Pono ya Beibele

Batemona ke Bomang?

DIPOKO, dithuri, ditokološi, ditlotlwane, batemona, ke diphedi tša moya tšeo batho ba madumedi a fapa-fapanego ba dumelago go tšona le tšeo ba di lebelelago e le tše kgopo goba e le tše di lokilego goba e le tše kgopo e bile di lokile. Batho ba bangwe ga ba dumele go diphedi tša moya le ge e le dife ka gobane ba dumela gore e fo ba tumela-khwele goba selo seo motho a itlhamelago sona ka monaganong wa gagwe. Beibele e re’ng ka taba ye?

Beibele e ruta gore Mmopi ka boyena ke Moya le gore dibopiwa tša gagwe tša mathomo le tšona e be e le meoya. (Johane 4:24; Baheberu 1:13, 14) Go feta moo, Beibele e bolela ka meoya e kgopo, ka dinako tše dingwe e bolela ka yona e le batemona. (1 Bakorinthe 10:20, 21; Jakobo 2:19) Eupša ga e rute gore Modimo o bopile batemona. Ge e ba go le bjalo, gona batemona ke bomang gomme ba bile gona bjang?

“Barongwa Bao ba Ilego ba Dira Sebe”

Ge Modimo a be a bopa dibopiwa tša moya, o ile a di bopa di na le tokologo ya boikgethelo, di kgona go ikgethela go dira dilo tše di lokilego goba tše mpe. Ka manyami, ka morago ga go bopša ga batho, palo e sa tsebjego ya barongwa e ile ya kgetha go dira bobe ka go rabela go Modimo.

Sebopiwa sa mathomo sa moya se kgopo seo se ilego sa rabela se ile sa fetoga Sathane. Jesu Kriste o itše: “Ga se a ka a ema a tiile therešong.” (Johane 8:44) Ke’ng seo se ilego sa tutueletša Sathane go hlanogela Modimo? O ile a thoma go kganyoga borapedi bjo bo swanetšego Mmopi feela, ke moka a dira ka go dumelelana le kganyogo yeo ka go itira modimo wa lenaba. Ka tsela ye o ile a itira “Sathane,” e lego lentšu leo le bolelago gore “moganetši.” Nywaga-kgolo ka morago, pele ga Meetse-fula a mehleng ya Noa, barongwa ba bangwe ba ile ba tlatša Sathane, ba tlogela boemo bja bona legodimong gore ba be ka sebopego sa batho ke moka ba dule lefaseng. (Genesi 6:1-4; Jakobo 1:13-15) Nakong ya Meetse-fula, go bonagala “barongwa [bao] ba ilego ba dira sebe” bao ba bego ba iphetotše batho ba ile ba boela lefelong la moya. (2 Petro 2:4; Genesi 7:17-24) Ge nako e dutše e e-ya, ba ile ba bitšwa batemona.—Doiteronomio 32:17; Mareka 1:34.

Barongwa bao ba go se kwe ga bjale ba ile ba ikhwetša ba le boemong bjo bo fapanego kudu le bjoo ba bego ba bo thabela pele ga ge ba ka rabela. Juda 6 e balega ka gore: “Barongwa bao ba sa kago ba boloka boemo bja bona bja pele, eupša ba tlogetše bodulo bja bona bjo bo swanetšego [Modimo] o ba bolokile ditlemong tša neng le neng lefsifsing la kgampi bakeng sa kahlolo ya letšatši le legolo.” Ee, Modimo ga se a dumelela batemona bao go ba le ditokelo tšeo ba bego ba e-na le tšona pele kua legodimong, eupša o ile a ba lahlela “meleteng [ya seswantšhetšo] ya lefsifsi la kgampi,” a ba tloša seetšeng ka moka sa moya.

