“Ke Nyaka go Hlala!”

Ntlo e hlagalago e bontšha maswao a gore ga e hlokomelwe. Go theoša le nywaga, e ile ya emeletšana le madimo a mantši ka katlego, go a mangwe ga se ya atlega. Ga bjale, moago wo o hlagetše kudu e bile o bonagala o le kgaufsi kudu le go wa.

SESWANTŠHO seo se bontšha boemo bja manyalo a mantši lehono. Na o nagana gore lenyalo la gago le ka ba le le boemong bjo bo swanago? Ge e ba go le bjalo, kgonthišega gore ga go na banyalani ba se nago mathata. Ge e le gabotse, Beibele e dumela e le ka kgonthe gore bao ba nyalago ba ka ba le “bohloko le manyami.”—1 Bakorinthe 7:28, The New English Bible.

Go gatelela go rereša ga mantšu ao, sehlopha se sengwe sa banyakišiši se hlalosa lenyalo e le “selo se kotsi kudu seo se dirwago ka mehla ke batho ba bantši kudu setšhabeng sa rena.” Banyakišiši bao ba oketša ka gore: “Seo se thomago e le tswalano e thabišago kudu le e holofetšago se ka feleletša e le tswalano e ferekanyago kudu le e kwešago bohloko bophelong bja motho.”

Go thwe’ng ka lenyalo la gago? Na le bonagala kudu ka se sengwe goba tše dingwe tša dika tše di latelago?

● Go dula le ngangišana

● Polelo e hlabago

● Go se botegele molekane

● Sekgopi

Ge e ba lenyalo la gago le bonagala le se la tia e bile le bonagala le le kgaufsi le go thubega, o swanetše go dira’ng? Na tlhalo ke tharollo?

[Box/​Picture on page 3]

E “FETOGA SELO SEO SE TLWAELEGILEGO”

Dinageng tše dingwe, palo ya batho bao ba hlalago e oketšegile ka lebelo. Ka mohlala, ela hloko United States, moo ka nywaga e mentši tlhalo e bego e se ya tlwaelega kudu. Barbara Dafoe Whitehead o ngwala ka pukung ya gagwe ya The Divorce Culture gore, “ka morago ga 1960 palo ya tlhalo e ile ya oketšega ka lebelo le legolo.” O bolela gore: “Tlhalo e ile ya oketšega ka makga a mabedi ka nywaga e ka bago e lesome gomme ya tšwela pele e oketšega go fihlela nywageng ya mathomo a bo-1980, ge dinageng tše di hlabologilego tša ka Bodikela e be e oketšega ka go tsepama. Ka nywaga-some e meraro feela tlhalo e ile ya fetoga selo seo se tlwaelegilego.”