Na o Nyaka go ba Mogwera wa Modimo?

● O be o ka araba potšišo yeo e lego ka mo godimo bjang? Ngwanenyana yo monyenyane wa motseng o lego lekatana wa Guerrero, Mexico, o boletše gore o be a sa nagane gore seo se be se kgonega. Banenyana ba babedi bao e lego Dihlatse tša Jehofa ba be ba mmontšha poroutšha ya O ka ba Mogwera wa Modimo! ka leleme la gabo. O ile a makatšwa ke gore e be e hwetšagala ka se-Tlapanec, ka ge a be a tseba dikgatišo tšeo di hwetšagalago ka se gagabo e le tša mmušo feela.

Banenyana bao ba babedi ba ile ba mmotša gore kgatišo yeo e be e le bohlatse bja gore Mmopi o a mo rata ka ge ka yona a ka kgona go mo tseba. O ile a thoma go bala thuto ya pele ka phagahlo, yeo e nago le sehlogo se se rego, “Modimo o go Laletša Gore o be Mogwera wa Gagwe.” Ge a feditše, o ile a re: “Ke nyaka go ba mogwera wa Modimo. Na le ka ntlela le Beibele?” Ge Dihlatse di mo tlela le Beibele, mmago ngwanenyana yo o ile a di kgopela gore di dule gomme di ba rute ka mo go oketšegilego.

Se-Tlapanec e fo ba le lengwe la maleme a 17 a India ao a hwetšwago Mexico moo poroutšha ya O ka ba Mogwera wa Modimo! e gatišwago ka ona. Lefaseng ka bophara, e hwetšagala ka maleme a 278 (go akaretša le ka Braille). Ge e ba o nyaka go hwetša kopi, o ka kgopela kopi ka go tlatša setlankana se se lego ka mo tlase gomme o se romele atereseng yeo e bontšhitšwego goba atereseng e swanetšego e lokeleditšwego go letlakala 5 la makasine wo.

□ Ka ntle le go itlama, hle ntlišetšeng kopi ya poroutšha yeo e bontšhitšwego mo.

□ Hle ikopanyeng le nna mabapi le thuto e sa lefelelwego ya legae ya Beibele.