Kopano ya Selete ya Dihlatse tša Jehofa ya “Dula o le Kgaufsi le Jehofa!”

● Dikopano tše tše dikete tša matšatši a mararo, tšeo di tlago go swarwa go dikologa lefase, di rulagantšwe go thoma mo Afrika Borwa ka September. Mo Afrika Borwa mananeo a letšatši le lengwe le le lengwe a tla thoma mmino ka 9:00 mesong. Sehlogo sa Labohlano, se se theilwego go Psalme 73:28, se re “Ke Natefêlwa ke xo ba Kxaufsi le Modimo.” Polelo ya modula-setulo e tla latelwa ke dipolelo tše rego, “Dikopano di re Thuša go Dula re le Kgaufsi le Jehofa” le “Morwa o Rata go re Utollela Yena.” Ke moka dipolelo tša tšhiedišano e rego “Ekiša Bao ba Ilego ba Dula ba le Kgaufsi le Jehofa” di tla ahla-ahla kamoo Aborahama, Ruthe, Hiskia le Maria ba ilego ba dira bjalo. Lenaneo la mesong le tla phetha ka polelo ya thwadi e rego, “Kamoo Jehofa a Batamelago Kgaufsi le Rena.”

Polelo ya mathomo ya Labohlano thapama e re “Dikarabo tša Dipotšišo Mabapi le Jehofa,” gomme e tla latelwa ke dipolelo tše di rego “Dumelela go Bopša ke Tayo ya Jehofa” le “O se ke wa ‘Galefela Jehofa.’” Go tla latela tšhiedišano ya dipolelo tše hlano e nago le sehlogo se se rego “Poledišano e Thuša Malapa go Dula a le Kgaufsi le Jehofa.” Dipolelo tše di na le dihlogo tše di rego: “Jehofa, Kono-kono ya Poledišano,” “Banna, Boledišanang le Basadi ba Lena!,” “Basadi, Boledišanang le Banna ba Lena!,” “Batswadi, Boledišanang le Bana ba Lena!” le “Bana, Boledišanang le Batswadi ba Lena!” Lenaneo la thapama le tla phetha ka polelo e rego “Tlholo e Utolla ‘Modimo yo a Phelago’!”

Sehlogo sa Mokibelo se re “Ó Kwana le Baloki,” gomme se theilwe go Diema 3:32. Tšhiedišano ya dipolelo tše hlano e nago le sehlogo se se rego “Thuša Batho go ‘Boelanywa le Modimo’” e tla akaretša dikarolo tše di rego “Ba Arogantšwe e Bile ga ba na Kholofelo,” “A ba Botšiša,” “Phetha Boikarabelo bja Gago Bjalo ka Mothuši wa Moebangedi,” “Ba Thope ka Boitshwaro bjo Bobotse,” le “Phegelela ka Phišego Maitekong a Gago.” Ka morago ga dipolelo tše di rego “Tirelo ya Nako e Tletšego e Tiiša Tswalano ya Gago le Jehofa” le “Bao ba Ratago Jehofa, ga ba na se ba Kgopišago,” lenaneo le tla phetha ka polelo ya kolobetšo, yeo ka morago ga yona go tla ba go lego sebaka sa gore bao ba swanelegago ba kolobetšwe.

Lenaneo la Mokibelo thapama le tla ba le tšhiedišano ya dipolelo tše seswai, “O se ke wa Dumelela Selo se go Tloša Kgaufsi le Jehofa”—“Maiteko a Sathane a sa Bonagalego,” “Go Ikgantšha,” “Tšhelete,” “Boemo bja tša Maphelo,” “Mošomo,” “Boitapološo,” “Lapa” le “Thekinolotši.” Terama e kgethegilego ya go theetšwa feela e nago le sehlogo se se rego “O se ke wa Felelwa ke Matla ge o Phošollwa ke Jehofa!” e tla latela. Lenaneo la letšatši le tla phetha ka polelo e rego “Dula Kgaufsi le Jehofa go Etša Jeremia.”

Sehlogo sa Sontaga, seo se theilwego go Jošua 23:8, se re “Le Gomarele Jehofa.” Ka morago ga kopelo ya mesong le thapelo, tšhiedišano e nago le sehlogo se se rego “Go Kgahlegela Semelo se se Rategago sa Jehofa” e tla seka-seka dika tše tše seswai—“O a Batamelega,” “O Kwela Bohloko,” “O Bontšha Kgahlego,” “O na le Seatla se se Bulegilego,” “Ga a Bebe Sefahlego,” “O a Lebalela,” “O na le Teka-tekano” le “O a Botega.” Go tla latela polelo ya phatlalatša e rego “O ka Batamela Bjang Kgaufsi le Modimo?” Lenaneo la mesong le tla phetha ka kakaretšo ya Thuto ya beke le beke ya Morokami.

Karolo e kgethegilego ya Sontaga Thapama ke terama ya moaparo o feletšego wa lekgolong la pele la nywaga. E mabapi le go tšhaba ga Bakriste Jerusalema gomme e na le sehlogo se se rego “Sepela ka Tumelo, e Sego ka go Bona.” Ka morago ga terama, kopano e tla phetha ka polelo e rego “Dula ‘Lefelong le le Utegilego la Yo Godimo-dimo.’”

Lokiša maemo a gago gona bjale e le gore o be gona. Bakeng sa go hwetša lefelo la kgaufsi le wena, ikgokaganye le Holo ya Mmušo ya Dihlatse tša Jehofa goba o ngwalele bagatiši ba makasine wo. Mokero wa Web wa www.pr418.com o na le lelokelelo la mafelo a dikopano tša selete a lefase ka bophara.