Batho Bao o ka ba Botago

Santiago, e lego mootledi wa thekisi kua Argentina, ga se a ka a swanelwa ke go naganišiša ka seo a bego a tla se dira. Ge go be go tlogetšwe mokotla ka thekising ya gagwe, o ile a fo o bušetša go mong wa wona. Tiro ya Santiago e ka bonagala e le e tlwaelegilego, ntle le taba ya gore mokotla o be o ena le tšhelete yeo e fetago $32 000!

NA O ka akanya ka lefase le tletše ka batho ba botegago? Ruri bophelo e be e tla ba bjo bo fapanego! O be o ka tlogela ngwana wa gago le moledi ntle le go boifa. O be o ka se nyake dinotlelo tša ntlo goba dikgonyu mejakong ya gago. Na seo e fo ba toro feela?

Mafelelo a Ditekanyetšo tša Boitshwaro

Moapostola wa Mokriste Paulo o ile a bolela ka yena le Bakristegotee gore: “Re holofela gore re na le letswalo le botegago, ka ge re rata go itshwara ka go botega dilong tšohle.” (Baheberu 13:18) Se ke seo Dihlatse tša Jehofa di katanelago go se dira. Maikemišetšo a tšona ke go phela ka dika tšeo di hlalositšwego go Jesaya 33:15 e rego: “Go na le motho yo a sepelago ka toko a sa kgaotše le yo a bolelago tše di lokilego, yo a ganago go boelwa ka boradia, yo a ganetšago seatla sa gagwe go tšea letsogo-le-kobong.” Ke bjang ba bangwe ba latetšego tsela ye e botegago ya bophelo?

● ‘Bolela tše di lokilego.’ Domingo, e lego yo mongwe wa Dihlatse tša Jehofa, o šoma Philippines mašemong a copra. O bolela gore: “Batho ba bantši ga ba botegele bathwadi ba bona. Ka mohlala, ge ba kgoboketša copra, ga ba botše mothwadi wa bona gore ge e le gabotse ba kgobokeditše mekotla e mekae. Ka go dira bjalo, ba ka kgona gore ka megabaru ba rekiše e mengwe ka thoko.”

Domingo le lapa la gagwe ba nyakile ba rakwa mašemong ka gobane ba be ba sa nyake go bolela maaka ka dipalo tša mekotla yeo e tšweleditšwego. Lega go le bjalo, Domingo o re: “Re boditše mothwadi wa rena gore gaešita le ge se se bolela gore re tla rakwa, re ka se bolele maaka. Mafelelong, mothwadi wa rena o ile a re Dihlatse tša Jehofa ke batho ba go loka bao ba ka botwago, gomme o ile a re nea mašemo a oketšegilego bakeng sa gore re a leme.”

● ‘Gana go boelwa ka boradia.’ Pierre, e lego mohlankedi yo a phagamego wa lekgetho seleteng sa kua Cameroon, o kile a ba le dibaka tše dintši tša go hwetša tšhelete gabonolo. O ile a hlokomela gore go be go ena le phošo e itšego ge a be a abelwa la mathomo gore a lefelele bašomi ba nakwana. Pierre o hlalosa gore: “Go be go lefša batho bao ba bego ba se sa hlwa ba šoma goba bao ba hwilego. Go e na le go nagana gore ke diriše tšhelete ye, ke ile ka boloka pego e nepagetšego ya ditšhelete le tšhelete yeo e šetšego ka gare ga bobolokelo.”

 Mafelelo e bile afe? Pierre o re: “Ka morago ga nywaga e mebedi, go ile gwa dirwa tlhahlobo ya tša ditšhelete e le go lekola boemo bjo. Ke ile ka thabišwa ke go bontšha pego e nepagetšego le go ntšha tšhelete yeo e lekanego, tšeo ka nako yeo di bego di dumelelana. Bahlahlobi ba ditšhelete ba ile ba nteboga ka borutho ka baka la potego ya ka.”

