Tsela 5—Itutuetše o be o Tutuetše le Lapa la Gago

“Yo mongwe le yo mongwe yo bohlale o tla dira dilo ka tsebo.” (Diema 13:16) Go itlhama ka tsebišo ya motheo ya tša maphelo go ka go hlama le go go šušumeletša go dira diphetogo tšeo di nyakegago bakeng sa go kaonefatša boemo bja gago bja tša maphelo le bja lapa la gago.

◯ Tšwela pele o ithuta. Dinageng tše dintši mekgatlo ya batho bohle le ya go ikemela e nea mananeo a thuto le dikgatišo tšeo di bolelago ka ditaba tša mehutahuta tša mabapi le tša maphelo. Di diriše gomme o ithute ka ditsela tša motheo tša go kaonefatša boemo bja gago bja tša maphelo le go phema go bo bea kotsing. Dula o ena le kgopolo e bulegilego gomme o ikemišetše go dira diphetogo.

Mekgwa e mebotse yeo o ithutago yona le go e diriša e ka hola bana ba gago le ditlogolo tša gago. Ge batswadi ba bea mohlala o mobotse mabapi le dijo tše nago le phepo, bohlweki, mekgwa ya go robala, go itšhidulla le go thibela malwetši, bana ba bona ba ka holega.—Diema 22:6.

◯ Go nyakega eng gape? Go nyakega gore motho a hloke boithati e le gore a hlome tsela e botse ya bophelo le go e kgomarela. Go ka ba thata go fediša mekgwa e mebe yeo e lego kgale re ena le yona, gomme go dira gaešita le diphetogo tše dinyenyane gantši go ka nyaka tutuetšo e matla. Gaešita le go ba kotsing ya go ka tsenwa ke bolwetši bjo bogolo le ya lehu go ka no se šušumeletše ba bangwe go dira seo ba tsebago gore se ba loketše. Ke’ng seo se ka ba kgonago? Go fo swana le rena ka moka, ba swanetše go dula ba gopola morero o mogolo bophelong.

Balekane ba swanetše go dula ba phetše gabotse e bile ba ena le matla e le gore ba ka tšwela pele ba thušana. Batswadi ba swanetše go kganyoga go tšwela pele ba thekga le go tlwaetša bana ba bona. Bana ba ba gotšego ba swanetše go hlokomela ba leloko ge ba tšofala. Tlaleletša merero ye ka kganyogo e botse ya go nyaka go ba tšhegofatšo setšhabeng go e na le go ba morwalo. Tše ka moka di akaretša lerato le go tshwenyega ka ba bangwe.

Tšhušumetšo e kgolo kudu e tšwa tebogong ya rena le boineelong bja rena go Mmopi wa rena. Bao ba dumelago go Modimo ba nyaka go šireletša mpho ya gagwe e bohlokwa ya bophelo. (Psalme 36:9) Ge re phetše gabotse, re ka hlankela Modimo ka mafolofolo kudu. Ga go na lebaka le legolo goba tutuetšo e kgolo kudu go feta ye ya go hlokomela boemo bja rena bja tša maphelo.

[Ntlhakgolo go letlakala 8]

Thabela mehola ya tsela e botse ya go phela