Sephiri 5: Teka-tekano

“Anke go leka-lekana ga lena go tsebje.”—Bafilipi 4:5.

Se se ra gore’ng? Malapeng ao a atlegago, banna le basadi ba dula ba lebalelana diphošo. (Baroma 3:23) Gape ga ba diriše molao ka tsela e feteletšego goba go tlogelela dilo ge ba dirišana le bana ba bona. Ba bea melao e leka-lekanego ka gae. Ge go nyakega gore ba phošolle, ba nea phošollo “ka tekanyo.”—Jeremia 30:11, PK.

Bohlokwa bja sona. Beibele e re “bohlale bjo bo tšwago godimo . . . bo leka-lekane.” (Jakobo 3:17) Modimo ka boyena ga a nyake phethagalo bathong ba sa phethagalago, ka gona ke ka baka la’ng banyalani ba swanetše go e nyaka go balekane ba bona? Ka gona, go dula o swaya diphošo tše dinyenyane go feleletša ka sekgopi, ga go kaonefatše boemo. Go kaone kudu go amogela taba ya gore “ka moka ga rena re kgopša gantši.”—Jakobo 3:2.

Batswadi ba atlegago ba bontšha teka-tekano ge ba dirišana le bana ba bona. Tayo ya bona ga se e feteletšego, goba ga go “thata go ba kgahliša.” (Petro 2:18) Ba nea bana bao ba lego mahlalagading bao ba bontšhago gore ba na le boikarabelo tokologo dilong tše dingwe. Ga ba leke go ba le taolo dilong ka moka tšeo di dirwago ke bana ba bona ba lego mahlalagading. Tšhupetšo e nngwe e bolela gore go leka go laola sebopego se sengwe le se sengwe sa bophelo bja bana bao ba lego mahlalagading “go swana le mmino o dirwago ka matšato le wo o lapišago wa go binela pula. Pula e ka se ne, eupša o tla be o lapile.”

Leka boitlwaetšo bjo. Diriša dipotšišo tše di latelago e le tlhahlo bakeng sa go bona go leka-lekana ga gago.

▪ O feleleditše neng go reta molekane wa gago?

▪ O feleleditše neng go swaya molekane wa gago diphošo?

Dira phetho. Ge e ba o ile wa thatafalelwa ke go hwetša karabo ya potšišo ya mathomo ya boitlwaetšo bjo eupša o se wa thatafalelwa ke go araba potšišo ya bobedi, nagana ka pakane yeo o ka ipeelago yona mabapi le go swara ba bangwe ka teka-tekano.

O re’ng o sa boledišane le molekane wa gago mabapi le diphetho tšeo le ka di dirago?

Nagana ka diphetho tšeo o ka dumelelago ngwana wa gago yo a lego mahlalagading go di dira ge a bontšha boikarabelo.

O re’ng o sa boledišane le ngwana wa gago yo a lego mahlalagading ka go lebanya mabapi le ditaba tše bjalo ka nako ya go boa ka gae?

[Seswantšho go letlakala 7]

Go swana le mootledi yo a lego šedi, setho sa lapa seo se nago le teka-tekano se ikemišeditše go etiša dikgahlego tša ditho tše dingwe tša lapa pele