Go Tloga Tirelong ya Setu go ya Tirelong e Kgethwa

Ka ge go anega Andrew Hogg

Molaodi wa sekepe sa rena sa ka tlase ga lewatle o boletše gore: “Ge e ba re ka thuntšha dithuthupi tša nuclear, thomo ya rena e tla be e se ya atlega.” Se se ile sa dira gore re boledišane ka taba ya ge e ba go lokile goba go se go loke go tsenela dintwa tša di-nuclear. Lega go le bjalo, go tlile bjang gore ke be tirelong ya dikepe tša ka tlase ga lewatle, yeo gape e bitšwago tirelo ya setu ka baka la maiteko ao re bego re a dira a gore re se lemogwe?

KE BELEGETŠWE Philadelphia, Pennsylvania, U.S.A., ka 1944. Ge ke be ke gola, ke be ke kgahlwa ke tate, rakgolo le malome, bao ba bego ba hlankela tirelong ya madira a itlhamilego, e bile ba bona se e le selo se sekaone kudu seo motho a ka se dirago. Ge ke be ke le mošemanyana, ke ile ka etela lefelo la madira a dikepe gomme ke moo ke ilego ka bona sekepe sa go sesa ka tlase ga lewatle la mathomo. Go tloga ka nako yeo go ya pele, pakane ya-ka e ile ya ba go tsenela tirelo ya bahlabani ba lewatle. Nakong ya nywaga ya-ka ya ge ke le sekolong se se phagamego, ke ile ka amogelwa sekolong sa U.S. Naval Academy. Ke ile ka aloga ka morago ga nywaga e mene, ka June 1966.

Ke ile ka tsenela thuto ya Naval Nuclear Propulsion Program bakeng sa go ba setsebi sa nuclear le ditirišo tša sekepe sa go sesa ka tlase ga lewatle. Ke moka, ka April 1967, ke ile ka nyala Mary Lee Carter, yo e sa dutšego e le mosadi wa-ka yo a rategago. Mafelelong ka March 1968, ke ile ka fihlelela toro ya-ka ya ge ke be ke sa le mošemanyana ge ke be ke abelwa sekepe sa-ka sa mathomo, sekepe sa go sesa ka tlase ga lewatle sa USS Jack. Mo e ka bago ka morago ga ngwaga, Mary Lee o ile a belega wa pele wa bana ba rena ba babedi—e lego morwedi wa rena Allison.

Ka 1971, ke ile ka dirwa Mohlankedi wa Boentšeneare wa sekepe sa go sesa ka tlase ga lewatle sa USS Andrew Jackson, seo mosepediši wa sona a boletšego mantšu a lego matsenong. Ge ke be ke le lewatleng ka sekepeng se seo se bego se kgona go thunya di-missile tše dintši ka nako e tee, re ile ra ba le boemo bja tšhoganetšo bjo bo boifšago ke basesiši ba sekepe sa ka tlase ga lewatle ka moka—mollo. Nakwana ka morago ga bošegogare, ge ke be ke iketlile le bahlankedi-gotee ba bangwe, re ile ra kwa modumo. Ke moka gwa latela kong, kong, kong ya alamo le mantšu a rego, “Mollo ka phapošing ya pele ya metšhene!”

Ka ge ke be ke ikarabela ka mo e nyakilego go ba ditshepedišo ka moka tša metšhene le mohlagase, ke ile ka kitimela ka moo go bona seo se bego se direga. Kgabo ya mollo e be e thomile ka go o mongwe wa metšhene ya go fehla oksitšene, woo o thušago go tšweletša moya o ka hengwago. Kapejana ba bane ba rena re ile ra apara dišira-difahlego tša go thuša go hema gomme ra tloša mapotlelo a dikgase tšeo di bego di ka tuka lefelong leo. Ka lethabo, ga go na yo a ilego a gobala. Go sa šetšwe kotsi ye, re ile ra kgona go tšwela pele ka mošomo wa rena wa go hlapetša—bohlatse bja gore sehlopha se se be se tlwaeditšwe gabotse.

Ke Ile ka Kgetha go Ithuta ka Modira-khutšo

Go re thuša go lebeletšana le mathata a mošomo, re ile ra kgothaletšwa go fetša diiri tše mmalwa beke e nngwe le e nngwe re be re dira selo se itšego seo se agago. Gantši ke be ke bala ditaodišo tša bophelo tša bahlabani ba tsebegago. Lega go le bjalo, lebakeng le ke ile ka kgetha go bala ka motho  yo mongwe yo a tsebjago e le modira-khutšo—Jesu Kriste. Ke diriša Beibele yeo ke e hweditšego ge ke be ke aloga sekolong sa madira a dikepe, ke ile ka thoma go bala Diebangedi. Eupša go bala go ile gwa tsoša dipotšišo tše ntši go e na le go di araba. Ke be ke nyaka thušo.

