Bafsa ba a Botšiša

Nka Dira Bjang Gore ke Kgahle Batho ge ba sa Thoma go Mpona?

“Poledišano ye ya mošomo e sepela gabotse! Ke kgolwa gore le monna yo e tlago go ba molaodi wa ka o a bona gore ke iketlile; e sa le ke tsena ka mo ke mmitša ka leina. Ke a tseba gore o tla nthwala!”

“Na ruri boitsebišo bjola bja go kgahliša ke bja lona lesogana le? Yo yena nka se mo thwale! Ge e ba a itshwara ka tsela ye le pele a hwetša mošomo, o tla ba bjang ge a šetše a o hweditše?”

Lebelela seswantšho se gomme o bale mantšu a lego ka mo godimo. Na o ka kgona go bona ditsela tše tharo tšeo motho yo a kgopelago mošomo a itshenyeditšego leina ka tšona?

1 ․․․․․

2 ․․․․․

3 ․․․․․

● Dikarabo di ka mo tlase

1. Diaparo tšeo lesogana le le di aperego ga di swanele dipoledišano tša mošomo. 2. Tsela yeo le bolelago ka yona (le bitša molaodi wa lona ka leina) ga se ya swanela. 3. Tsela yeo le dutšego ka yona ga e bontšhe tlhompho.

 AKANYA o leka go kwa tatso ya sejo se itšego seo o sa kago wa se ja. Go tla go tšea nako e kae gore o tsebe gore o a se rata? Go se kgema gatee feela e ka ba mo go lekanego go tseba ge e ba o tla tsoga o se jele gape—goba mohlomongwe wa ba wa se fetša ka moka.

Go bjalo le ge o kopana le motho ka lekga la mathomo. Ka nakwana feela, o šetše o ipotša gore ke motho wa mohuta mang. E bile taba e nngwe ya bohlokwa ke ye: Ka yona nakwana yeo, motho yoo le yena o šetše a ipotša gore wena o motho wa mohuta mang.

Na o nyaka mošomo, mogwera goba molekane wa lenyalo? Go atlega go ka ithekga ka tsela yeo o itshwarago ka yona di sa tloga fase. Anke re bone dikarolo tše tharo tšeo o ka swanelwago ke go kaonefatša go tšona ge o dirišana le batho e le gore ba se šale ba go lebelela gampe.

1. Tsela Yeo o Bogegago ka Yona

Go sa šetšwe gore ke ka tsela e botse goba e mpe, mohuta wa motho yoo batho ba naganago gore o yena o ka ithekga ka selo sa pele seo ba se bonago, tsela yeo o bogegago ka yona. Gantši karolo ye ya gore batho ba go rate di sa tloga fase e lebelelwa gabohwefo. Kgarebe e nngwe yeo e bitšwago Clarissa * e re: “Go bonagala eka matšatši a ge o eya lebenkeleng la go jela, ga o tsebe gore batho ba tla tla ba apere gabotse goba ba apere eka ba ya go robala!”

Ke therešo gore o swanetše go apara diaparo tšeo di swanelago boemo bja mo o yago gona. Ka mohlala, o ka se apare diaparo tša go rutha ge o eya dipoledišanong tša mošomo! Eupša go thwe’ng ge e ba o sa kgodišege gore o apare’ng? Selo sa bohlokwa ke gore o apare gabotse e sego ka tsela e feteletšego. Ge e ba o sa kgodišege, gona go kaone gore o apare ka tsela e tlwaelegilego.

GOPOLA SE! Go swana le seswantšho sa X-ray, tsela yeo o aparago le go itokiša ka yona e ka utolla seo o lego sona ka gare.

“Ge ke le pokanong ya bogwera gomme ke bona batho ba apere bošaedi, ke phema go kopana le bona. Selo feela seo ke se tsebago ka nako yeo ke tsela yeo ba bogegago ka yona, le gona moaparo wa bona o ba bolela gampe.”—Diane.

Beibele e kgothaletša “moaparo o rulagantšwego gabotse” wo o bontšhago go se ‘solege le go hlaphogelwa ga monagano.’—1 Timotheo 2:9.

Ipotšiše gore: ‘Na ke apara ka tsela e rulagantšwego gabotse goba ya bošaedi? Na motho yo ke nyakago gore e be molaodi wa ka, mogwera goba molekane a ka phetha ka gore ga se ka ‘hlaphogelwa monaganong’ ka baka la tsela yeo ke aparago ka yona?’

Tšhišinyo: Kgopela keletšo mothong yo o mo hlomphago gore yena o lebelela bjang moaparo.

 2. Seo o se Bolelago

Seo o se bolelago se utolla ge e ba o ikokobeditše goba o ikgogomoša, ge e ba o ipoetša goba o tlogelela dilo. Dula o gopola se ge e ba o nyaka go kgahliša motho wa bong bjo bo fapanego le bja gago yo o thomago go kopana le yena. Ngwanenyana yo a bitšwago Valerie o re: “Ke a ferekana ge ke bolela le lesogana gomme le dulela go bolela ka lona ka noši.” O oketša ka gore: “Ka lehlakoreng le lengwe, bašemane ba bangwe ba nyaka go tseba dilo ka moka ka wena ba sa thoma go go bona. Selo seo se opiša hlogo gomme se dira gore ngwanenyana a ikwe eka a ka tšhaba.”

