Pono ya Beibele

Na Dikarolo tša Beibele ka Moka di sa le Bohlokwa?

“Beibele e tloga e se na mohola o mokaalo bakeng sa batho ba lehono, re se sa bolela ka tsebo e nyenyane ya go kgona go bapala dipapadi tša mantšu goba go araba dipotšišo mananeong a diphadišano.”

“Ditšhupetšo tša Beibele mabapi le mašika a lapa, bokgarebe, le go boifa Modimo e be e le dikgopolo tšeo di bego di tlwaelegile tša mehleng ya Beibele, eupša ga di hole gakaalo mo Lekgolong la Masomepedi-tee la Nywaga.”

“Beibele e be e šiilwe ke nako le pele e ka gatišwa la mathomo.”

DIPOLELO tše di tšerwe mokerong wa inthanete woo o bego o ahla-ahla sehlogo se se rego “Na Beibele e šiilwe ke nako e bile ga e sa swanelega?” O ikwa bjang ka dipolelo tšeo? Na o dumelelana le tšona?

O ka no se dumelelane le tšona eupša lega go le bjalo o ka ba o sa ipotšiša ge e ba dilo tšeo Beibele e di bolelago di sa le nakong. Go ba gona, Dibeibele tšeo di dirišwago ka dikerekeng tše dintši di arogantšwe ka seo lehono se bitšwago Testamente ya Kgale le Testamente e Mpsha, e lego seo se neago kgopolo ya gore karolo e fetago 75 lekgolong ya Beibele ke ya kgale, ke gore ke e šiilwego ke nako.

Ga go sa na batho bao ba dirago dihlabelo tšeo Molao wa Moše o bego o re di dirwe. Ka gona, ke ka baka la’ng dintlha ka botlalo tšeo di lego ka pukung ya Lefitiko tša mabapi le dihlabelo di swanetše go bolokwa? (Lefitiko 1:1–7:38) Le gona, go thwe’ng ka dikgaolo tša mathomo tša 1 Dikoronika, tšeo karolo e kgolo ya tšona e bolelago ka mo go feletšego ka mašika? (1 Koronika 1:1–9:44) Ge e ba go se na motho yo a phelago lehono yo a ka latišišago lešika la gagwe mašikeng ao a lego ka dikgaolong tše, mohola wa tšona ke ofe?

A re re o kga apola mohlareng. Ge šetše o swere apola, na mohlare woo o tšweleditšego apola yeo ga o sa le bohlokwa? E sego ge o sa nyaka diapola tše dingwe! Beibele e swana le moapola ka tsela e itšego. Dikarolo tše dingwe tša Beibele, tše bjalo ka Dipsalme goba Thuto ya Thabeng, di ka bonagala di kwešišega gabonolo e bile di gogela. Gaešita le ge re ka rata dikarolo tšeo—bjalo ka ge re ka rata seenywa se sengwe—na re swanetše go tšeela tše dingwe fase? Beibele yona e re’ng ka taba ye?

Mo e ka bago ka ngwaga wa 65 C.E., moapostola Paulo o ngwaletše Timotheo lengwalo la bobedi, a mo gopotša gore: “Go tloga boseeng o tsebile mangwalo a makgethwa, ao a kgonago go go hlalefišetša phologo yeo e lego mabapi le Kriste Jesu.” Se se latelago Paulo o itše: “Lengwalo ka moka le buduletšwe ke Modimo gomme le hola ka go ruta, go sola, go lokiša dilo, go laya ka toko.” (2 Timotheo 3:15, 16) Ge Paulo a be a ngwala gore “lengwalo ka moka le buduletšwe ke Modimo gomme le [a] hola,” na o be a bolela ka Testamente e Mpsha feela?

