Phela Bophelo bjo Bonolo le bjo bo Leka-lekanego

GO PHELA bophelo bjo bonolo le bjo bo leka-lekanego go putsa e le ka kgonthe. Eupša go akaretša’ng? Sa pele, o ka swanelwa ke go nagana ka dilo tše di tlago pele go wena. O ka dira seo bjang?

Ipotšiše gore: ‘Ke’ng seo ke šetšego ke se fihleletše? Ke’ng seo se swanetšego go dirwa?’ Lokeletša dipakane tša gago tše bohlokwa ka mo tlase:

1. ․․․․․

2. ․․․․․

3. ․․․․․

Lehono pono ya batho ka bophelo ke e kopana, e bile ba rata dilo tše di bonagalago. Ge e le gabotse, ba re: “A re jeng gomme re nweng, gobane gosasa re tla hwa.” (1 Bakorinthe 15:32) Ba dumela gore bophelo bja lehono bja go šoma e le gore o be le tšhelete e ntši gomme o tle o reke dilo tše dintši e fo ba e le tsela yeo bophelo bo swanetšego go ba ka yona. Lega go le bjalo, Beibele e thulana le kgopolo ye.

Go e nngwe ya dipapišo tša gagwe, Jesu o boletše ka monna yo a ilego a ikgobokeletša dithoto eupša a ilego a hwa pele a ka di diriša ka botlalo. “Go bjalo le ka motho yo a ikgobelelago lehumo, eupša a se a huma go Modimo.” (Luka 12:16-21) Na monna yo o be a dirile phošo ka go šoma ka thata gore a itlhokomele? Le gatee. Bothata e bile go tsepamiša kgopolo ya gagwe dilong tše di bonagalago. Ga se a ka a akaretša Modimo mererong ya gagwe. Ka baka leo, lehumo la gagwe ka moka—leo a le šometšego ka thata—mafelelong le be le ka se mo hole. Ruri seo se kweša bohloko!—Mmoledi 2:17-21; Mateo 16:26.

Go fapana le moo, Jesu o re laletša gore re šomele moputso wa neng le neng. O kgothaleditše gore: “Le se ke la šomela dijo tše di senyegago, eupša le šomele dijo tše di dulago go iša bophelong bjo bo sa felego.” (Johane 6:27) Pejana o boletše gore: “Modimo o ratile lefase kudu mo a ilego a gafa Morwa wa gagwe yo a tswetšwego a nnoši gore yo mongwe le yo mongwe yo a dumelago go yena a se ke a fedišwa, eupša a be le bophelo bjo bo sa felego.” (Johane 3:16) A moputso o kgahlišago gakaakang!

O ka Fenya Dipelaelo Bjang?

Jesu o ile a lemoga tshekamelo ya batho ya go tshwenyega ka dilo tše di bonagalago. Ka baka leo, o ile a kgothaletša barutiwa ba gagwe gore: “Lesang go nyaka seo le ka se jago le seo le ka se nwago, gomme le leseng go belaela ka go phoraphora; gobane tše ka moka ke dilo tše ditšhaba tša lefase di di phegelelago ka phišego, eupša Tatago lena  o tseba gore le nyaka dilo tše. Ka gona, le tsome mmušo wa gagwe ka mo go tšwelago pele, gomme dilo tše le tla di okeletšwa.”—Luka 12:29-31.

Mantšu a ao a kgothatšago a tutueleditše Bakriste ba bantši go nolofatša maphelo a bona. Juliet, yo a dulago Malaysia, o anega ka gore: “Mošomo wa-ka o be o ntapiša e bile o ntira gore ke gakanege. Ka gona, nna le monna wa-ka re ile ra rapela Jehofa gore a re thuše gore re nolofatše bophelo bja rena. Jehofa o ile a araba thapelo ya rena kapejana. Ka kgwedi feela, ke ile ka hwetša mošomo wa nakwana wa go ruta bana bao ba golofetšego.” Steve, yo a šomago mošomo wa go rulela nywako kua Australia, o ile a beakanya mošomo wa gagwe gore a fetše nako e ntši le lapa la gagwe dilong tša moya. Mosadi wa gagwe, Maureen, o hlalosa ka gore: “Ga bjale o thabile kudu, le rena re thabile. Bana ba rata seo! Le nna ke a se rata! Nolofatša dilo gomme lapa ka moka le a thaba.”

 Lega go le bjalo, ge e ba o lahlegetšwe ke mošomo gomme o le kgaufsi le go lahlegelwa ke legae la gago, go tloga go nyaka tumelo e tiilego go latela keletšo ya Jesu. Go sa dutše go le bjalo, ka go etiša dilo tša moya pele le go bota Modimo, le wena o ka phela bophelo bjo bonolo le bjo bo leka-lekanego. Go dira bjalo go tla go thuša go fihlelela ‘bophelo bja kgonthe’—bophelo bjo bo sa felego lefaseng la Modimo le lefsa la toko, moo mošomo o mongwe le o mongwe o tlago go thabelwa e bile e ka se bego wa lefeela.—1 Timotheo 6:17-19; Jesaya 65:21-23.

