Thušo Bakeng sa Bao ba Hlokofaletšwego

“Jehofa o kgauswi le ba dipelo tše di robegilego.”—Psalme 34:18.

KA MORAGO ga lehu la motho yo o mo ratago, o ka tlelwa ke maikwelo a mantši a gateletšago ao a akaretšago go šala o maketše, go nolega moko, go nyama mohlomongwe le go ikwa o le molato goba o galefile. Go etša ge go boletšwe sehlogong se se fetilego, batho ga ba kwe bohloko ka go swana. Ka gona, o ka no se be le maikwelo ao ka moka, e bile o ka no se bontšhe gore o nyamile go swana le kamoo ba bangwe ba bontšhago ka gona. Lega go le bjalo, ge e ba o nyaka go bontšha gore o nyamile, ga se phošo go dira bjalo.

“Lla!”

Heloisa, ngaka yeo e tsopotšwego pejana, o ile a leka go gatelela maikwelo a gagwe ka morago ga lehu la mmagwe. O re: “Mathomong ke ile ka lla, eupša gateetee ka gatelela maikwelo a ka—go swana le ge ke be ke tla dira ge molwetši a hlokofala. Se se ile sa dira gore ke hlakahlakane kudu. Keletšo yeo ke e neago batho bao ba hlokofaletšwego ke batho bao ba ba ratago ke gore: Lla! Ntšha bohloko bjoo. O tla imologa.”

Lega go le bjalo, ge nako e dutše e eya, o ka ikwa go swana le kamoo Cecília yo a ilego a hlokofalelwa ke monna wa gagwe ka baka la kankere a ilego a ikwa ka gona. O re: “Batho ba bangwe ba be ba letetše gore ke lebale ka seo se diragetšego, ka gona ke a nyama ka dinako tše dingwe ka ge go bonagala eka ga se ka dira seo ba bego ba se letetše.”

Ge e ba o ile wa nagana bjalo, gopola gore ga go na seo go thwego ke tsela e nepagetšego ya go lla. Ba bangwe ba kgona go tšwela pele ka bophelo gabonolo feela. Ba bangwe ga ba kgone. Maemong a bjalo, go tšea nako gore motho a boele sekeng, ka gona o se ke wa ipeela nako yeo o kwago eka ge e fihla o gapeletšega go ba o šetše o ikwa o le kaone. *

Eupša go thwe’ng ge e ba bohloko bjo o bo kwago bo tseneletše kudu gomme o thoma go lapišwa ke go dula o nyamile? Mohlomongwe phihlelo ya gago e swana le ya Jakobo, monna wa go loka yo a ilego “a gana go homotšega” nakong ya ge a be a botšwa gore morwa wa gagwe Josefa o hwile. (Genesi 37:35) Ge e ba o ile wa arabela ka tsela yeo, ke megato efe e holago yeo o ka e gatago gore o se ke wa fenywa ke manyami?

Itlhokomele. Cecília o re: “Ka dinako tše dingwe, ke ikwa ke lapile wa go hwa gomme ke lemoga  gore ke dirile dilo go feta tekanyo.” Go etša ge mantšu a gagwe a bontšha, go hlokofalelwa go ka go imetša kudu mmeleng le maikwelong. Ka gona o swanetše go itlhokomela gabotse mmeleng. Khutša ka mo go lekanego gomme o je dijo tšeo di nago le phepo.

Ke therešo gore o ka no ba o sa kganyoge dijo, go se sa bolelwa ka go di reka le go di apea. Lega go le bjalo, go se iphepe ka dijo go ka dira gore ditwatši le malwetši di go fetele gabonolo, gomme seo se tla oketša kgatelelo ya gago. Bonyenyane leka go fela o eja dijo tše dinyenyane e le gore o dule o phetše gabotse. *

Ge e ba go kgonega, itšhidulle ka tsela e itšego, le ge e ka ba go fo itshepelela ka maoto. Go dira dilo tšeo di nyakago matla go ka dira gore o tšwe ka ntlong. Go oketša moo, go itšhidulla ka mo go lekanego go tšweletša tekanyo ya dikhemikhale tša bjoko tšeo di thušago gore o ikwe o le kaone.

Amogela thušo ya ba bangwe. Se se ka ba bohlokwa kudu ge o hlokofaletšwe ke molekane. Mohlomongwe go be go na le dilo tše mmalwa tšeo a bego a di dira gomme gona bjale ga go yoo a di dirago. Ka mohlala, ge e ba molekane wa gago a be a hlokomela ditaba tša ditšhelete goba mešongwana ya ka gae, mathomong o ka hwetša go le thata go phetha mediro yeo o le noši. Ge e ba go le bjalo, keletšo ya mogwera yo bohlale e ka go thuša kudu.—Diema 25:11.