● Phema “go tšea letsogo-le-kobong.” Nakong ya ge e be e le ramoloa kua Rio de Janeiro, Brazil, batho gantši ba be ba leka go nea Ricardo letsogo-le-kobong. O gopola ka gore: “Lebakeng le lengwe, ramolao yo mongwe o ile a leka go ntshwariša letsogo-le-kobong. O ile a dira boiteko bja go nthomela sebapala diCD ntlong ya ka ke sa tsebe. Matšatšing ao, sebapala diCD se be se sa tlwaelega e bile e le selo sa matsaka.”

Ricardo o ile a dira’ng? O re: “Nna le mosadi wa ka re ile ra phetha ka gore re ka se tsoge re butše sephuthelwana seo. A se a letela, ke ile ka ya ofising ya ramolao yoo, gomme ka bea sephuthelwana seo godimo ga tafola ya gagwe. Se e be e le sebaka se sebotse sa go hlalosa lebaka leo ka lona ke se bušitšego. Mongwaledi wa gagwe o be a kgahlilwe ke tiro ya ka.”

Gaešita le ge Dihlatse tša Jehofa e se tšona feela tšeo di lekago go dira go loka, bjalo ka batho di itiretše leina le lebotse tabeng ya go botega. Se  ke sona seo dirilego gore mabenkele a go rekiša diaparo a Poland a thwale Dihlatse tša Jehofa feela. Molaodi wa barekiši o boletše gore: “Batho ba botegago ba hwetšagala gohle, eupša Dihlatse tša Jehofa di na le melao ya motheo gomme di a e kgomarela.”

Go Botega go sa Šetšwe Bodiidi

Batho ba bantši ba nagana gore bodiidi bo lokafatša go se botege. Ka mohlala, pego ya CNN e bolela ka mošemane wa nywaga e 14 wa Monigeria yo a fetšago matšatši a hula batho Inthaneteng. Ge a lokafatša tiro ya gagwe o re: “Le nyaka gore ke dire’ng? Ke fepa lapa la gešo—kgaetšedi ya ka, mma le [tate]. Motho o swanetše go ba le seo a iphedišago ka sona.”

Ke therešo gore Beibele ga e holofetše bao ba lokilego mahumo, eupša e nea kgonthišetšo ya gore ba tla hwetša dinyakwa tše bohlokwa tša bophelo. Jesaya 33:16 e re: “O tla newa senkgwa sa gagwe; meetse a gagwe a ka se fele.”

Lega go le bjalo, ba bangwe ba ka botšiša gore: ‘Go botega go ka thuša bao ba lego maemong a gateletšago ka tsela efe? Go thwe’ng ka bao ba katanago letšatši le letšatši bakeng sa gore ba iphepe?’

Nagana ka Berthe, mohlologadi wa kua Cameroon yoo a rekišago digwere tša miando (e lego digwere tšeo di bedišitšwego le go nokwa ka dinoko) mmarakeng wa gagwe o monyenyane. O re: “Ka tlwaelo go tsenywa digwere tša miando tše 20 ka gare ga sephuthelwana. Go tlwaelegile gore barekiši ba tsenye tše 17 goba tše 18 ka gare ga sephuthelwana, eupša ke bona go le kaone go se hlalefetše ba bangwe e le gore ke ikhole.”

Na kgwebo ya Berthe e tsenya tšhelete? E sego ka mehla. O re:“Ka dinako tše dingwe ke fetša  letšatši ke se ka rekiša selo. Eupša ge ke kgopela dijo go barekiši ba dijo gomme ke ba botša gore ga se ka hlwa ke rekiša selo, ba a ntsholela ka gobane ba tseba gore ke tla ba lefa le semeetseng ge ke hwetša tšhelete. Ba a mmpota, gaešita le ge go bota motho go tšea nako e telele.”

Modimo yo a Swanelwago ke Potego ya Rena

Re bota motho ka mo go oketšegilego ge re mmona a dira ka go dumelelana le mantšu a gagwe. Joshua, moetapele wa Isiraele ya bogologolo, o boletše ka Modimo gore: “Ga go kholofetšo yeo e sa kago ya phethega dikholofetšong ka moka tše dibotse tšeo Jehofa a di holofeditšego . . . ka moka di ile tša phethega.” (Jošua 21:45) Na re na le mabaka a mabotse a go ka bota Modimo?

