“Bothata bjo bo Phatlaletšego bja Potego”

Kua Afrika Bodikela, mošemane wa nywaga e 12 o robetše malaong sepetlele—ke mohlaselwa wa sehlare sa bofora sa go thibela bolwetši bja malaria seo se rekilwego ke mmagwe lebenkeleng la molao la go rekiša dihlare. Ngaka ya sepetlele e re: “Re be re dutše re hwetša go rekišwa dihlare tša bofora ka nywaga e 15.” *

Kua Asia, batswadi ba mošemanyana yo a sa tšwago go belegwa ba tšhošitšwe ke go tseba gore seo go thwego ke maswi ao a nago le phepo ao ba bego ba mo fepa ka ona a tšhilafaditšwe ke metswako yeo e nago le mpholo. Ka manyami, mošemanyana o a hwa.

Rakgwebo wa Moamerika yo a botwago o radiile bagwebišani gotee le yena diranta tše dimilione tše dikete! Ba dikete ba hweditše gore ditšhelete tša bona tša go rola modiro di nweleditšwe ke seo go thwego ke “boradia bja ngwagakgolo.”

LEFASENG la lehono, mo e ka bago motho yo mongwe le yo mongwe o kile a hlalefetšwa ka nako e nngwe ke motho yo a mmotago. Gaešita le boemo bjo bo phuhlamago bja tša boiphedišo bja lefase ke mafelelo a seo kuranta ya Sefora ya Le Monde e se bitšago “bothata bjo bo phatlaletšego bja potego.”

Ke dilo dife tšeo di tlaleleditšego “bothateng bja potego” bja lehono? Na go na le motho yo o ka mmotago?

[Mongwalo wa ka tlase]