Pono ya Beibele

Letšatši la Kahlolo Ke’ng?

Beibele e re, Modimo “o beile letšatši leo ka lona a rerago go ahlola ka toko lefase leo go agilwego go lona.” (Ditiro 17:31) Batho ba bantši ga ba rate kgopolo ya gore nakong e tlago ba tla ahlolwa. Na o ikwa ka tsela yeo?

GE E ba go le bjalo, o tla homotšwa ke taba ya gore Letšatši la Kahlolo ke thulaganyo e lerato yeo e tlago go tlišetša batho tšhegofatšo—go akaretša le bao ba hwilego. (Mateo 20:28; Johane 3:16) Ke ka baka la’ng Letšatši la Kahlolo le nyakega? Ge e le gabotse go tla direga’ng ka “letšatši” leo?

Letšatši la Kahlolo —Ke ka Baka La’ng le Nyakega?

Ge Modimo a be a bea batho lefaseng, o be a sa ba beele gore ba lekwe ge e ba ba tla kgona go phela lefelong le lengwe la moya. O bopile batho gore ba kgone go phela ka mo go sa felego mo lefaseng. Le ge batho ba babedi ba pele ba be ba phethagetše mmeleng le monaganong, ba ile ba rabela kgahlanong le Modimo. Ka baka leo, ba ile ba lahlegelwa ke tebelelo ya go phela ka mo go sa felego mo lefaseng gomme ba tsenya sebe le lehu baneng ba bona ka moka.—Genesi 2:15-17; Baroma 5:12.

Letšatši la Kahlolo e tla ba nako ya nywaga e sekete yeo ka yona batho ba tlago go ba le sebaka sa go hwetša seo Adama le Efa ba se lahlilego. * Hlokomela gore Ditiro 17:31, yeo e tsopotšwego ka mo godimo, e re Letšatši la Kahlolo le tla kgoma batho bao ba ‘agilego lefaseng.’ Bao ba ahlolwago gabotse ba tla phela mo lefaseng gomme ba thabela go phela ka mo go sa felego lefaseng leo le kgahlišago. (Kutollo 21:3, 4) Ka baka leo, Letšatši la Kahlolo le thuša go phetha morero wa Modimo wa mathomong mabapi le batho le lefase.

Kriste Jesu ke Moahlodi yo a kgethilwego ke Modimo. Beibele e re Jesu o tla “ahlola ba ba phelago le ba ba hwilego.” (2 Timotheo 4:1) “Ba ba phelago” bao ba tlago go ahlolwa ke bomang? Ba hwilego ba tla phela bjang gape ‘lefaseng leo go agilwego go lona’?

Jesu o Ahlola “ba ba Phelago”

Ga bjale, re batamela bofelo bjo go boletšwego ka bjona e sa le pele bja tshepedišo ya bjale ya dilo, ge Modimo a tla be a senya batho ka moka  bao ba gobogilego le go fediša ba kgopo. Baphologi ba bofelo bja tshepedišo ye ke “ba phelago” bao ba tlago go ahlolwa.—Kutollo 7:9-14; 19:11-16.

Lebakeng leo la kahlolo, leo le tlago go tšea nywaga e 1 000, Kriste Jesu gotee le banna le basadi ba 144 000 ba tsošitšwego bahung go phela legodimong, ba tla buša lefase. Ba tla ba dikgoši le baperisita, ba neela batho mehola ya sehlabelo sa Jesu sa topollo gomme ganyenyane-ganyenyane ba dira gore batho ba botegago ba phethagale mmeleng le monaganong.—Kutollo 5:10; 14:1-4; 20:4-6.

Nakong ya Letšatši la Kahlolo, Sathane le batemona ba gagwe ba tla thibelwa go tutuetša ditiro tša batho. (Kutollo 20:1-3) Lega go le bjalo, mafelelong a Letšatši la Kahlolo, Sathane o tla dumelelwa go leka potego ya batho ka moka bao ba tla bego ba phela. Ba ba tšwelago pele ba botegela Modimo ba tla be ba fentše teko yeo e paletšego Adama le Efa. Ba tla lebelelwa ba swanelega go hwetša bophelo bjo bo sa felego Paradeiseng e tsošološitšwego ya lefaseng. Bao ba kgethago go rabela kgahlanong le Modimo ba tla fedišetšwa sa ruri, go swana le ge Sathane le batemona ba gagwe ba tla fedišwa.—Kutollo 20:7-9.

