Go Godiša Bana Bao ba Lego Magareng ga Bosea le Mahlalagadi

“Go ba go fihla bana ba gago ba na le nywaga e mehlano, ba ba ba iketlile ka lapeng e bile go bonolo go ba ruta mekgwa e mebotse. Eupša gateetee ge ba thoma go ya sekolong, ba hwetša mekgwa e mentši ya go dira dilo le go bolela.”—Valter wa Italia.

GE BANA ba gola, ba thoma go bona moo mellwane ya bona e felelago gona. Ba thoma go dirišana le batho ba bantši—bao ba bapalago le bona, bao ba tsenago sekolo le bona le ditho tše dingwe tša lapa. Go etša ge Valter yo a tsopotšwego ka mo godimo a bolela, ga e sa le wena feela o nago le tutuetšo ngwaneng wa gago, go etša ge o be o dira ge e be e sa le lesea. Ke ka baka leo go lego bohlokwa gore o diriše nywaga ye go ruta ngwana wa gago bohlokwa bja go kwa le go ba le mekgwa e mebotse. E bile go bohlokwa gore o rute ngwana wa gago dilo tše di nepagetšego le tše di fošagetšego.

Bokgoni bjo go boletšwego ka bjona ga bo tle ka pela e bile ga bo fo itlela. Ge e le gabotse, o tla swanelwa ke gore “o sole, o kgaleme, o kgothatše ka go se fele pelo ka moka le bokgoni bja go ruta.” (2 Timotheo 4:2) Batswadi ba Baisiraele ba be ba laetšwe molaong wa Modimo gore: “O a nweletše ngwaneng wa gago, o bolele ka ona ge o dutše ntlong ya gago, ge o sepela tseleng, ge o robala le ge o tsoga.” (Doiteronomio 6:6, 7) Go etša ge lengwalo leo le bontšha, go bohlokwa gore o dule o ba hlahla.

Boikarabelo bja go godiša bana bo akaretša ditlhohlo tše dintši. Anke re boneng tše mmalwa tša tšona.

Nako ya go Theetša

Beibele e re le ge go na le “nako ya go bolela,” le nako ya go theetša e gona. (Mmoledi 3:7) O ka ruta bana ba gago bjang gore ba theetše ge batho ba bangwe—go akaretša le wena—ba bolela? Tsela e nngwe ke ka go ba beela mohlala. Na wena o theetša ba bangwe ka kelohloko, go akaretša le bana ba gago?

Bana ba ka šitišega gabonolo, le gona ga go pelaelo gore go se fele pelo ga gago go tla lekwa ge o dutše o leka go boledišana le bona. Bana ga ba swane, ka gona lemoga le go bona mekgwa ya poledišano yeo e ka atlegago ge o boledišana le ngwana wa gago. Ka mohlala, David e lego tate wa kua Brithania, o re: “Ke kgopela morwedi wa ka gore a mpotše ka mantšu a gagwe seo ke sa tšwago go se bolela. Ka baka leo, o theetša ka kelohloko kudu ge a dutše a gola.”

Jesu o neile barutiwa ba gagwe taelo ye: “Elang hloko kamoo le theetšago ka gona.” (Luka 8:18) Ge e ba batho ba bagolo ba swanetše go dira bjalo, gona go tloga go le bohlokwa kudu go bana.

Go “Lebalelana ka Bolokologi”

Beibele e re: “Tšwelang pele le kgotlelelana gomme le lebalelana ka bolokologi le ge e ba motho a na le lebaka la go ba le pelaelo ka yo mongwe.” (Bakolose 3:13) Bana ba ka tlwaetšwa  gore ba be le bokgoni bja go lebalela. Se se ka dirwa bjang?

Go etša ge go bontšhitšwe ka mo godimo ka bokgoni bja go theetša, o swanetše go ba beela mohlala. Anke bana ba gago ba go bone o lebalela ba bangwe. Marina, mma wa kua Russia, o leka go dira bjalo. O re: “Re leka go beela bana ba rena mohlala o mobotse ka go lebalela ba bangwe, ka go etiša dikgahlego tša ba bangwe pele le ka go se kgopišege gabonolo.” O oketša ka gore: “Ge ke dirile phošo, ke kgopela bana ba ka tshwarelo. Ke nyaka gore ba ithute go dira se se swanago go ba bangwe.”

Bokgoni bja go rarolla diphapano le go lebalela bo tla nyakega ge ba godile. Tlwaetša bana ba gago gona bjale gore ba naganele ba bangwe gomme ba amogele diphošo tša bona. Ka go dira bjalo, o tla ba o ba nea mpho e bohlokwa yeo e tlago go ba hola ge ba dutše ba gola.

“Ipontšheng le le ba Lebogago”

‘Dinakong tše tše di hlobaetšago tšeo go lego thata go lebeletšana le tšona,’ batho ba bantši ke “baithati.” (2 Timotheo 3:1, 2) Ga bjale ge bana ba gago e sa le ba banyenyane, ke nako ya go ba ruta moya wa go leboga. Moapostola Paulo o ngwadile gore: “Ipontšheng le le ba lebogago.”—Bakolose 3:15.

Gaešita le ge bana e sa le ba banyenyane, ba ka ithuta go bontšha mekgwa e mebotse le go naganela ba bangwe. Bjang? Dr. Kyle Pruett o boditše bagatiši ba makasine wa Parents gore: “Selo se sekaonekaone seo o ka se dirago go nweletša moya wa go leboga ke go o bontšha ka mehla ka lapeng.” O oketša ka gore: “Se se bolela gore ka mehla o dula o bolela kamoo o lebogago thušo yeo o e hwetšago goba tsela yeo o naganelwago ka yona . . . Se se nyaka boitlwaetšo bjo bogolo.”

