DITIRAGALONG tša ka mo godimo, ke ka baka la’ng Mokgaetši a ile a kgona go fenya kgateletšo? Ke ka gobane o na le selo seo Kabelo a se nago sona. Na o tseba gore selo seo ke eng? O tseba seo a lego sona. Seo motho a lego sona ke mokgwa wo a ikwago ka wona le seo a se emelago. Ge o tseba seo, o na le matla a go ganetša diteko—go laola bophelo bja gago go e na le go dumelela batho ba bangwe go bo laola. O ka dira bjang gore o thome go ikholofela ka tsela yeo? O ka thoma ka go araba dipotšišo tšeo di latelago.

Lebaka leo go lego bohlokwa: Go tseba bokgoni le dika tša gago tše dibotse go tla oketša tsela yeo o ikholofelago ka yona.

Ela hloko: Motho yo mongwe le yo mongwe o na le bokgoni bja gagwe. Ka mohlala, batho ba bangwe ba na le bokgoni go tša bokgabo goba mmino mola ba bangwe ba na le bokgoni go tša dipapadi. Raquel o na le bokgoni bja go lokiša dikoloi. * O re: “Ge ke be ke na le nywaga e 15, ke ile ka lemoga gore ke nyaka go lokiša dikoloi.”

Mohlala wa ka Beibeleng: Moapostola Paulo o ngwadile gore: “Gaešita le ge ke se sekgwari polelong, ka kgonthe tsebong gona ke sona.” (2 Bakorinthe 11:6) Ka ge Paulo a be a kwešiša Mangwalo gabotse, o ile a kgona go ema ka go tia ge ba bangwe ba be ba mo leka. Ga se a ka a dumelela dikgopolo tša ba bangwe tše di fošagetšego di mo fokodiša.—2 Bakorinthe 10:10; 11:5.

Itlhahlobe. Ngwala ka mo tlase talente goba bokgoni bjo o nago le bjona.

Ga bjale ngwala seka se sebotse seo o nago le sona. (Ka mohlala, na o na le taba ka batho ba bangwe?  Na o na le seatla se se bulegilego? Na o ka botwa? Na o swara nako?)

“Ke leka go thuša batho ba bangwe. Ge e ba motho a nyaka go ntšha sa mafahleng gomme ke swaregile ka se sengwe, ke emiša seo ke se dirago, ka mo theetša.”—Brianne.

Ge e ba o sa kgone go nagana ka seka se sebotse seo o nago le sona, leka go nagana ka seo o ilego wa ba le sona ge o be o sa le yo monyenyane, gomme o se ngwale ka mo tlase.—Bona mehlala yeo e lego lepokising leo le rego: “Seo Dithaka tša Gago di se Bolelago.”

Lebaka leo go lego bohlokwa: Go fo swana le ge go tia ga ketane go se na mohola ge e ba go na le moo e kgwehlago gona, seo o lego sona se ka senyega kapejana ge e ba o dumelela mafokodi a gago a go laola.

Ela hloko: Ga go na motho yo a phethagetšego. (Baroma 3:23) Motho yo mongwe le yo mongwe o na le dika tše itšego tšeo a ka nyakago go di fetoša. Ngwanenyana yo leina la gagwe e lego Seija o botšiša gore: “Ke ka baka la’ng ke dumelela dilo tše dinyenyane di nkgalefiša? Ke galefišwa le ke dilo tšeo di sa rego selo gomme kapejana ka palelwa ke go itshwara!”

Mohlala wa ka Beibeleng: Paulo o be a tseba mafokodi a gagwe. O ngwadile gore: “Ruri ke kgahlwa ke molao wa Modimo go ya ka motho yo ke lego yena ka gare, eupša mmeleng wa ka ke bona molao o mongwe woo o lwantšhanago le molao wa monagano wa ka gomme o ntira lethopša la molao wa sebe.”—Baroma 7:22, 23.

Itlhahlobe. Ke mafokodi afe ao o swanetšego go ithuta go a laola?

