“Thuto ya Beibele e Hola Difoa”

PEGO yeo e nago le sehlogo se e ile ya gatišwa ka makasineng wa difoa kua Repabliking ya Czech. Mongwadi wa yona e lego Zdeněk Straka, o ile a reta Dihlatse tša Jehofa tšeo di ithutilego polelo ya diatla e le gore di ka thuša difoa.

Ke’ng seo se ilego sa tutueletša Morena Straka go ngwala pego ya mohuta wo? Ka 2006, o ile a ya kopanong ya selete ya Dihlatse tša Jehofa kua Prague, moo lenaneo le bego le fetolelwa ka polelo ya diatla bakeng sa go hola difoa tše ka bago tše 70 tšeo di bego di le gona. Ngwaga le ngwaga, Dihlatse tša Jehofa di rulaganya dikopano lefaseng ka bophara go nea thuto ya Beibele gotee le segwera seo se agago. Le difoa di a akaretšwa. Ngwageng o mongwe wa morago bjale, dikopanong tše tše 96 dipolelo  di be di newa ka polelo ya diatla feela go dikologa lefase gomme mafelong a mangwe a ka bago a 95, lenaneo le be le fetolelwa ka polelo ya diatla.

Nakong ya kopano kua Prague, phuthego yeo e dirišago polelo ya diatla toropong yeo e be swara dithuto tša Beibele le difoa tše ka bago tše 30. Bao ba ithutago Beibele ba holwa ke seo ba ithutago sona, go etša ge phihlelo e latelago e bontšha.

Markéta o sepela dikhilomithara tše fetago tše 100 beke e nngwe le e nngwe go yo swara thuto ya Beibele le mosadi wa sefoa yo a tšwago Mongolia. Polelo ya diatla ya Czech le ya Mongolia ga di swane, ka go re’alo go nyakega gore Markéta a diriše bokgoni go dira gore morutwana wa gagwe a kwešiše seo a ithutago sona. Ka gona, maiteko a Markéta a ile a putswa. Ge morutwana wa Markéta a be a imile ngwana wa gagwe wa bobedi, o ile a nagana go ntšha mpa eupša o ile a fetoša monagano. Markéta o re: “Ge ke be ke mmotšiša ka taba ye, o ile a nkaraba ka gore, ‘Jehofa ga a rate ge motho a ntšha mpa.’ Ke be ke thabišitšwe ke go bona gore o be a kwešiša pono ya Modimo ka bophelo!” *

Lefaseng ka bophara, difoa tše dintši di hwetša tsebo e nepagetšego ya Modimo ka go ithuta Lentšu la gagwe. Ge di dutše di batamela kgaufsi le Modimo wa tšona le go hwetša lethabo le le oketšegilego bophelong, bophelo bja tšona e ba bjo bo kaone.—Jesaya 48:17, 18.

[Mongwalo wa tlase]

[Lepokisi go letlakala 10, 11]

NA O BE O TSEBA?

● Dihlatse tša Jehofa di gatiša mananeo a DVD ka maleme a 43 a polelo ya diatla. Tsebišo ya difoa yeo e ka tšewago Inthaneteng le yona e ka hwetšwa mokerong wa Web wa www.pr418.com.

● E le go dira gore dikgatišo tše di oketšegilego di hwetšagale bakeng sa difoa, Dihlatse tša Jehofa di rulagantše dihlopha tše 59 tša bafetoledi ba polelo ya diatla lefaseng ka bophara.

● Go na le diphuthego tša Dihlatse tša Jehofa tše di fetago 1 200 tša polelo ya diatla lefaseng ka bophara.

[Seswantšho go letlakala 10]

(Bakeng sa mongwalo o beakantšwego ka mokgwa wa kgatišo, bona kgatišo ka boyona)

www.pr418.com