Dikholofetšo tša Modimo di a botega mo e lego gore o swantšha lentšu la gagwe le pula. (Jesaya 55:10, 11) Ruri ke’ng seo se ka thibelago pula go na, go kolobiša lefase le go dira gore dimela di gole? Ga se gona! Ka tsela e swanago, ga go na seo se ka thibelago go phethagala ga merero ya Modimo.

E nngwe ya dikholofetšo tšeo di ngwadilwe go 2 Petro 3:13, yeo e rego: “Go na le magodimo a mafsa le lefase le lefsa tše re di letetšego go ya ka kholofetšo ya gagwe gomme toko e tla aga go tšona.” Modimo rerile go fediša ka moka bao ba ikholago ka magagabo bona. Na o ka rata go tseba kamoo Modimo a tlago go phethagatša morero wa gagwe ka gona? Ikgokaganye le Dihlatse tša Jehofa tša lefelong la geno, goba o ngwalele atereseng yeo e lego go letlakala 5 la makasine wo.

[Box/​Picture on page 8]

POTEGO E A PUTSWA

Lucio, yo mongwe wa Dihlatse tša Jehofa kua Philippines, a ka be a ile a se botege. O ile a hwetša $27 500 ka gare ga raka ya kgale ya go boloka difaele ka ofising yeo a ilego a kgopelwa gore a e hlwekiše. Ofisi—le tšhelete—e be e le tša mothwadi wa gagwe, yoo a bego a sepetše ka leeto la kgwebo. Lucio o re: “E be e le la mathomo ke bona tolara.”

Ge mothwadi wa gagwe a boa, Lucio o ile a mo nea tšhelete. Mafelelo e bile afe? Lucio o re: “Ke ile ka newa boikarabelo bjo bo oketšegilego. Ge e le gabotse, mothwadi wa ka o ile a nnea phaphoši yeo nna le lapa la ka re bego re tla dula ka go yona. Gaešita le ge bophelo bo le thata mo Philippines, ke kgona go bona gore Jehofa o re hlokometše ka ge re latela melao ya gagwe.”

[Box/​Picture on page 9]

DIKALA TŠEO DI KA BOTWAGO

Mmaraka wa Moïse ke o mongwe o tsebegago kudu mebarakeng ya kua Douala, Cameroon, moo a rekišago dihlapi. O re: “Ke reile mmaraka wa ka The Scales [Dikala], ka gobane dikala tša ka di gare ga tše mmalwa mebarakeng ka moka tšeo di sa kago tša kgopamišwa. Ke a tseba gore batho ba nteka ka mehla. Ge ba nkgopela khilograma ya hlapi, ke ba nea yona. Ka ge ba na le tsela yeo ba ka elago mokotla lefelong le lengwe. Ge ba o ela, ba hwetša gore o ka godimo ga khilograma! Ke moka ba lemoga gore ga se ka leka go ba hlalefetša! Batho ba bantši ba mmpotša gore: ‘Re tla go wena ka gobane o a botega.’”

[Seswantšho go letlakala 7]

“Re boditše mothwadi wa rena gore gaešita le ge se se bolela gore re tla rakwa, re ka se bolele maaka.”—Domingo, Philippines.

[Seswantšho go letlakala 7]

“Bahlahlobi ba ditšhelete ba ile ba nteboga ka borutho ka baka la potego ya ka.”—Pierre, Cameroon.

[Seswantšho go letlakala 7]

“Ramolao o ile a leka go ntshwariša letsogo-le-kobong. . . . Nna le mosadi wa ka re ile ra phetha ka gore re ka se tsoge re butše sephuthelwana seo.”—Ricardo, Brazil.

[Seswantšho go letlakala 7]

Berthe ka dinako tše dingwe o fetša letšatši ka moka a se a rekiša selo. Eupša barekiši ba bangwe ba be ba mo nea dijo ka gobane ba tseba gore o tla ba lefa le semetseng ge a hwetša tšhelete.