Kamoo o ka Hwetšago Ditharollo

GE E ba o lewa ke bodutu, e ka ba mo go holago go ipotšiša gore: ‘Na go na le dilo tšeo nka di dirago e le gore ke kaonefatše boemo? Na e ka ba e le gore ke swanetše go dira diphetogo tše itšego bophelong bja-ka? Ge e ba go le bjalo, diphetogo tšeo ke dife?’ Dipotšišo tše di latelago di ka go thuša go itlhahloba gomme wa hwetša ditharollo tše di kgotsofatšago.

Na ke Swanetše go Fetoša Pono Ya-ka?

Motho le ge e le mang a ka lewa ke bodutu. Eupša maikwelo a ao a sa thabišego e ba bothata bja kgonthe ge feela a phegelela. Ge e ba a phegelela, e ka ba e le leswao la go go lemoša gore go na le selo se itšego seo se fošagetšego ka pono ya gago ka bophelo. Modu wa bothata e ka ba e le tsela yeo o itshwarago ka yona ge o le gare ga batho ba bangwe. Batho ba bangwe ka go se ikemišetše go ka ba bjalo ka ge eka ba ikageletša ka terata ya go hlaba, ba thibela batho ba bangwe go gwerana le bona. Ka dinako tše dingwe, selo feela seo se nyakegago ke gore o fetoše pono ya gago.

Ela hloko phihlelo ya Sabine ge a be a hudugela Engelane. O itše: “Go tšea nako gore bagwera ba bafsa ba botane, moo ba ka lokologago gomme ba kgonthišega ge ba le gotee. Ke ka baka la’ng o sa botšiše ba bangwe ka gore ba gotše bjang goba ka setlogo sa bona? Ke ile ka botšwa gore: ‘Ga go na setšo seo se nepagetšego. Tšea selo se sekaone ditšong ka moka.’” Ee, go etša ge Sabine a ile a kgothaletšwa go dira, ditšong tša ba bangwe o ka nyaka go hwetša dika tšeo di ka go holago ge o di ekiša.

Na ke Ipea Lekatana?

O ka ipotšiša gore: ‘Na ke na le tshekamelo ya go ipea lekatana? Na batho ba be ba tla mpontšha bogwera ge e ba ke be ke ba bontšha bogwera?’ Ge e ba o nagana gore go ka ba go le bjalo, gona dira boiteko bja go bontšha bogwera. Roselise wa nywaga e 30 yo a ilego a hudugela Engelane a etšwa  Guadeloupe, o itše: “Batho bao ba lewago ke bodutu ba na le tshekamelo ya go ipea lekatana.” Ka gona o ile a eletša ka gore: “Nyaka ba bangwe bao le bona ba bonagalago ba lewa ke bodutu. Gata mogato wa pele gomme o bolele le bona. Ka dinako tše dingwe, go fo nyakega gore o botšiše potšišo gore o thome segwera seo se swarelelago.”

Lega go le bjalo, go dira segwera sa kgaufsi go nyaka nako le maiteko. Tsela e botse ya go thoma ke go ithuta go theetša. Ka go theetša ka kelohloko, o tla ba boemong bjo bokaone bja go bolela ka dilo tšeo di kgahlago motho yo mongwe. Gopola gore go ba le kwelobohloko go dira gore go be le segwera!

Na ke na le Bothata bja go Nagana ka Tsela e Fošagetšego?

Go itšeela fase e ka ba lepheko la gore o se ke wa dira segwera. Ipotšiše gore: ‘Na ke na le tshekamelo e feteletšego ya go nagana ka nna ka tsela e fošagetšego?’ Abigaïl wa nywaga e 15 yo a tšwago Ghana, o dumela ka gore: “Ka dinako tše dingwe ke be ke na le dikgopolo tše di fošagetšego tšeo di bego di dira gore ke lewe ke bodutu. Ke ile ka ikwa ke sa ratwe e bile ke se na mohola.” O ka kgonthišega gore ge e ba o batamela ba bangwe gomme o ba thuša ka tsela e itšego, ba ka se go tšee o le yo a se nago mohola. Ba ka arabela ka gore ba gwerane le wena. Ka gona, ke ka baka la’ng o sa gate mogato wa pele?

Go nagana ka tsela e nepagetšego go tla go thuša gape gore o gwerane le batho bao e sego dithaka tša gago. Go gwerana le motho yo go bonagalago e le yo mogolo goba yo monyenyane go wena e ka ba mo go putsago. Selo se segolo seo se thušitšego Abigaïl yo mofsa go fenya go lewa ga gagwe ke bodutu ke gore o ile a leka go hwetša bagwera bao ba mo fetago. O hlalositše gore: “Ke ile ka holwa ke phihlelo ya bona.”

