Letlakala la Bobedi

Go Godiša Bana Gore ba be le Boikarabelo

Mohlomongwe ke selo seo batswadi ba sa ratego go nagana ka sona ge ba lebelela leseana la bona le lebotsana le le sa tšwago go belegwa. Eupša ke therešo e ka se fetogego gore: Mafelelong lona leseana leo le tla gola gomme la ba motho yo mogolo yo a tlago go iphelela ka tsela yeo a e ratago. Ye ke tsela yeo dilo di rulagantšwego ka yona, ka gobane Beibele e bolela gore ‘monna o tla tlogela tatagwe le mmagwe.’ (Genesi 2:24) Ke therešo gore go ka bolelwa bjalo le ka mosadi.

Lega go le bjalo, lona letšatšing leo la go thabiša le la go kweša bohloko la ge morwa goba morwedi yo a godilego a tloga ka gae, batswadi ba bantši ba a tshwenyega. Ba ipotšiša gore: ‘Na ngwana yo wa ka ke mo godišitše gabotse? Na o tla kgona go swarelela mošomong, a ba le ntlo gomme a kgona go diriša tšhelete ka bohlale?’ Sa bohlokwa le go feta: ‘Na ngwana wa ka o tla phela ka melao yeo re ilego ra leka go mo ruta yona?’—Diema 22:6; 2 Timotheo 3:15.

Kgatišo ye e kgethegilego ya Phafoga! e tla bontšha kamoo keletšo ya Beibele e ka thušago batswadi ge ngwana wa bona a dutše a gola.