Go ya bofelong bja tlhapetšo ya rena, molaodi wa sekepe o ile a swara seboka sa bahlankedi ka moka gomme a tsebiša gore: “Banna ba gešo, moetšeneare wa rena o abetšwe mošomo o mokaone-kaone go Madira a Dikepe a United States. E tla ba Mohlankedi wa Boentšeneare ka sekepeng sa pele sa mohuta o mofsa wa dikepe tša go hlasela tša madira a dikepe.” Ke be ke maketše!

Kabelo ya-ka e mpsha e ile ya hudušetša lapa la-ka Newport News, kua Virginia, moo go bego go agwa sekepe sa USS Los Angeles. Mošomo wa-ka o be o akaretša go hlokomela go lekwa ga ditshepedišo tša boentšeneare le go ngwala dipuku tša ditaelo le mananeo a tlwaetšo. Mošomo o be o raragane kudu eupša o kgotsofatša. Go sa dutše go le bjalo, Mary Lee o ile a belega morwa wa rena, Drew. Ga bjale ke be ke le tatago bana ba babedi gomme ke ile ka thoma go nagana gape ka Modimo: ‘O nagana’ng ka dintwa? Go direga’ng ge o e-hwa? Na go na le dihele?’

Dikarabo Mafelelong!

Ka yona nako yeo, mosadi wa-ka o ile a thoma go boledišana ka Beibele le Dihlatse tše pedi tša Jehofa. Ka letšatši le lengwe ge ke be ke leletša gae mogala ke le boemakepe, Mary Lee o ile a re, “‘Basadi ba Beibele’ ba babedi ba mo.”

Ke ile ka botšiša gore, “Ke ba kereke efe?”

O ile a araba ka gore, “Ke Dihlatse tša Jehofa,”.

Ke be ke sa tsebe gore Dihlatse ke bomang, eupša ke be ke nyaka go kwešiša Beibele. Ke ile ka re: “Ba laletše gore ba boe mantšiboeng a mangwe.” Nakwana ka morago ga moo, yo mongwe wa bona o ile a boa le monna wa gagwe, nna le mosadi wa-ka re ile ra thoma go ithuta Beibele le bona.

Mafelelong, ke ile ka thoma go hwetša dikarabo tša dipotšišo tšeo di nkgakantšhitšego ka nywaga e mentši. Ka mohlala, ke ile ka ithuta gore “xo bahu xa xo se se tsebyaxo,” ba bjalo ka ge eka ba robetše boroko bjo bogolo—papišo yeo e dirišitšwego ke Jesu. (Mmoledi 9:5; Johane 11:11-14) Ka baka leo, bahu ga ba thabe goba go tlaišega eupša ba “robetše” lehung, ba letetše go tsošetšwa bophelong.

Nna le Mary Lee re ile ra ba ra thoma go ya dibokeng tša Bokriste Holong ya Mmušo ya kgaufsi. Moo re ile ra bona Dihlatse—tše di sa swanego ka ditlogo, thuto le setšo—ka moka di hlankela Modimo ka khutšo le botee. Nna le mosadi wa-ka re ile ra phetha ka gore: “Ruri Beibele e ka kaonefatša maphelo a batho.”—Psalme 19:7-10.

Nako ya go Dira Phetho

Ge Ntwa ya ma-Arab le Baisiraele e be e phulega ka 1973, dikepe tša go sesa ka tlase ga lewatle  tša U.S. Atlantic Fleet di ile tša romelwa moo. Dilo di ka ba di ile tša befela pele gomme ke ile ka thoma go lemoga gore Mmušo wa Modimo, e sego dipolitiki tša batho, ke wona o tla tlišago khutšo ya kgonthe le e swarelelago. Ge e le gabotse, gantši ke be ke rapela ke re “Mmušô wa xaxo a o tlê; thatô ya xaxo a e dirwê mono lefaseng,” eupša ke be ke sa tsebe gore seo se be se bolela eng. (Mateo 6:9, 10, Beibele ya Sepedi) Lega go le bjalo, ga bjale ke kwešiša gore Mmušo wa Modimo ke mmušo wa legodimong woo kgaufsinyane o tlago go buša lefase ka moka, wa fediša bobe ka moka le badiri ba bjona.—Daniele 2:44; 7:13, 14.

Ditemana tša Lengwalo tšeo di bego di ntshwenya ka mo go kgethegilego e be e le 2 Bakorinthe 10:3, 4. Di bolela gore Bakriste ba therešo ga ba “lwe go ya ka seo re lego sona nameng. Gobane dibetša tša ntwa ya rena ga se tša nama, eupša di matla ka Modimo.” Ke ile ka ithuta gore “dibetša” tšeo ke tša moya gomme di akaretša “tšhoša ya moya”—Beibele e Kgethwa.—Baefeso 6:17.

