“Go ka Nyakega Koša Feela”

● Juliana e be e le motšofadi yo a rategago wa Mokriste kua Philippines yo a ilego a swarwa ke bolwetši bja go fokola ga bjoko (Alzheimer). O be a se sa hlwa a tseba gaešita le bana ba gagwe. Lega go le bjalo, ke be ke etela Juliana neng goba neng ge ke le lefelong leo.

Juliana o be a sa kgone go tsoga malaong gomme o be a fo lebelela ka ntle ka lefasetere. Go be go le thata go ba le yena, ka ge a be a se sa nkgopola. O be a ntebelela a butše mahlo, eupša go be go se na tlhasenyana ya gore o a nkgopola. Ke ile ka mmotšiša gore: “Na o sa dutše o nagana ka Jehofa?” Ke ile ka mo anegela selo se itšego seo se diragetšego bodireding gomme ka mmotšiša dipotšišo tše mmalwa, eupša go be go se na leswao la go bontšha gore o kwešišitše. Ka gona, ke ile ka thoma go opela koša. Seo se ilego sa direga ka morago se be se tloga se kgoma pelo.

Juliana o ile a retološa hlogo, a ntebelela gomme a thoma go opela le nna! Go se go ye kae, ke ile ka swanelwa ke go kgaotša go opela ka gobane ke be ke sa tsebe ka hlogo mantšu ka moka a koša yeo ka leleme la lefelong leo la Setagalog. Eupša Juliana o ile a tšwela pele a opela. O be a gopola methaladi ka moka e meraro ya koša yeo. Kapejana ke ile ka kgopela yo ke bego ke na le yena ge e ba a ka ya go yo adima puku ya dikopelo go Hlatse yeo e bego e dula kgaufsi le Juliana. O ile a tla le yona gatee-tee. Ke be ke sa tsebe gore kopelo yeo e letlakaleng lefe eupša go ile gwa direga gore ke bule letlakaleng le le swanetšego. Mo nakong ye re ile ra opela gotee kopelo yeo ka moka ga yona! Ge ke botšiša Juliana ge e ba a sa gopola dikoša le ge e le dife tše dingwe, o ile a thoma go opela koša ya kgale ya kua Philippines yeo e bolelago ka lerato.

Ke ile ka re: “Aowa Juliana, e sego koša yeo e opelwago seyalemoyeng eupša yeo e opelwago Holong ya Mmušo.” * Ke moka ke ile ka thoma go opela koša e nngwe go tšwa pukung ya rena ya dikopelo gomme o ile a thoma go opela le nna. Mahlo a gagwe a be a tletše lethabo. O be a se sa ntebeletše ka go makala, gomme o be a myemyela kudu.

Ka nako ye, baagišani ba be ba tšwetše ka ntle go yo bona gore moopelo woo o be o e-tšwa kae. Ba ile ba ema lefasetereng ba re lebelela gomme ba re theetša. Go be go thabiša go bona kamoo mmino o bego o kgomile Juliana pelo ka gona! Seo se ile sa mo dira gore a gopole mantšu a koša yeo.

Ke ithutile phihlelong ye gore o ka se tsebe seo se tlago go phuleletša lefsifsing gomme sa fihlelela batho bao gantši ba sa kgonego go kwešiša goba go bolela. Go ka nyakega koša feela.

Go se go ye kae ka morago ga seo se diragetšego ka mo godimo, Juliana o ile a hwa. Ke ile ka gopotšwa phihlelo ye ke ge ke be ke theeditše mmino o mofsa o gatišitšwego o kgomago maikwelo woo o lokolotšwego ke Dihlatse tša Jehofa ka 2009. O ka botšiša Dihlatse tša Jehofa tša lefelong la geno mabapi le kamoo o ka hwetšago dikgatišo tše tše di kgahlišago le tšeo di kgomago maikwelo.

[Mongwalo wa tlase]