GOPOLA SE! Seo o se bolelago se dira gore ba bangwe ba kgone go bona gore ge e le gabotse o motho wa mohuta mang—ka gona bala mantšu pele o bolela!

“Ge ke kopana le lesogana, ke a thaba ge le sa itire seo le sego sona. Seo se diregago ge re kopana la mathomo se bohlokwa. Ge e ba lesogana le sa tsebe gore le ka mpotša eng, go kaone gore le homole.”—Selena.

Beibele e re: “Go bolela kudu go ka go diriša diphošo—ka gona e ba yo bohlale gomme o bale mantšu.”—Diema 10:19, Contemporary English Version.

Ipotšiše gore: ‘Nka dira bjang gore go be le tekatekano tabeng ya go bolela kudu le go se bolele kudu? Na tsela yeo ke bolelago ka yona e ka tšhoša goba ya kgopiša ba bangwe?’

Tšhišinyo: Lebelela bao ba bonagalago ba na le bokgoni bja go boledišana le batho gabotse. Ba dira’ng gore ba kgone go boledišana le batho gabotse? Na o ka kgona go ba ekiša?

3. Kamoo o Itshwarago ka Gona

Batho ba bangwe ba re ditiro di bolela kudu go feta mantšu. Ka mohlala, ge e ba o na le mekgwa e mebotse, seo o se dirago se bontšha gore o hlompha ba bangwe. Se ke se sengwe seo o swanetšego go se gopola ge o nyaka molekane wa lenyalo. Ngwanenyana yo a bitšwago Carrie o re: “Go dira dilo tše dinyenyane, go swana le go bulela ba bangwe mojako, go bontšha gore o na le tlhompho. E fo ba e le go bontšha botho.”

GOPOLA SE! Ditiro tša gago di utolla gore o motho wa mohuta mang. (Diema 20:11) Ditiro tša gago di utolla’ng ka wena?

“Ke nagana gore go bohlokwa go theetša ka šedi. Le gona, go se tsene motho yo mongwe ganong go sa nyakege go bontšha mekgwa e mebotse.”—Natalia.

Beibele e re: “Le sware batho kamoo le ratago gore ba le sware ka gona.”—Luka 6:31, CEV.

Ipotšiše gore: ‘Na ke na le mekgwa e mebotse? Na ke bontšha gore ke rata ba bangwe go tšwa pelong? Na ke a botega? Na ke boloka nako?’

Tšhišinyo: Rulaganya gore o fihle moo o yago gona metsotso e lesome pele ga nako e beilwego e le gore le ge go ka direga selo se sengwe, o se ke wa šalela. O se ke wa dira gore selo sa pele seo batho ba se naganago ka wena e be gore ga o boloke nako!

Temošo: Go dira gore batho ba go lebelele gabotse ga go bolele gore o swanetše go itira motho yo o sego yena, e lego bofora. (Psalme 26:4) Go e na le moo, dira phetho ya gore o nyaka batho ba go tseba o le motho wa mohuta mang gomme o bonagatše dika tše bjalo. (Bakolose 3:9, 10) Ge o dutše o dira bjalo, gopola gore o itirela leina le lebotse. Ka go hlokomedišiša tsela yeo o bogegago ka yona, yeo o bolelago ka yona le seo o se dirago, o tla dira gore batho ba go lebelele gabotse ka lekga la mathomo—e lego selo seo ba tla dulago ba se gopola!

Dihlogo tše di oketšegilego go tšwa lelokelelong la dihlogo tša “Bafsa ba a Botšiša” di ka hwetšwa Wepesaeteng ya www.watchtower.org/ype

[Mongwalo wa tlase]

[Box/​Pictures on page 31]

SEO DITHAKA TŠA GAGO DI SE BOLELAGO

“Ge go tliwa tabeng ya bagwera, go bohlokwa gore motho a kgone go kgetha. Ke kgona go bona kamoo bagwera ba ka ba kgomago tsela yeo ke dirago dilo ka yona, ka gona ke leka go kgetha bao ba tla ntutuetšago ka tsela e botse.”

“Go dira bagwera ga se gwa ithekga ka gore motho ke yo mobotse gakaakang goba gore o na le tšhelete e kaakang—e lego dilo tšeo ge e le gabotse o ka se kgonego go di laola—eupša go ithekgile ka dika tšeo o nago le tšona. Tše ke dilo tšeo o ka kgonago go di laola!”

[Diswantšho]

Sier

Ashley

[Box/​Picture on page 31]

DILO TŠEO DI TLA GO THUŠAGO GORE O ATLEGE . . .

● Go myemyela ka tsela e borutho

● Go kgwahliša letsogo ge o dumediša motho (eupša e sego ka tsela ya go mo gobatša)

● Go dula o hlwekile mmeleng

● Go lebelela batho ka mahlong

[Box/​Picture on page 32]

O SE KE WA FETELETŠA!

Bolela EUPŠA o se ke wa bolela kudu

Botšiša EUPŠA o se ke wa botšološiša

E ba le bogwera EUPŠA o se ke wa bapala ka lerato

Ikholofele EUPŠA o se ke wa ikgantšha

[Lepokisi go letlakala 32]

KE KA BAKA LA’NG O SA BOTŠIŠE BATSWADI BA GAGO?

Ge le be le lekana le nna, le ithutile’ng ka go kgahliša batho ge ba sa le bona la mathomo?

․․․․․