‘Ba Timetša Lefase ka Moka le go Agilwego go Lona’

Gaešita le ge ba thibetšwe go ka iphetoša batho gape, batemona ba sa dutše ba na le matla a magolo le tutuetšo menaganong le maphelong a batho. Ge e le gabotse, Sathane gotee le sehlopha sa gagwe sa batemona, o ‘timetša lefase ka moka le go agilwego go lona.’ (Kutollo 12:9; 16:14) Bjang? O diriša “dithuto tša batemona” ka tekanyo e kgolo. (1 Timotheo 4:1) Dithuto tše tša maaka tšeo gantši e lego tša bodumedi, di foufaditše menagano ya batho ba dimilione gore ba se bone therešo ka Modimo. (2 Bakorinthe 4:4) Ela hloko mehlala e mengwe.

● Thuto ya gore bahu ba a phela. Batemona ba diriša diriti, mantšu le ditiro tša bofora go fora batho gore ba dumele gore batho ba phelago ba ka boledišana le bahu. Go feta moo, maano a a bofora a tlatša maaka a gore moya o a phologa  ge motho a e-hwa. Lega go le bjalo, Beibele e bolela ka mo kwagalago gore: “Xo bahu xa xo se se tsebyaxo.” (Mmoledi 9:5, 6) Ge ba šetše ba ‘fologetše kwa go lego khomolelo,’ ga ba kgone le go tumiša Modimo.—Psalme 115:17. *

● Go hloka ditekanyetšo tša boitshwaro. 1 Johane 5:19 e re: “Lefase ka moka le rapaletše matleng a yo kgopo.” Sathane le batemona ba gagwe ba šomiša matla a bona ka go diriša mekero ya ditaba le mekgwa e mengwe go tšwetša pele kgopolo e mpe ya gore batho ba swanetše go fo itshwara ka go dumelelana le dikganyogo tša nama. (Baefeso 2:1-3) Ka go re’alo go hloka boitshwaro ga mohuta le ge e le ofe, go akaretša le boitshwaro bjo bo gobogilego bja botona le botshadi, go atile lehono. Mekgwa e bjalo e lebelelwa e tlwaelegile, mola ditekanyetšo tša Beibele gantši di lebelelwa di fetilwe ke nako goba di šaletše morago.

● Go dirišana le meoya. Moapostola Paulo o ile a kopana le ngwanenyana yo mongwe wa mohlanka, yo a bego a e-na le “motemona wa bonoge,” yoo a bego a dira gore a kgone go “ruiša beng ba gagwe ka leruo le lentši ka go noga ga gagwe.” (Ditiro 16:16) Paulo o ile a gana go theetša ngwanenyana yoo ka ge a be a tseba gore matla ao o be a a newa ke motemona. Go oketša moo, o be a sa nyake go kgopiša Modimo, yoo a lebelelago mehuta ka moka ya go dirišana le meoya—go akaretša bolepi bja dinaledi le bonoge—e le makgapha.—Doiteronomio 18:10-12.

Itšhireletše Kgahlanong le Batemona

O ka itšhireletša bjang kgahlanong le meoya e kgopo? Beibele e araba ka gore: “Ikokobeletšeng Modimo; eupša le ganetše Diabolo, o tla le tšhaba.” (Jakobo 4:7) Re theetša taelo yeo ge re phela ka go dumelelana le dithuto tšeo di hwetšwago ka Beibeleng, e lego puku e nnoši e kgethwa yeo e pepentšhago Sathane, batemona gotee le ‘maano a bona a bohwirihwiri.’ (Baefeso 6:11; 2 Bakorinthe 2:11) Le gona, Beibele e re botša gore meoya e kgopo gotee le bohle bao ba ganetšago Modimo ba ka se be gona ka mo go sa felego. (Baroma 16:20) Diema 2:21 e re: “Ba ba tl’o xo dula mo naxeng, ké baloki; ba ba tl’o xo šala bà le xôna, ké bôná ba-ila-bokxôpô.”

[Mongwalo wa tlase]

NA O KILE WA IPOTŠIŠA?

● Na Modimo o bopile batemona?—2 Petro 2:4.

● Na o ka boledišana le bahu?—Mmoledi 9:5, 6.

● O ka itšhireletša bjang kgahlanong le batemona?—Jakobo 4:7.

[Seswantšho go letlakala 13]

Batemona ba leka go tutuetša batho ka ditsela tše dintši