Na ke a Ikarola?

Batho ba bantši bao ba lewago ke bodutu ba ikwa ba imologile ka tekanyo e itšego ka go bogela TV goba go bapala dipapadi tša bidio ka nako e telele goba ka go fetša diiri tše dintši dikhomphutheng tša bona. Eupša ge ba tima dilo tše, ba sa lewa ke bodutu go etša peleng. Elsa wa nywaga e 21 yo a tšwago Paris, o dumela ka gore: “Thelebišene le dipapadi tša bidio di ka ba bjalo ka sehlare-tagi seo se kgomago motho go fihla moo a se sa nyakago go gwerana le batho.”

Bothata ka go bogela TV ke gore ga e dire gore go be le tswalano, go abelanwa ga dikgopolo goba dibaka tša go dira segwera. Go a swana le ka  dipapadi tša bidio—di iša batho lefaseng la boikgopolelo leo le nyamelelago ge ba thoma ba tlogela go bapala. Go fetleka Inthanete ka ntle le morero go ka dira gore motho a pheme go lebeletšana le boemo bja kgonthe, eupša go ka dira le gore a gahlane le dilo tšeo di lego mabapi le boitshwaro bjo bo gobogilego goba batho bao ba utago seo ba lego sona. Inthanete ga se lefelo le le botse la go hwetša goba go hlagolela segwera sa kgonthe.

Na ke Tsoma Molekane wa Lenyalo?

Batho ba bangwe bao ba sego lenyalong ba ka nyaka go tsena lenyalong feela e le go alafa go lewa ke bodutu. Ke therešo gore molekane yo botho le yo a nago le lerato a ka go tlišetša lethabo le legolo bophelong bja gago, eupša ela hloko gore o se ke wa kitimela go tšea phetho yeo e bohlokwa e bjalo ka go tsena lenyalong.

Ga se gore lenyalo ke tharollo ya bothata bja go lewa ke bodutu. Go bolelwa gore banyalani bao ba nago le bothata bja poledišano ba “gare ga batho bao ba lewago ke bodutu kudu lefaseng.” Ka manyami, go na le batho ba bantši bao ba lego boemong bjo bo bjalo go feta kamoo motho a ka naganago ka gona. Ka gona ge e ba ka letšatši le lengwe o nyaka go tsena lenyalong, ke ka baka la’ng o sa thome ka go rarolla bothata bja gago bja go lewa ke bodutu pele ga ge o ka ratana le motho yo mongwe? Ka go fetoša boemo bja gago bja kgopolo le mekgwa ya gago gotee le ka go gata mogato wa pele wa go gwerana le batho ge o sa dutše o se lenyalong, o ka ba o thea motheo o tiilego wa lenyalo leo le nago le lethabo.

O ka Lebeletšana ka Katlego le go Lewa ke Bodutu

Go ka fo se be le tharollo ya kapejana ya go lewa ga gago ke bodutu. Eupša o ka lebeletšana ka katlego le seo ka gore o latele Molao wa Gauta woo Jesu a o boletšego. O itše: “Ka baka leo, dilo tšohle, tše le nyakago batho ba le dira tšona, le lena ka mo go swanago le ba dire tšona.” (Mateo 7:12) Ka gona ge e ba o nyaka gore ba bangwe ba go bontšhe segwera, le wena ba bontšhe segwera. Ge o nyaka gore batho ba bangwe ba go ntšhetše sa mafahleng a bona, le wena dira bjalo. Ba bangwe ba ka fo se arabele gatee-tee, eupša ge nako e dutše e tšwela pele ba bangwe ba tla dira bjalo. Gaešita le ge ba sa arabele, o tla thaba ka gobane o ile wa leka.

Jesu o boletše therešo e nngwe ya bohlokwa  yeo e ka go thušago go lebeletšana ka katlego le go lewa ke bodutu, o itše: “Go na le lethabo le legolo go neeng go feta go amogeleng.” (Ditiro 20:35) Ge e ba o neela nako ya gago go thuša ba bangwe—e ka ba e le go thuša ngwana ka mošomo wa gae wa sekolo goba motho yo a tšofetšego ka go mo yela mabenkeleng goba go hlwekiša ntlo ya gagwe goba serapana sa gagwe—o tla ikwa o thabile kudu e bile mohlomongwe wa thoma segwera sa kgonthe.