Na o tla rata go ithuta ka mo go oketšegilego mabapi le ‘bophelo bjo bja kgonthe’ bjoo Beibele e bo holofetšago? Ge e ba go le bjalo, ikopanye le Dihlatse tša Jehofa tša motseng wa geno, goba o ngwalele atereseng e swanetšego e lego go letlakala 5 la makasine wo.

[Ntlhakgolo go letlakala 25]

Lefaseng la Modimo le lefsa, mošomo o mongwe le o mongwe o tla thabelwa e bile e ka se be wa lefeela

[*Box on page 24]

NA O KA TŠWELETŠA MOŠOMO KA NTLE GA LEGAE?

Tše ke ditšhišinyo tšeo di ka šomago dikarolong tše dingwe tša lefase nakong ya bothata bja go hlokega ga mešomo:

● Go leta magae a batho ba bangwe (ge batho ba ile maikhutšong gomme ba nyaka gore legae la bona le hlokomelwe)

● Go hlwekiša: mabenkele; diofisi; magae le difolete ka morago ga go agiwa, ka morago ga go fsa, ka morago ga ge batho ba hudugile; mošomo wa ka ntlong (magaeng a ba bangwe); mafasetere (a mafelong a kgwebo le a ka gae)

● Go lokiša: dipaesekela; didirišwa tša mehuta ka moka (makgobapuku a na le dipuku tšeo go lego bonolo go di latela mabapi le go lokiša)

● Mešomo e fapa-fapanego: go aga dintlo; go tsenya diraka, mabati, go aga mathudi; go penta; go aga magora; go rulela

● Mošomo wa polaseng: go bjala, go fula dienywa

● Go lokiša lebala ka gare le go hlokomela dibjalo: diofising, dipankeng, mafelong a mabenkele le go di-atrium

● Go hlokomela thoto: bahlwekiši, mookamedi (ka dinako tše dingwe go akaretša le mafelo a bodulo a sa dulwego)

● Go tsenya mmete le mabato a lepolanka, go hlwekiša

● Go bula ditsejana tša dikuranta (go batho ba bagolo le bana) le ditirelo tše dingwe tša go rwalela batho dilo: diphatlalatšo tša tša papatšo, dikoloto tša bo-mmasepala

● Go huduša, go boloka thoto

● Go lokiša lebala, go sega dihlare ka tsela ya go di kgabiša, go hlokomela bjang, go sega dikgong

● Mootledi wa pese ya sekolo

● Go tšea diswantšho (go tšea diswantšho feela le ditiragalo tšeo di diregago phatlalatša)

● Go rekiša digoketši bakeng sa barei ba dihlapi

● Modiro wa go ananya dilo: go ananya dilo tša go lokiša koloi ka mošomo wa tša mohlagase, tša go roka ka tša go lokiša dipompi

Bakeng sa tsebišo e oketšegilego bona Phafoga! ya March 8, 1996, matlakala 3-11.

[Box/​Picture on page 25]

DITŠHIŠINYO TŠA GO TŠWELETŠA MOŠOMO KA GAE

Lebelela gore ke eng seo se nyakegago motseng wa geno. Botšiša baagišani. Gata mogato wa pele.

● Boledi, go hlokomela bana

● Go rekiša merogo e bjalwago gae goba matšoba; dijusi

● Go roka, go fokotša diaparo le go di lokiša

● Go direla bahlami mešongwana e itšego

● Go paka le go apea dijo

● Quilting, go loga ka lemao le tee, go loga ka mamao a mabedi; go dira macramé, go bopa dipitša; bokgabo bjo bongwe

● Go apeša ditulo

● Tshwaropukutlotlo, go tlanya, ditirelo tša ka gae tša khomphutha

● Tirelo ya go araba mogala

● Go lokiša meriri

● Go hiriša madulo

● Go ngwala diaterese le go tlaletša babapatši dienfelopo

● Go hlatswa dikoloi le go di pholetšha (motho o tliša koloi legaeng la gago)

● Go hlapiša seruiwaratwa le go se thobolla

● Go lokiša dikgonyu le go dira dinotlelo (lefelo la mošomo ka gae)

Tlhokomedišo: Go bontši bja mešomo yeo go boletšwego ka yona ka mo godimo, dipapatšo di ka dirwa ka ntle le tefo goba ka tefelo ya tlase ka matlakaleng a bapatšago theko a mafelo-bekeng goba ka go bea tsebišo letlapeng la ditsebišo mafelong a kgwebo.