Na le Bopilwe?

Lephego la Seboba

● Diboba tše dingwe di kgona go akalala ka metsotswana e 30 ka ntle le go ya godimo goba fase. Di kgona bjang? Di kgona se ka go diriša maphego a tšona ao a dirago gore moya o fete gabonolo, e lego ao a sa swanego le maphego le ge e le afe ao a hlamilwego ke intaseteri ya difofane.

Ela hloko: Lephego le lenyenyane le le lesesane la seboba le na le mašošo ao a dirago gore le se ke la kobega. Bo-rathutamahlale ba hweditše gore mašošo ao a bile a dira gore seboba se kgone go fofela godimo ge se dutše se akaletše. Makasine wa New Scientist o re: “Se ke ka gobane moya o dikologa ka dikgobeng tšeo di lego ka gare ga mašošo, wa dira gore se se ke sa thatafalelwa ke go akalala moo go thušago moya woo o fokago go putlaganya maphegong a sona.”

Ka morago ga go ithuta ka lephego la seboba, moentšeneare wa difofa-moyeng e lego Abel Vargas gotee le badirišani ba gagwe, ba phethile ka gore: “Maphego ao a hlangwago e le ge go ekišwa a diphedi a thuša kudu ge go hlangwa dilo tše dinyenyane tšeo di fofago.” Ge dilo tše bjalo tšeo di fofago tšeo di lekanago le seatla sa motho di ka tsenywa dikhamera goba didirišwa tše dingwe, di ka ba le mehola e mentši, go tloga go go hwetša tsebišo mafelong ao go ona go diregago dikotsi go ya go go bea leihlo tekanyo yeo tšhilafalo e diregago ka yona.

O nagana eng? Na lephego le lenyenyane le le lesesane la seboba leo le nago le mašošo le bile gona ka go fo itiragalela? Goba na le bopilwe?

[Seswantšho go letlakala 16]

Sedirišwa se senyenyane sa elektroniki seo se dirilwego go ekišwa seboba (sefofa-moyeng se senyenyane) se imela dimiligrama tše 120, ke sa bophara bja disenthimithara tše tshela gomme se na le maphego a masesane ao a phurologilego ao a yago godimo le fase ge se tsentšwe mohlagaseng

[Mothopo]

© Philippe Psaila/Photo Researchers, Inc.