Pono ya Beibele

Pakane ya Motswadi ke Efe?

O KA rata gore ngwana wa gago yo a lego mahlalagading a wele legorong lefe go a a latelago?

A. A swane le wena.

B. E be lerabele leo le nyakago go tloga le fapana le wena.

C. E be motho yo mogolo yo a nago le boikarabelo yoo a dirago diphetho tše bohlale.

Batswadi ba bangwe bao ba ratago Kgetho C ba ka itira eka ba rata Kgetho A. Ba leka go gapeletša bana ba bona bao ba lego mahlalagading go latela melao ya bona, bjalo ka go ba botša gore ba kgethe mošomo wa mohuta ofe. Mafelelo e ba afe? Ge ngwana a thoma go hwetša tokologo, o thoma go dira se se fapanego. Batswadi ba bantši bao ba itirago eka ba rata Kgetho A ba feleletša ba na le bana bao ba hlalositšwego go Kgetho B.

Lebaka Leo go Leka go Laola Ngwana ka mo go Feletšego go sa Atlegego

O nyaka gore ngwana wa gago yo a lego mahlalagading e be motho yo mogolo yo a kgonago go dira diphetho tše bohlale. Eupša o ka fihlelela bjang pakane yeo? Selo seo se kgonthišeditšwego ke se: Go laola ngwana ka mo go feletšego ga se tharollo. Ela hloko mabaka a a mabedi.

1. Mokgwa wa go laola ngwana ka mo go feletšego ga o dumelelane le Mangwalo. Jehofa Modimo o bopile batho ba na le tokologo ya boikgethelo. O dumelela batho gore ba ikgethele tsela yeo ba nyakago go e tšea bophelong, e ka ba e le e lokilego goba e fošagetšego. Ka mohlala, ge Kaine a be a dumelela lehloyo le mo tutueletša go bolaya Abele ngwanabo, Jehofa o mmoditše gore: “Na nka se go phagamiše ge o ka fetoga wa dira botse? Eupša ge e ba o sa fetoge wa dira botse, go na le sebe seo se go laletšego mojako, gomme se tloga se go kganyoga; a wena o ka se fenya?”—Genesi 4:7.

Ela hloko gore le ge Jehofa a neile Kaine keletšo e lebanyago, ga se a ka a mo gapeletša gore a latele keletšo yeo. Kaine o ile a swanelwa ke go ikgethela gore na o tla fenya kgalefo ya gagwe goba a ka se dire bjalo. Re ithuta eng mo? Ge e ba Jehofa a sa leke go laola dibopiwa tša gagwe ka mo go feletšego gore di mo kwe, le wena ga se wa swanela go leka go dira bjalo ka bana ba gago bao ba lego mahlalagading. *

2. Gantši mokgwa wa go laola ngwana ka mo feletšego o ba le ditlamorago tšeo o sa di nyakego. Nagana ka motho yo a rekišago dilo a go gapeletša gore o reke selo se itšego. Ge a dutše a go gapeletša gore o reke selo seo, ke moo le wena o ganago o tiišitše. Gaešita le ge o ka ba o rata selo seo, mohlomongwe o tenwa ke mokgwa woo a lekago go go rekišetša sona ka wona. O nyaka go kgaogana le yena.

Selo se se swanago se ka go diragalela ge e ba o leka go gapeletša ngwana wa gago yo a lego mahlalagading gore a amogele ditekanyetšo tša gago, ditumelo le dipakane. Na o tla dumelelana le tšona? Ga go bonagale bjalo! Ge e le gabotse, mokgwa wa gago o ka ba le ditlamorago tšeo o sa di nyakego, o ka dira gore ngwana wa gago yo a lego mahlalagading a hloye ditekanyetšo tša gago. Gantši ge batswadi ba leka go laola bana ba bona ka mo go feletšego, bana ba a rabela. Ka gona, o ka dira’ng?

