“Le se ke la Belaela ka Letšatši le le Latelago”

Renée o be a nolegile moko. Monna wa gagwe e lego Matthew o be a dutše a se na mošomo o tsepamego ka nywaga e fetago e meraro. Renée o gopola ka gore: “Ke be ke tshwenyegile kudu. Go se tsebe seo se bego se tla direga go ile gwa nnyamiša kudu!” Matthew o ile a leka go okobatša go tshwenyega ga mosadi wa gagwe ka go mo hlalosetša gore ka mehla ba be ba hwetša dilo tšeo ba di hlokago. Renée o ile a fetola ka gore: “Eupša o sa dutše o sa šome! Re hloka tšhelete!”

GO LAHLEGELWA ke mošomo go baka go tshwenyega mo go sa phemegego. Motho yo a feletšwego ke mošomo o ipotšiša gore: ‘Ke tla fetša nako e kae ke se na mošomo? Re ka hlokomela bjang ditlhoko tša malapa a rena mo nakong ye?’

Gaešita le ge go tshwenyega mo go bjalo go tlwaelegile, Jesu Kriste o ile a nea keletšo e šomago yeo e ka fokotšago go tshwenyega. O itše: “Le se ke la belaela ka letšatši le le latelago . . . Letšatši le lengwe le le lengwe le lekanwe ke bošula bja lona.”—Mateo 6:34.

Tseba Dilo Tšeo o di Boifago

Jesu o be a sa re gore re swanetše go dira dilo bjalo ka ge eka ga re na bothata. Lega go le bjalo, go tshwenyega ka seo se ka diregago ka moswana go tlo fo oketša go dilo tšeo re tshwenyegago ka tšona lehono. Therešo ke gore ga re kgone go laola dilo tšeo di ka diregago ka moswana, e ka ba tše dibotse goba tše mpe. Eupša re ka kgona go dira se itšego bakeng sa go lebeletšana le seo se diregago lehono.

Ruri go thata go kgaotša go belaela gaešita le ge re nyaka go dira bjalo. Rebekah, yoo monna wa gagwe a  lahlegetšwego ke mošomo wo a o šomilego ka nywaga e 12, o re: “Ge o gateletšegile maikwelong kudu, go thata go nagana dilo gabotse. Eupša re ile ra swanelwa ke go dira bjalo. Ka gona ke ile ka leka go itshwara. Ge dilo tšeo ke bego ke tloga ke boifa gore di tla direga di be di sa direge, ke ile ka bona gore go tshwenyega ga go thuše ka selo. Ka go lebiša tlhokomelo dilong tšeo di bego di direga ka nako yeo le mathata a gona, re ile ra tloša kgateletšego ka moka.”

Ipotšiše: ‘Ke’ng seo ke se boifago kudu? Go na le kgonagalo e kaaka’ng ya gore selo seo ke se boifago se tla direga? Ke diriša matla a makaaka’ng ke tshwenyega ka selo seo se ka diregago goba se ka se diregego?’

Ithute go Kgotsofalela Seo o Nago le Sona

Pono ya rena e ka kgoma kamoo re ikwago ka gona. Ka go re’alo, Beibele e re kgothaletša go ba le boemo bjo bja kgopolo: “Ge re e-na le dijo le diaparo re tla kgotsofala ka tšona.” (1 Timotheo 6:8) Go kgotsofala go bolela go lekanyetša dilo tšeo re di nyakago le go kgotsofala ge re hweditše dilo tšeo re di hlokago letšatši le letšatši. Go katanela go kgotsofatša kganyogo ya go ba le dilo tše dintši go tla fo fokodiša maiteko a gago a go nolofatša bophelo.—Mareka 4:19.

Renée o ile a kgona go ithuta go kgotsofalela seo a nago le sona ka morago ga gore a lebelele boemo bja gagwe ka pono e nepagetšego. O re: “Ga se ra ka ra felelwa ke mohlagase goba makhura goba ra hloka bodulo. Bothata bjo bogolo ke gore re be re se ra tlwaela go phela ka tsela ye gomme kganyogo ya-ka e fošagetšego ya gore re phele go etša mathomong e ile ya gakatša kgateletšego ya-ka.”

