Bafsa ba a Botšiša

Nka Fihlelela Bjang Dipakane tša ka?

KE EFE ya dilo tše di latelago yeo o bego o tla rata go ba le yona?

● Go ikholofela ka mo go oketšegilego

● Bagwera ba oketšegilego

● Lethabo le le oketšegilego

Ge e le gabotse, o ka ba le tšona ka moka! Bjang? Ka go ipeela dipakane le go di fihlelela. Ela hloko ditšhišinyo tše latelago.

Go ikholofela ka mo go oketšegilego Ge o ipeela dipakane tše dinyenyane e bile o di fihlelela, o tla ikholofela ka mo go oketšegilego gomme wa ipeela dipakane tše dikgolo. Le gona o tla ikwa o ikholofela kutšwanyana ge o lwantšhana le ditlhohlo tša letšatši le letšatši—tše bjalo ka go ema o tiile kgahlanong le kgatelelo ya dithaka. Ka lehlakoreng le lengwe, ba bangwe ba tla lemoga go ikholofela ga gago gomme ba go hlompha ka baka la seo. Ba bangwe ba ka se sa go gateletša kudu. Go ba gona, ba ka thoma go go rata.—Bapiša le Mateo 5:14-16.

Bagwera ba oketšegilego Batho ba thabela go ba kgaufsi le batho bao ba ipeelago dipakane—bao ba tsebago seo ba se nyakago le go katanela go se fihlelela. Ge batho ba batamela go wena ka baka la dipakane tša gago, gantši ba fetoga ditho tšeo di ka go thušago go fihlelela dipakane tšeo tša gago.—Mmoledi 4:9, 10.

Lethabo le le oketšegilego A re tlogele go dikadika: Ga go thabiše go lewa ke bodutu le go letela gore bophelo bja gago bo fetoge. Ka lehlakoreng le lengwe, ge o ipeela dipakane gomme o di fihlelela, o ba le maikwelo a go atlega. Ga go makatše ge moapostola Paulo, mokriste wa lekgolong la pele la nywaga, a kile a bolela gore: “Xa ke kitime kè sa tsebe mo ke yaxo.” (1 Bakorinthe 9:26, Beibele ya Sepedi.) Le gona gopola, ge o ipeela pakane e kgolo, o ba le maikwelo a tseneletšego a go atlega ge o e fihleletše!

Na o komana-madula-a-bapile gore o thome? Ripa gomme o phuthele letlakala ka go le letona, gomme o latele megato e bontšhitšwego. *

Dihlogo tše di oketšegilego go tšwa lelokelelong la dihlogo tša “Bafsa ba a Botšiša” di ka hwetšwa Wepesaeteng ya www.watchtower.org/ype

[Mongwalo wa tlase]

 SEO GO KA NAGANWAGO KA SONA

● Na go a kgonega go ba le dipakane tše dintši ka nako e tee?—Bafilipi 1:10.

● Na go ipeela dipakane go bolela gore o rulaganye motsotso o mongwe le o mongwe wa bophelo bja gago?—Bafilipi 4:5.

[Box/​Pictures on page 25, 26]

Kamoo o ka fihlelelago dipakane tša gago

HLAHLOBA Diema 4:25, 26 1

“O se ke wa boifa go ipeela dipakane tše dikgolo. Ge e ba ba bangwe ba kgonne go di fihlelela le wena o ka kgona.”—Roben.

1. Nagana gore ke dipakane dife tšeo o ka ipeelago tšona. Thabela mogato wo! O se ke wa sekaseka; e fo ngwala dikgopolo tše dintši ka mo o ka kgonago. Bona ge e ba o kgona go ngwala bonyenyane tše e ka bago tše 10 goba tše 20.

2. Hlahloba dikgopolo tša gago. Ke dife tšeo di bonagalago di kgahliša kudu? Ke dife tšeo di lego thata kudu? Ke dife tšeo o ka thabelago go di fihlelela? Gopola, dipakane tše dikaone tšeo o ka ipeelago tšona ke tšeo di lego bohlokwa kudu go wena.

3. Etiša pele dilo tše di tlago pele. Sa pele ipeele dipakane tše dinyenyane tšeo o ka di fihlelelago ka matšatši a mmalwa. Se se latelago kgetha dipakane tše dikgolo (tšeo o ka di fihlelelago ka dibeke goba dikgwedi tše mmalwa). Rulaganya dipakane tša gago go ya ka lelokelelo leo o tla ratago go di fihlelela ka lona.

Dipakane tša Mohlala

Segwera Go dira segwera le motho yo e sego thaka ya ka. Go tsošološa segwera sa kgale.

Bophelo bjo bobotse Ke tla itšhidulla metsotso e 90 beke e nngwe le e nngwe. Ka robala diiri tše seswai bošego bjo bongwe le bjo bongwe.

Sekolo Go kaonefatša dimaraka tša ka thutong ya dipalo. Ke tla emela go loka ge barutwana ba bangwe ba nkgothaletša go se botege ditlhahlobong.

Bomoya Ke tla bala Beibele ka metsotso e 15 letšatši le lengwe le le lengwe. Go boledišana le morutwanagotee ka ditumelo tša ka bekeng ye.