Go e na le go leka go laola ka mo go feletšego bophelo bja ngwana wa gago yo a lego mahlalagading, wa mo gapeletša go amogela ditekanyetšo tša gago go etša ge o be o dira bjalo ge e be e sa le yo monyenyane, mo thuše go bona bohlale bja go dira se se nepagetšego. Ka mohlala, ge e ba o le Mokriste, mmontšhe kamoo go phela ka melao ya motheo ya Modimo go tlago go mo kgotsofatša bophelong.—Jesaya 48:17, 18.

Ge o dira bjalo, mmeele mohlala. Eba motho yo o nyakago ngwana wa gago yo a lego mahlalagading  a eba yena. (1 Bakorinthe 11:1) Bontšha ka go lebanya ditekanyetšo tšeo o kgethago go phela ka tšona. (Diema 4:11) Ge ngwana wa gago yo a lego mahlalagading a thoma go rata Modimo le ditekanyetšo tša gagwe, o tla dira dikgetho tše bohlale gaešita le ge o se gona.—Psalme 119:97; Bafilipi 2:12.

Mo Rute Mešomo e Holago

Go etša ge go boletšwe go letlakala 2 la makasine wo, go tla fihla letšatši leo—mohlomongwe kapejana go feta kamoo o letetšego—ngwana wa gago yo a godilego “a tlago go tlogela tatagwe le mmagwe.” (Genesi 2:24) Ka ge o le motswadi, o nyaka go kgonthišetša gore ngwana wa gago o na le bokgoni bjo bo nyakegago gore e be motho yo mogolo yo a kgonago go ikemela. Nagana ka e mengwe ya mešomo yeo o ka mo rutago yona gona bjale ge a sa dutše a le ka gae.

Mešongwana ya ka Gae. Na ngwana wa gago yo a lego mahlalagading o kgona go apea? Na o kgona go hlatswa diaparo le go di šidila? Na o kgona go hlwekiša phapoši ya gagwe le go e beakanya gabotse? Na o kgona go swara koloi gabotse le go lokiša dilo tše itšego? Go kgona go dira mešongwana e bjalo go tla dira gore morwa goba morwedi wa gago a kgone go hlokomela lapa ka letšatši le lengwe. Moapostola Paulo o itše: “Ke ithutile gore go sa šetšwe gore maemo a ka a bjang, nna ke kgotsofalele seo ke nago le sona.”—Bafilipi 4:11.

Bokgoni bja go Phela le Batho. (Jakobo 3:17) Ngwana wa gago yo a lego mahlalagading o phedišana bjang le batho ba bangwe? Na o kgona go rarolla diphapano ka boleta? Na o mo rutile gore a hlomphe batho le gore a rarolle diphapano ka khutšo? (Baefeso 4:29, 31, 32) Beibele e re: “Godišang batho ba mehuta ka moka.”—1 Petro 2:17.

Go Diriša Tšhelete Gabotse. (Luka 14:28) Na o ka thuša ngwana wa gago yo a lego mahlalagading go ithuta mošomo o itšego, go phela ka tšhelete yeo a nago le yona le go phema go tsena dikolotong? Na o mo rutile go boloka tšhelete e le gore a reke dilo tšeo a di hlokago le go phema go fo kitimela go reka dilo le go kgotsofalela tšeo a nago le tšona? (Diema 22:7) Paulo o ngwadile gore: “Ge re na le dijo le diaparo re tla kgotsofala ka tšona.”—1 Timotheo 6:8.

Bana bao ba lego mahlalagading bao ba ithutago go phela ka ditekanyetšo tše di nepagetšego le bao ba ithutilego mešomo e holago ba tloga ba itokišeditše go ba batho ba bagolo. Batswadi ba bona ba fihleletše pakane ya bona!—Diema 23:24.

[Mongwalo wa tlase]

NA O KILE WA IPOTŠIŠA?

● Ka ge o le motswadi, pakane ya gago ke efe?—Baheberu 5:14.

● Boikarabelo bja ngwana wa gago yo a lego mahlalagading e tla ba bofe ge e eba motho yo mogolo?—Joshua 24:15.

[Diswantšho go letlakala 25]

O ka rata gore ngwana wa gago yo a lego mahlalagading a wele legorong lefe?

A swane le wena . . .

E be lerabele . . .

E be motho yo mogolo yo a nago le boikarabelo