Go se go ye kae, Renée o ile a lemoga gore e be e le pono ya gagwe yeo e bego e dira gore dilo di bonagale di sa kgotlelelege, e sego maemo a gagwe. O re: “Ke ile ka swanelwa ke go lebeletšana le go ba ga kgonthe ga boemo bja rena le gore ke se hlwe ke nagana ka tsela yeo ke bego ke nyaka gore bo be ka gona. Ka morago ga gore ke kgotsofalele seo Modimo a bego a re nea sona letšatši le lengwe le le lengwe, ke ile ka ikwa ke thabile kudu.”

Ipotšiše: ‘Na dilo tšeo ke di hlokago lehono ke di hweditše? Ge e ba go le bjalo, na nka nagana ka letšatši la lehono feela gomme ka tlogela go tshwenyega ka la ka moswana ke tseba gore le gona ke tla hwetša tšeo ke di hlokago?’

Go ba le pono e nepagetšego ke mogato wa pele wa go lebeletšana ka katlego le tlhohlo ya go phela ka tšhelete e nyenyane. * Eupša ke megato efe e šomago yeo o ka e gatago ge e ba o hwetša tšhelete e nyenyane ka baka la ge o sa šome?

[Mongwalo wa tlase]

[Lepokisi go letlakala 5]

Go Phegelela go a Putsa

Ka morago ga gore Fred a tsome mošomo ka dibeke-beke gomme a sa o hwetše, o ile a kwa eka mejako ka moka ya dibaka tša go hwetša mošomo e be e tswaletšwe. O re: “Go be go swana le go letela motho boema-peseng gore a tle a go tšee gomme gwa se tle motho.” Fred o ile a phetha ka go laola selo seo a bego a ka kgona go se laola—ditiro tša gagwe. O ile a romela lengwalo la ditshwanelego tša mošomo (CV) khamphaning e nngwe le e nngwe gaešita le go yeo go bego go bonagala e sa hloke bokgoni bja mošomo wo a bego a o tseba. O ile a latelela diphetolo ka moka gomme a itokiša ka mo go tseneletšego nakong e nngwe le e nngwe ge a e-ya go hlahlobelwa mošomo, a kgodišegile gore “’kêlêllô tša serôtô di iša mokhoreng; e a pôtlakaxo ó y’o hlôka.” (Diema 21:5) Fred o re: “Khamphaning e nngwe ke ile ka ya go yo hlahlobelwa mošomo ka makga a mabedi moo ke ilego ka botšološišwa ke balaodi ba maemo a godimo.” Eupša go phegelela ga Fred go ile gwa mo putsa. O re: “Ke ile ka thwalwa.”

 [Box/​Picture on page 6]

Selo sa Bohlokwa Kudu go Feta Tšhelete

Na sa bohlokwa kudu go wena ke boitshwaro bja gago goba tšhelete ya gago? Ela hloko diema tše tše pedi tša Beibele.

“Modiidi xe a swere tsela ya xo loka, ó phala mohumi wa xo kxopamiša tsela.”—Diema 28:6.

“Xo ja morôxo rè ratana, xo phala mola xò hlabilwe kxomo e nonnexo rè hlôyana.”—Diema 15:17.

Go molaleng gore go lahlegelwa ke mošomo ga go fediše go botega ga motho boitshwarong le bohlokwa bja go dira bjalo. Ka go re’alo, ka morago ga gore monna wa Renée a lahlegelwe ke mošomo, Renée o ile a botša bana ba gagwe gore: “Botate ba bantši ba tlogetše malapa a bona. Eupša tatago lena o sa dutše a le hlokometše. Le tseba kamoo a le ratago kudu ka gona gomme o le thušitše mathateng a lena ka moka. Ruri le na le tate wa paala!”