Bjale ke be ke swanetše go dira kgetho. Na ke be ke tla tšwela pele ka mošomo wo, woo ke bego ke hwetša e le tlhohlo e bile e le o thabišago, goba na ke be ke tla dumelelanya bophelo bja-ka le therešo ya Beibele? Ka morago ga go naganišiša ka thapelo, ke ile ka phetha ka gore ge e ba ruri ke rata go ba modira-khutšo, ke swanetše go dira bjalo ka tsela ya Modimo.

Molaodi Wa-ka yo Mofsa

Nna le Mary Lee re ile ra rapela le go boledišana ka bokamoso bja rena gomme ra dira phetho ya gore re tla hlankela molaodi o tee feela wa kgonthe—Jehofa Modimo. Yo mongwe le yo mongwe wa rena o ile a dira phetho ya go neela bophelo bja gagwe go Jehofa gomme ke ile ka tsenya lengwalo la go rola modiro. Ke moka ke ile ka romelwa Norfolk, Virginia, go letela go lokollwa mošomong. Bontši bja bahlankedi-gotee le nna ba be ba makaditšwe ke phetho ya-ka gomme ba bangwe ba be ba sa e thekge. Eupša ba bangwe ba be ba kgahlegela boemo bja-ka bjo bo theilwego Beibeleng gomme ba hlompha phetho ya-ka.

Ke ile ka dumelelwa go rola modiro ka 1974. Wona ngwaga woo nna le mosadi wa-ka re ile ra bontšha boineelo bja rena go Modimo ka go kolobetšwa meetseng Kopanong ya Selete ya Dihlatse tša Jehofa ya “Divine Purpose” yeo e bego e swaretšwe Hampton, Virginia. (Mateo 28:19, 20) Bophelo bja rena bjo bofsa bo be bo thomile.

Go Lebeletšana le Ditlhohlo tše Difsa

Nna le Mary Lee re be re e-na le bana ba babedi ba banyenyane, re sa šome gomme re e-na le tšhelete e ka re thušago dikgwedi tše mmalwa tše di latelago. Ke ile ka romela lengwalo la-ka la go kgopela mošomo go beng mešomo gomme ka tlogela dilo ka diatleng tša Modimo. Go se go ye kae, khamphani ya go thuša setšhaba e ile ya nkholofetša mošomo. Mogolo wa gona o be o fetwa ke mogolo wa ge ke be ke le yo mongwe wa madira a dikepe, eupša mošomo wo o ile wa dira gore lapa la-ka le kgone go dula lefelong lona leo.

Ge nna le mosadi wa-ka re be re tšwela pele moyeng, re be re nyaka go oketša tirelo ya rena go Jehofa. Lapa la Dihlatse leo re bego re le tseba le ile la hudugela bogareng bja Virginia go yo hlankela moo go bego go nyakega barutiši ba oketšegilego ba Beibele gomme ba ile ba re laletša gore re ba etele. Re ile ra ba etela gatee feela gomme ra napa ra thoma go dira dithulaganyo tša go huduga. Ke ile ka dira kgopelo ya go romelwa go yo šoma lefelong leo gomme ka mo go thabišago, e ile ya amogelwa. Ge e le gabotse, e ile ya tla le tlhatlošo! Le gona, khamphani yeo e ile ya dumela go lefelela ditshenyagalelo tša rena tša go huduga. Re ile ra re ge re nagana ra re, ‘Ee, Modimo ruri o hlokomela bao ba katanelago go dira thato ya gagwe.’—Mateo 6:33.

Ka ge lapa la rena le ile la tšwela pele le phela bophelo bjo bonolo, nna le Mary Lee re ile ra kgona go tsenela bodiredi bja nako e tletšego. Ka lehlakoreng le lengwe, se se ile sa re dumelela go fetša nako e ntši le bana ba rena ba babedi ba babotse ge ba be ba sa gola. Ee, mafelelong re hweditše lethabo leo le sa bapišwego, ka ge bobedi Allison le Drew ba tšwela pele “ba sepela therešong.”—3 Johane 4; Diema 23:24.

Ee, go bile le dinako tšeo tšhelete, ntlo, bophelo bjo bobotse le go gola go ilego gwa dira gore re be le dipelaelo. Eupša Jehofa ka mehla o be a re thekga. Na ke a itshola ge ke tlogetše “tirelo ya setu”? Le gatee! Ge nna le Mary Lee re naganišiša ka bophelo bja rena, re ka bolela re tiišitše gore go hlankela Jehofa ke selo se bohlokwa le se se putsago seo motho a ka se dirago.—Mmoledi 12:13.

[Ntlhakgolo go letlakala 30]

Re dirile phetho ya go hlankela Molaodi yo Mogolo

[Seswantšho go letlakala 28, 29]

The USS “Los Angeles”

[Mothopo]

U.S. Navy photo

[Seswantšho go letlakala 29]

Ke e-na le Mary Lee lehono