Beibele e hlalosa mogwera wa paale e le motho “yo o ka ithekgago ka yena mohlang wa  tlalelo.” (Diema 17:17) Ka gona o se ke wa itira tšhikanoši, o nagana gore ba bangwe ba tla go lebelela o le morwalo. Go e na le moo, go gwerana le ba bangwe go ka go thuša kudu dinakong tše tše thata. Ka morago ga gore kgarebe e bitšwago Sally e hlokofalelwe ke mmago yona, e ile ya lemoga gore go gwerana le ba bangwe go e thušitše kudu. E re: “Bagwera ba ka ba bantši ba be ba ntaletša ge go na le seo ba se dirago. Se se ile sa tloga se nthuša gore ke lebeletšane le go lewa ke bodutu. Ka mehla ke thabela ge batho ba mpotšiša dipotšišo tše bonolo, tše bjalo ka gore: ‘Bophelo bo ya bjang ka morago ga lehu la mmago?’ Ke lemogile gore go dula ke bolela ka mma go nthušitše go okobala.”

Gopola dilo tša nakong e fetilego. Leka go gopola dinako tšeo o di thabetšego le motho yo a hlokofetšego, mohlomongwe ka go bogela dinepe. Ke therešo gore mathomong o ka kwa bohloko ge o nagana ka dinako tše bjalo. Lega go le bjalo, ge nako e dutše e eya go gopola ka dinako tše go ka go thuša go okobala go e na le go go kweša bohloko.

O ka ba wa leka go di ngwala fase. O ka ngwala le dinako tšeo o di thabetšego le yena gaešita le dilo tšeo o dumago eka nkabe o mmoditše tšona ge nkabe a sa phela. Go ka ba bonolo go kwešiša kamoo o ikwago ka gona ge o bala seo o se ngwadilego. Go ngwala go ka ba gwa go thuša gore o ntšhe maikwelo a gago ka moka.

Go thwe’ng ka go boloka dilo tša motho yo a hlokofetšego? Dikgopolo tša batho di a fapana tabeng ye, e bile seo ga se makatše ka gobane batho ba kwa bohloko ka ditsela tše di sa swanego. Ba bangwe ba nagana gore go boloka dilo tša motho yo a hlokofetšego go dira gore motho a tšee nako gore a okobale. Ba bangwe ba bona seo se na le mohola. Sally yo go boletšwego ka yena pejana, o re: “Ke bolokile dilo tše dintši tša mma. Di nthuša gore ke lebeletšane le boemo bjo ka katlego!” *

Ithekge ka “Modimo wa khomotšo yohle.” Beibele e re: “Lahlela maima a gago go Jehofa, gomme yena o tla go thekga.” (Psalme 55:22) Morero wa go rapela Modimo ga e fo ba feela taba ya go ikhomotša. Ke poledišano ya kgonthe le ya bohlokwa le “Modimo wa khomotšo yohle, yo a re homotšago ditlaišegong tša rena tšohle.”—2 Bakorinthe 1:3, 4.

Lentšu la Modimo, Beibele, le re nea khomotšo e kgolo kudu go di feta tšohle. Moapostola wa Mokriste e lego Paulo o itše: “Ke na le kholofelo go Modimo . . . ya gore go tla ba le tsogo ya ba lokilego gotee le ba sa lokago.” (Ditiro 24:15) Go nagana ka kholofelo e theilwego Beibeleng ya tsogo go ka go homotša kudu ge o dutše o ekwa bohloko ka baka la go hlokofalelwa. * Se ke seo Lauren a ilego a se lemoga, e lego mosadi yoo kgaetšedi ya gagwe yeo e lego mahlalagading e ilego ya hlokofala kotsing. O re: “Go sa šetšwe gore ke be ke ekwa bohloko gakaakang, ke  be ke tšea Beibele gomme ke e bala, le ge e ka ba temana e tee feela. Ke be ke kgetha ditemana tšeo di bego di nkgothatša gomme ke be ke di bala kgafetšakgafetša. Ka mohlala, ke ile ka homotšwa ke seo Jesu a ilego a se botša Mareta ka morago ga lehu la Latsaro. O mmoditše gore: ‘Kgaetšedi ya gago o tla tsoga.’”—Johane 11:23.

“Ga se wa Swanela go Dumelela Seo se go Laola”

Le ge go ka ba thata, go lebeletšana le bohloko bja go hlokofalelwa go tla go thuša gore o tšwele pele ka bophelo. O se ke wa ikwa o na le molato, eka go tšwela pele ka bophelo e tla e le go se rate motho yo a hlokofetšego goba e le go mo lebala. Therešo ke gore o ka se tsoge o lebetše motho yo o bego o mo rata. Mabakeng a mangwe o ka mo hlologela kudu, eupša ganyenyane-ganyenyane maemo a gateletšago a tla okobala.

O ka ba wa kgona go sega ge o dutše o gopola dinako tša lethabo le tša manyami. Ka mohlala, Ashley yo go boletšwego ka yena sehlogong se se fetilego, o re: “Ke sa gopola letšatši la pele ga ge mma a ka hlokofala. O be a bonagala a le kaone, e be e le la mathomo a kgona go tsoga malaong ka morago ga nako e telele. Ge mogolwake a be a dutše a kama mma moriri, rena ba bararo re ile ra thoma go sega selo se sengwe gomme e be e le la mathomo ka morago ga nako e telele ke bona mma a myemyela. O be a bonagala a kgotsofaditšwe kudu ke go dula le barwedi ba gagwe.”