Richard e lego tate wa kua Brithania, o katanela go dira bjalo, o re: “Nna le mosadi wa ka re bontšha kamoo re swanetšego go leboga bao ba ilego ba re swara ka botho, ba bjalo ka barutiši goba borakgolo le bomakgolo. Nako le nako ge re etela lapa le itšego gore re yo ja le lona, re ngwala karata ya go leboga, ke moka bana ka moka ba saena mo go yona goba ba thala seswantšho.” Go ba botho le go leboga go tla thuša bana ba gago go ba le ditswalano tše di swarelelago le tša kgauswi ge ba godile.

‘O se ke wa ba Hlokiša Tayo’

Ge bana ba gago ba gola, go bohlokwa gore ba ithute gore seo ba se dirago se na le ditlamorago. Gaešita le ge bana e sa le ba banyenyane, ba swanetše go kwa batho ba bagolo, e sego feela ka gae eupša sekolong le setšhabeng. O ka thuša bana ba gago go ithuta molao wa motheo wa gore motho o buna seo a se bjalago. (Bagalatia 6:7) Bjang?

Beibele e re: ‘O se ke wa ba hlokiša tayo.’ (Diema 23:13) Ge e ba o ile wa ba botša gabotse gore go dira selo se itšego se se fošagetšego go tla ba le ditlamorago tše itšego, o se ke wa tšhaba go dira seo o se boletšego. Norma, mma wa kua Argentina, o re: “Go bohlokwa go se fetoše seo o se boletšego. Go fetoša seo o se boletšego go kgothaletša ngwana go itirela boithatelo.”

Batswadi ba ka dira go gontši go phema go fošana ka mantšu le ngwana ka morago ga ge a itshwere gampe ka go kgonthišetša gore bana ba bona ba kwešiša e sa le pele ditlamorago tša go se kwe. Gantši bana ba ka se gane ge ba tseba melao le seo se tlago go direga ge ba ka roba melao yeo e bile ba ka se gane ge ba na  le mabaka a go dumela gore ditlamorago ga di phemege.

Go ba gona, gore tayo e atlege, ga se ya swanela go newa ka bogale. Beibele e re: “Tlošang go lena mohuta o mongwe le o mongwe wa go boloka sekgopi, bogale, pefelo, mašata le polelo e gobošago.” (Baefeso 4:31) Tayo ga se ya swanela go fetoga kotlo e šoro e bile ga se ya swanela go newa ka bogale—e ka ba mmeleng goba maikwelong.

Eupša o ka laola kgalefo bjang ge ngwana wa gago a go galefišitše kudu? Peter e lego tate wa kua New Zealand, o re: “Ga se ka mehla go lego bonolo go dira bjalo, eupša bana ba swanetše go kwešiša gore ba newa tayo ka baka la seo ba se dirilego e sego ka baka la go fela pelo ga batswadi ba bona.”

Peter le mosadi wa gagwe ba leka go thuša bana ba bona go bona mehola e swarelelago ya go phošollwa. O re: “Gaešita le ge bana ba dirile phošo e kgolo, re ba botša gore ba swanetše go ba batho ba mohuta mang, go e na le go ba botša gore seo ba sa tšwago go se dira se a kgopiša.”

“Anke go Lekalekana ga Lena go Tsebje”

Ge Modimo a be a bolela ka tayo yeo a bego a tla e nea batho ba gagwe, o itše: “Ke tla go otla go fihla tekanyong e swanetšego.” (Jeremia 46:28) Dilo di tla ba kaone kudu ge o ka nea tayo e nago le toka le yeo e swanelago tlwaa phošo e dirilwego. Paulo o ngwaletše Bakriste gore: “Anke go lekalekana ga lena go tsebje.”—Bafilipi 4:5.

Go lekalekana go akaretša go phošolla bana ka tsela yeo e tlago go ba tlogela ba na le seriti. Santi e lego tate wa kua Italia, o re: “Ga nke ke nyenyefatša morwa wa ka goba morwedi wa ka. Eupša ke leka go bona modu wa bothata gomme ke mo thuše go bo lokiša. Ga ke laye bana ba ka pele ga batho, le gona ka mehla ge go kgonega ga ke ba laye pele ga bana ba bangwe ba ka. E bile ga ke dire metlae ka mafokodi a bona pele ga batho goba le ge re le noši.”

Richard, yoo go boletšwego ka yena pejana, le yena o bona bohlokwa bja go ba le tekatekano. O re: “Ge o laya ngwana ga se wa swanela go mo laela le diphošo tša nakong e fetilego. Ka morago ga ge o mo neile tayo, go bohlokwa gore o pheme go hlwa o bolela ka phošo yeo a e dirilego le go gopotša ngwana ka diphošo tša gagwe.”

Go godiša bana ke modiro o thata woo o nyakago boikgafo eupša o na le meputso e megolo. Se ke seo Yelena e lego mma wa kua Russia a se lemogilego. O re: “Ke kgethile mošomo wa nakwana e le gore ke fetše nako e ntši le morwa wa ka. Go nyakega maiteko gomme seo se dira gore o šale o se na tšhelete eupša ge ke bona morwa wa ka a thabile kudu le kamoo se se dirilego gore re batamelane ka gona, ke a bona gore boikgafo bjo bjalo ga se bja lefeela.”

[Seswantšho go letlakala 11]

Bana ba ka ithuta go naganela batho ba bangwe

[Seswantšho go letlakala 12]

Phošolla bana ka tsela yeo e tla ba tlogelago ba na le seriti