Hlokomela gore Paulo o re Timotheo o tsebile “mangwalo a makgethwa” go tloga “boseeng.” Ge e ba, ka ge ba bangwe ba dumela, Timotheo a be a e-na le nywaga e 30 ge lengwalo le le be le ngwalwa, gona e be e le lesea nakong ya lehu la Jesu. Yeo ke nakong ya pele ga ge karolo ya Testamente e Mpsha, goba Mangwalo a Segerika, a ngwalwa. Mmago Timotheo e be e le Mojuda, ka gona mangwalo a makgethwa ao a ka bego a  mo rutile ona ge e be e sa le lesea e swanetše go ba e be e le Testamente ya Kgale, goba Mangwalo a Seheberu. (Ditiro 16:1) Ka ntle le pelaelo, ge Paulo a be a re “Lengwalo ka moka” o be a akaretša le Testamente ya Kgale ka moka, yeo e nago le melao ya dihlabelo le pego ya mašika.

Ka morago ga nywaga ya ka godimo ga e 1 900, re sa dutše re holwa ke dikarolo tše tša Beibele ka ditsela tše fapa-fapanego. Sa pele, re ka be re se na Beibele ge nkabe Modimo a se a ka a kgonthišetša gore e ngwalwe le go bolokwa ke batho bao yena a ba kgethilego. (Baroma 3:1, 2) Mehleng ya Isiraele ya bogologolo, Molao wa Moše e be e se feela motlwae wa setšo woo o bego o swanetše go bolokwa bakeng sa meloko e sa tlago eupša, ge e le gabotse, e be e le molaotheo wa setšhaba. Dintlha tša Molao tšeo di ka bonagalago di se bohlokwa go rena lehono di be di le bohlokwa bakeng sa phologo ya Isiraele ya bogologolo gotee le tshepedišo e botse ya setšhaba. Go feta moo, dipego tša mašika tšeo di lego ka Beibeleng di be di thuša go hlaola Mesia, yo go boletšwego ka yena e sa le pele gore e tla ba setlogolo sa Kgoši Dafida.—2 Samuele 7:12, 13; Luka 1:32; 3:23-31.

Gaešita le ge Bakriste ba se ka tlase ga Molao wa Moše, ba swanetše go bontšha tumelo go Mesia yo go boletšwego ka yena e sa le pele, e lego Jesu Kriste. Dipego tša mašika tša bogologolo tšeo di bolokilwego ka Beibeleng di hlatsela gore Jesu e be e le “morwa wa Dafida” yo a holofeditšwego. Le gona, dintlha tša mabapi le dihlabelo di nweletša go leboga ga rena sehlabelo se bohlokwa-hlokwa seo Jesu a se neilego, le go aga tumelo moholeng wa sona.—Baheberu 9:11, 12.

Paulo o ngwaletše phuthego ya Bokriste ya lekgolong la pele la nywaga ya Roma gore: “Dilo tšohle tšeo di ilego tša ngwalwa e sa le pele di ile tša ngwalelwa go re ruta, gore ka kgotlelelo ya rena le ka khomotšo e tšwago Mangwalong re be le kholofelo.” (Baroma 15:4) Temana ye e re gopotša gore Beibele e ngwaletšwe go hola rena eupša e sego go hola rena feela. Ka nywaga ya ka godimo ga e 3 500, mantšu a yona a buduletšwego a ile a hlahla, a ruta le go phošolla batho ba Modimo—lešokeng la Sinai, Nageng ya Kholofetšo, ge ba le bothopša Babilona, Mmušong wa Roma, gomme ga bjale lefaseng ka bophara. Ga go na puku e nngwe yeo e ka phethago seo. Go swana le medu ya moapola, go ka ba thata go lemoga bohlokwa bja dikarolo tše itšego tša Beibele di sa tloga fase. Go ka nyakega gore go dirwe nyakišišo e nyenyane e le gore go utollwe mohola woo, eupša go dira bjalo go ka tliša meputso e le ruri!

NA O KILE WA IPOTŠIŠA?

● Timotheo o be a e-na le nako e kaaka’ng a tseba “mangwalo a makgethwa”?​—2 Timotheo 3:15.

● Ke dikarolo dife tša Beibele tšeo di buduletšwego e bile di holago?​—2 Timotheo 3:16.

● Re ka holwa bjang ke “dilo tšohle tšeo di ilego tša ngwalwa e sa le pele”?​—Baroma 15:4.

[Diswantšho go letlakala 27]

Dintlha ka botlalo tša Beibele di nweletša go leboga ga rena sehlabelo seo Jesu a se neilego