Sephiri 1: Go Etiša Pele Dilo tše di Nepagetšego

“Le kgonthišetše dilo tše bohlokwa kudu.”​—Bafilipi 1:10.

Se se ra gore’ng? Manyalong ao a atlegago, molekane yo mongwe le yo mongwe o etiša dinyakwa tša molekane wa gagwe pele ga tša gagwe, goba pele ga dithoto, mošomo, bagwera gaešita le ba leloko. Monna le mosadi ba fetša nako e ntši ba le gotee ba e-na le bana ba bona. Bobedi bja bona ba ikemišeditše go ikgafa bakeng sa go hola lapa.—Bafilipi 2:4.

Bohlokwa bja sona. Beibele e bolela gore lapa le bohlokwa kudu. Ge e le gabotse, moapostola Paulo o ngwadile gore motho yo a sa babalelego lapa la gagwe “ke yo mobe go feta motho yo a se nago tumelo.” (1 Timotheo 5:8) Lega go le bjalo, ge nako e dutše e e-ya, motho a ka fetoša dilo tšeo di tlago pele bophelong bja gagwe. Ka mohlala, moeletši yo mongwe wa malapa o lemogile gore batho ba bantši bao ba bago gona sebokeng sa gagwe ba bonagala ba lebišitše tlhokomelo ya bona mošomong wa boiphedišo go e na le ka lapeng. O bolela gore go be go le bjalo ka ge eka ba letetše go rarolla bothata le ge e le bofe bja lapa kapejana e le gore ba se sa hlwa ba tshwenyega ka lapa gomme ba boele ba lebiše tlhokomelo mošomong wa bona wa boiphedišo.” Ke’ng seo re ithutago sona? Go bolela gore re etiša lapa pele go bonolo go feta go bontšha gore re dira bjalo.

Leka boitlwaetšo bjo. Diriša dipotšišo tše di latelago e le tlhahlo bakeng sa go bona gore lapa la gago le bohlokwa gakaakang go wena.

▪ Ge molekane wa-ka goba ngwanaka a nyaka go bolela, na ke mo theetša ntle le tika-tiko?

▪ Ge ke boledišana le ba bangwe ka mediro ya-ka, na ke fela ke ikhwetša ke bolela ka dilo tšeo ke di dirago le lapa la-ka?

▪ Na nka gana boikarabelo bjo bo oketšegilego (mošomong goba lefelong le lengwe) ge e ba lapa la-ka le nyaka nako ya-ka?

Ge e ba o arabile dipotšišo tše di lego ka mo godimo ka ee, o ka nagana gore o etiša pele dilo tše nepagetšego. Eupša molekane wa gago le bana ba be ba ka araba bjang dipotšišo tše ka wena? Kamoo re itebelelago ka gona ga se tekanyetšo e nnoši ya go bona ge e ba dilo tšeo re di etišago pele e le tše nepagetšego. Le gona, kgopolo yeo e a šoma le go diphiri tše dingwe tša katlego tšeo di tlago go ahla-ahlwa matlakaleng a latelago.

Dira phetho. Nagana ka tsela e tee goba tše pedi tšeo ka tšona o ka bontšhago gore lapa la gago le tla pele. (Ka mohlala: Nagana ka go fokotša nako yeo o e fetšago o dira dilo tšeo di go amogago nako ya go ba le molekane wa gago le bana.)

Ke ka baka la’ng o sa boledišane le ba lapa la gago ka diphetho tšeo o di dirilego? Ge setho se sengwe se bontšha go ikemišetša go fetoga, go ka direga gore ditho tše dingwe le tšona di latele.

[Seswantšho go letlakala 3]

Motswadi yo a atlegago o etiša molekane wa gagwe le bana pele