]

Bohloko bo ka swana le maphoto ao a bethago lebopo ka dinako tše sa letelwago