Go Ahlola “ba ba Hwilego”

Beibele e re nakong ya Letšatši la Kahlolo bahu ba tla “tsoga.” (Mateo 12:41) Jesu o boletše gore “nako e a tla yeo ka yona bohle bao ba lego mabitleng a kgopotšo ba tlago go kwa lentšu la gagwe gomme ba tšwa, bao ba dirilego dilo tše dibotse ba tla tsogela bophelong, bao ba tlwaetšego go dira dilo tše mpe ba tla tsogela kahlolo.” (Johane 5:28, 29) O be a sa bolele mabapi le meoya yeo e tšwelego mebeleng ya bahu. Bahu ga ba tsebe selo e bile ga ba na meoya yeo tšwago mmeleng ge motho a e-hwa. (Mmoledi 9:5; Johane 11:11-14, 23, 24) Jesu o tla tsoša bao ba hwilego go re ba tle ba phele mo lefaseng gape.

Na bao ba tsošitšwego ba tla ahlolwa go ya ka ditiro tša bona tša pele ba e-hwa? Aowa. Beibele e ruta gore “yo a hwilego o hunologile sebeng sa gagwe.” (Baroma 6:7) Ka gona, go swana le bao ba phologago bofelo bja tshepedišo ye ya dilo, bao ba tsošeditšwego mo lefaseng ba tla ahlolwa “go ya ka ditiro tša bona” tša Letšatšing la Kahlolo. (Kutollo 20:12, 13) Go ithekgilwe ka ditiro tša bona tša mafelelo, se se feleletša ka go ba tsogo yeo e lebišago bophelong bjo bo sa felego goba tsogo yeo e lebišago phedišong. Ba bantši ba bao ba tsošeditšwego bophelong ba tla tseba Jehofa Modimo la mathomo le seo a nyakago ba se dira bophelong. Ba tla ba le sebaka sa go phela ka go dumelelana le thato ya Modimo le go hwetša bophelo bjo bo sa felego mo lefaseng.

Ga Gona Lebaka la go Boifa

Letšatši la Kahlolo e ka se be nako ya go rutwa ke Modimo feela eupša gape e tla ba nako ya gore bao ba phelago ba diriše seo ba ithutago sona le go thabela ditšhegofatšo. Anke o akanye lethabo leo o tla bago le lona ge o boelanywa le baratiwa ba gago bao ba tsošitšwego bahung gomme o e-ya phethegong gotee le bona!

Mafelelong a Letšatši la Kahlolo, Modimo o tla dumelela Sathane gore a leke potego ya batho. Eupša ga go na lebaka la go belaela goba go boifa. Mafelelong a Letšatši la Kahlolo, bohle ba phelago ba tla hlangwa ka mo go feletšego gore ba kgone go lebeletšana le teko ya mafelelo. Ka gona, Letšatši la Kahlolo e tla ba karolo ya phethagatšo ya morero wa Modimo wa go dirolla ditla-morago ka moka tša go rabela kgahlanong le Modimo tšhemong ya Edene.

[Mongwalo wa tlase]

NA O KILE WA IPOTŠIŠA?

● Letšatši la Kahlolo ke’ng?—Ditiro 17:31.

● Go tlo ahlolwa bomang?—2 Timotheo 4:1.

● Letšatši la Kahlolo le tla tšea nako e kaaka’ng?—Kutollo 20:4-6.

[Ntlhakgolo go letlakala 11]

Anke o akanye lethabo leo o tla bago le lona ge o boelanywa le baratiwa ba gago bao ba tsošitšwego bahung

[Diswantšho go letlakala 10]

Pušong ya Kriste, bahu ba tla tsošetšwa lefaseng la paradeise