E bile o tla kgona go nagana ka dilo tša bohlokwa tšeo o ithutilego tšona ge o be o na le motho yo o bego o mo rata. Ka mohlala, Sally o re: “Mma e be e le morutiši yo mobotse. O be a kgona go nkeletša e bile go sa kwagale gore o a nkeletša, le gona o nthutile kamoo nka dirago diphetho tše dibotse tšeo ruri e bego e le diphetho tša ka e sego tšeo yena goba tate ba bego ba nkgethela tšona.”

Go nagana ka motho yo a hlokofetšego e ka ba selo seo se go thušago gore o kgone go tšwela pele ka bophelo. Se ke seo lesogana leo le bitšwago Alex le ilego la se lemoga. Le re: “Ka morago ga go hlokofala ga tate, ke ile ka ikemišetša go phela ka tsela yeo a bego a nthutile yona—ya gore ka mehla ke dule ke ipshina ka bophelo. Bao ba hlokofaletšwego ke motswadi nka ba botša gore: O ka se tsoge o lebeletše bohloko bja go hlokofalelwa ke motswadi, eupša ga se wa swanela go dumelela seo se go laola. Ntšha bohloko o be o lle kamoo o ka kgonago ka gona, eupša o se ke wa lebala gore o sa dutše o swanetše go ipshina ka bophelo.”

[Mengwalo ya tlase]

[Ntlhakgolo go letlakala 8]

“Go sa šetšwe gore ke be ke ekwa bohloko gakaakang, ke be ke tšea Beibele gomme ke e bala, le ge e ka ba temana e tee feela”—Lauren

[Box/​Picture on page 7]

GO LEBELETŠANA LE MAIKWELO A GO IPONA MOLATO

Mohlomongwe o nagana gore go se šetše ga gago ka tsela e itšego go tlaleleditše lehung la moratiwa wa gago. Go lemoga go ipona molato moo—e ka ba ga kgonthe goba ga go inaganelwa—ke karabelo ya tlhago ya go nyama gomme e ka ba e thušago ka boyona. Mo le gona ga go nyakege gore o ikwe o swanelwa ke go ipolokela maikwelo a bjalo. Go bolela mabapi le kamoo o ikwago o le molato ka gona go ka nea kimollo e nyakegago kudu.

Lega go le bjalo, lemoga gore go sa šetšwe kamoo re ratago motho yo mongwe ka gona, re ka se kgone go laola bophelo bja gagwe goba ra thibela “nako le ditiragalo tšeo di sa letelwago” gore di se wele bao re ba ratago. (Mmoledi 9:11) Ka ntle le moo, ga go pelaelo gore maikemišetšo a gago e be e se a mabe. Ka mohlala, na o be o rerile gore moratiwa wa gago a babje gomme a hwe ka go se dire thulaganyo ya go bona ngaka ka pela? Ruri ga go bjalo! Ka gona na o tloga o na le molato wa go baka lehu la motho yoo? Aowa.

Mma yo mongwe o ile a ithuta go lebeletšana le maikwelo a go ipona molato ka morago ga ge morwedi wa gagwe a hwile kotsing ya koloi. O hlalosa gore: “Ke be ke ikwa ke na le molato wa ge ke be ke mo romile. Eupša ke ile ka thoma go lemoga gore e be e le bošilo go nagana ka tsela yeo. Go be go se na phošo ka go mo roma le tatagwe go iša molaetša. E be e le fela kotsi e šoro kudu.”

Mo gongwe o ka re, ‘Eupša go na le dilo tše dintši kudu tše ke kganyogago eka nkabe ke di boletše goba ke di dirile.’ Ke therešo, eupša ke bomang gare ga rena ba ba ka bolelago gore re bile tate, mma goba ngwana yo a phethagetšego? Beibele e re gopotša gore: “Ka moka ga rena re kgopša gantši. Ge e ba motho a sa kgopše ka lentšu, gona ke motho yo a phethagetšego.” (Jakobo 3:2; Baroma 5:12) Ka gona amogela therešo ya gore ga se wa phethagala. Go nagana kudu ka mehuta ka moka ya “ge nkabe” go ka se ke gwa fetoša selo, eupša go ka diegiša go boela ga gago sekeng. *

[Mongwalo wa ka tlase]

[Seswantšho go letlakala 6]

Ka dinako tše dingwe, motswadi yo a tšofetšego yo a hlokofaletšwego o swanetše go homotša ngwana wa gagwe yo a šetšego a godile yoo le yena a kwago bohloko

[Diswantšho go letlakala 9]

Go ngwala fase, go bogela dinepe le go amogela thušo ya ba bangwe go ka go thuša go lebeletšana le go hlokofalelwa ke motho yo o mo ratago