Go Hwetša Mogwera yo Mokaone-kaone

Go na le ditsela tše dingwe tšeo di šomago tša go lebeletšana ka katlego le go lewa ke bodutu. E-tšwa ka ntlong. Ge e ba go kgonega sepela-sepela phakeng goba kua nageng. Ge o le noši ka gae, diriša nako ya gago ka go dira dilo tšeo di holago, tše bjalo ka go roka, go dira mešomo ya ka gae, go lokiša dilo goba go bala. Motho yo mongwe o ile a ngwala gore: “Ga go na kgateletšego yeo e ilego ya ntlela yeo e sa kago ya tlošwa ke go fetša iri ke bala.” Ba bantši ba ile ba hwetša khomotšo ka go bala dipsalme tša ka Beibeleng.

Ditsebi di lemogile gore go gwerana le batho ba bodumedi bja gago go ka go thuša go fenya bodutu e bile go ka go thuša tabeng ya tša maphelo. O ka hwetša kae batho bao ba katanelago go latela Molao wa Gauta? Ka pukung ya mabapi le mekgatlo ya bodumedi, motho yo a sa tšeego lehlakore o ngwadile gore: “Dihlatse [tša Jehofa] bophelong bja tšona bja ge di le gotee di bopa setšhaba seo se botanago le go amogelana.”

Jesu o ile a bolela ka seo se ka bitšwago leswao leo le hlaolago Bakriste ba therešo ge a be a botša barutiwa ba gagwe gore: “Bohle ba tla tseba ka se gore le barutiwa ba-ka, ge e ba le ratana.” (Johane 13:35) Lerato le, e lego la go rata Modimo pele ke moka wa rata badumedi-gotee le wena ke lona leo ka mo go kgethegilego le hlaolago bao ba lego bodumeding bja therešo.—Mateo 22:37-39.

Go gwerana le Modimo ke tsela e kaone-kaone ya go lebeletšana le go lewa ke bodutu. Ge Modimo e le mogwera wa gago, le ka mohla ga se wa swanela go ikwa o lewa ke bodutu!—Baroma 8:38, 39; Baheberu 13:5, 6.

[Box/​Picture on page 24]

KAMOO KE FENYAGO GO LEWA GA-KA KE BODUTU

Anny, mohlologadi: “Ke leka go laola tsela yeo ke naganago ka yona le go bona seo se kgahlišago ka boemo bja-ka.”

Carmen, ga se a nyalwa: “Ke ithutile gore ke se ke ka lebiša tlhokomelo kudu dilong tša nakong e fetilego eupša ke tšwele pele ka bophelo gomme ke dire bagwera ba bafsa.”

Fernande, mohlologadi: “Ge e ba o dira boiteko bja go thuša ba bangwe, o lebala mathata a gago.”

Jean-Pierre, ga se a nyala: “Gantši ke sepela-sepela ka nako e telele, e lego nako yeo ka yona ke ntšhetšago Modimo sa mafahleng a-ka ka thapelo.”

Bernard, mohlolo: “Ke ikgokaganya le bagwera ba-ka ka mogala, ga ke dire seo gore ke gopole dilo tšeo di nyamišago, eupša ke dira seo e le gore ke thabele go boledišana le batho.”

David, ga se a nyala: “Gaešita le ge ka tlhago ke thabela go dula ke nnoši, ke ile ka dira boiteko bjo bo kgethegilego bja gore ke boledišane le ba bangwe.”

Lorenna, ga se a nyalwa: “Ke gata mogato wa pele wa go batamela batho gomme ke dire segwera le bona.”

Abigaïl wa nywaga e 15: “Ke fetša nako ke na le bagwera bao ba godilego gomme ke holwa ke phihlelo ya bona.”

Cherry, ga se a nyalwa: “Ke hweditše gore ge e ba o botša batho gore o lewa ke bodutu, ba dira boiteko bjo bo oketšegilego bja go gwerana le wena.”

[Box/​Picture on page 25]

MEGATO YA GO FENYA GO LEWA KE BODUTU

● Hlagolela go ba le pono e nepagetšego

● Lekanyetša boitapološo bjo bo go beago lekatana, bjalo ka go bogela TV

● Nyaka bagwera bao ba nago le ditekanyetšo tšeo di swanago le tša gago, go akaretša bao e sego dithaka tša gago

● Go feta tšohle, nyaka go gwerana le Modimo

[Seswantšho go letlakala 23]

Gwerana le batho bao e sego dithaka tša gago