 Rulaganya Diema 21:5 2

“Dipakane di bohlokwa, eupša o swanetše go nyaka tsela ya go di fihlelela. Ntle le moo, go tla dula go ena le dipakane ka mehla eupša di sa fihlelelwe.”—Derrick

Bakeng sa pakane e nngwe le e nngwe yeo o ipeetšego yona, dira se se latelago:

1. Dira lelokelelo la dipakane tša gago.

2. Ipeele nako yeo o swanetšego go phetha pakane ya gago ka yona. Go feta tšohle, pakane yeo e se nago nako yeo e swanetšego go phethwa ka yona e swana feela le toro!

3. Rulaganya megato yeo e akaretšwago.

4. Naganela mapheko ao a ka tšwelelago. Ke moka nagana tsela yeo o ka a fenyago ka yona.

5. Dira tlamo. Ikholofetše gore o tla dira sohle seo o ka se kgonago go fihlelela pakane ya gago. Ga bjale saena gomme o ngwale letšatšikgwedi.

Go ithuta Sepaniši bakeng sa leeto la ka la go ya Mexico ka July 1

Megato

1. Go hwetša puku ya dipolelwana.

2. Go ithuta mantšu a lesome a mafsa beke e nngwe le e nngwe.

3. Go theetša batho ba bangwe ge ba bolela Sepaniši.

4. Go kgopela motho yo mongwe go hlahloba popopolelo ya ka le mmiletšo wa mantšu.

Mapheko ao a ka tšwelelago

Ga go na motho wa kgaufsi yo a bolelago Sepaniši

Nka a fenya bjang

Tšea dikgatišo tšeo di theetšwago tša Sepaniši go www.pr418.com.

․․․․․ ․․․․․

Mosaeno Letšatšikgwedi

Gata Mogato! Johane 13:17 3

“Dipakane di ka lebalega ga bonolo, ka gona o swanetše go dula o tsepamišitše mogopolo e bile o katanela go di fihlelela.”—Erika.

Thoma ntle le tikatiko. Ipotšiše gore, ‘Nka dira’ng lehono gore ke šomele pakaneng yeo ke ipeetšego yona?’ Ke therešo gore o ka no se kgone go rulaganya mogato o mongwe le o mongwe, eupša o se ke wa dumelela seo se go thibela go thoma. Bjalo ka ge Beibele e hlalosa, “ge o leta go fihla ge phefo le boemo bja leratadima di lokile, o ka se ke wa bjala selo le go buna.” (Mmoledi 11:4, Today’s English Version) Hwetša selo seo o ka se dirago lehono—gaešita le ge e le se senyenyane—se dire.

Hlahloba dipakane tša gago ka mehla. Ikgopotše gore ke ka baka la eng pakane e nngwe le e nngwe e le bohlokwa go wena. Hlahloba tšwelopele ya gago gomme o e swaye ka ✔ (goba o ngwale letšatšikgwedi) kgaufsi le mogato woo o o phethago.

Eba yo a lekalekanego. Go sa šetšwe gore dithulaganyo tša gago ke tše dibotse gakaakang, di ka nyaka gore o di fetole ge o dutše o katanela go fihlelela pakane ya gago. Seo se lokile. O se ke wa tshwenyega ka go kgomarela pakane ya gago ntle le go fetofetoga le maemo. E fo dula o dira tšwelopele ya go fihlelela pakane ya gago ya mafelelo.

Diriša ponelopele ya gago. “Bonela pele” gomme ipone o fihleletše pakane ya gago. Ikwe o atlegile. Se se latelago, “boela morago” kgato ka kgato, o bone mogato o mongwe le o mongwe ka leihlo la kgopolo. Mafelelong, “tšwela pele.” Ipone o phetha mogato o mongwe le o mongwe, gomme o ipone ka leihlo la kgopolo ka mo o tlago go ikwa ka gona ge o fihlelela pakane ya gago. Ga bjale thoma go gata mogato!

[Seswantšho]

Dipakane di swana le polane—o swanetše go šoma ka thata gore o di fihlelele!

[Box/​Pictures on page 25]

SEO DITHAKA TŠA GAGO DI SE BOLELAGO 4

“Go bonolo go nyama ge o se na seo o swaregilego ka sona goba seo o lebeletšego pele go se dira. Eupša ge o ipeela dipakane e bile o di fihlelela, o a ikholofela.”—Reed.

“O se ke wa ipona molato ge o sa fihlelele dipakane tša gago ka botlalo goba ka nako yeo o ipeetšego yona. Go ikwa ka tsela yeo go ka se go thuše ka selo. Tšwela pele o leka go di fihlelela!”—Cori.

“Boledišana le batho ba šetšego ba fihleletše dipakane tšeo o ipeetšego tšona. Ba ka go tutuetša gomme ba go nea ditšhišinyo tšeo di šomago. Lega go le bjalo, boledišana le ba lapa la geno ka dipakane tša gago e le gore ba ka go thekga.”—Julia.

[Seswantšho go letlakala 24]

(Bakeng sa mongwalo o beakantšwego ka mokgwa wa kgatišo, bona kgatišo ka boyona)

Ripa

Phutha