“Ke lemogile gore ge ke fetša go bogela difilimi tša marato, ke ikwa ke nyamile go se nene gomme ke nyaka motho yo nka ratanago le yena. Ka go re’alo ke a tseba gore ke swanetše go ba šedi ka mehuta ya boithabišo yeo ke e kgethago.”—Bridget.

Lebaka leo go lego bohlokwa: Ge o ipeetše dipakane, bophelo bja gago bo tla ba le morero. Le gona, o ka kgona go phema batho le maemo ao a ka go šitišago go phetha seo o nyakago go se dira.

Ela hloko: Na o ka tsena ka thekising gomme wa botša mootledi gore a dikologe felo gotee go fihlela koloi e felelwa ke peterole? Seo e ka ba bošilo—le go senya tšhelete! Go ipeela dipakane go go thuša gore o se dikologe felo gotee bophelong. O na le moo o nyakago go ya gona le tsela ya go fihla moo.

Mohlala wa ka Beibeleng: Paulo o ngwadile gore: “Tsela yeo ke kitimago ka yona ga se ka go tlaruma.” (1 Bakorinthe 9:26) Go e na le go dikologa felo gotee bophelong le go dumelela dilo di fo itiragalela, Paulo o ile a ipeela dipakane ke moka a phela ka go dumelelana le tšona.—Bafilipi 3:12-14.

Itlhahlobe. Ka mo tlase, ngwala dipakane tše  tharo tšeo o ka ratago go di fihlelela ngwageng o tlago.

1. ․․․․․

2. ․․․․․

3. ․․․․․

Ga bjale kgetha pakane e tee ka mo godimo yeo e lego bohlokwa kudu go wena gomme o ngwale seo o ka se dirago gona bjale e le gore o e fihlelele.

“Ge e ba ke sa dule ke swaregile ka selo se itšego, ke ikhwetša ke dikologa felo gotee. Go kaone go ipeela dipakane le go katanela go di fihlelela.”—José.

Lebaka leo go lego bohlokwa: Ge e ba o se na seo o kgodišegilego ka sona, o ka se kgone go ikemela. Go swana le leobu, o tla dula o fetofetoša mebala gore o swane le dithaka tša gago—leswao leo le lego molaleng la gore ga o tsebe seo o lego sona.

Ela hloko: Beibele e kgothaletša Bakriste gore ba “itlhatselele thato e botse le e amogelegago le e phethegilego ya Modimo.” (Baroma 12:2) Ge o dira selo se itšego seo o kgodišegilego ka sona, o ka se fetoge—go sa šetšwe seo batho ba bangwe ba se dirago.

Mohlala wa ka Beibeleng: Ge moporofeta Daniele e be e sa le mofsa yo a lego mahlalagading, o ile “a fetša le pelo ya gagwe” gore o tla theetša melao ya Modimo gaešita le ge a be a arogantšwe le lapa la gabo le barapedigotee le yena. (Daniele 1:8) Ka go dira bjalo, ga se a ka a fetoga. Daniele o ile a phela ka go dumelelana le seo a kgodišegilego ka sona.

Itlhahlobe. O kgodišegile ka eng? Ka mohlala:

• Na o dumela gore Modimo o gona? Ge e ba go le bjalo, ka baka la’ng? Go na le bohlatse bofe bjoo bo go kgodišago gore o gona?

• Na o dumela gore ditekanyetšo tša Modimo tša boitshwaro di a go hola? Ge e ba go le bjalo, ka baka la’ng? Ka mohlala, ke’ng seo se go kgodišago gore go theetša melao ya Modimo mabapi le thobalano go tla go thabiša go feta go latela tsela yeo dithaka tša gago di rego ke ya bolokologi?

Tše ke dipotšišo tšeo o ka se di arabego le semeetseng. Iphe nako ya go naganišiša ka mabaka a seo o se dumelago. Ka go dira bjalo, o tla kgona go emela gakaone seo o se dumelago.—Diema 14:15; 1 Petro 3:15.

“Sekolong bana ba rata go bapala ka wena ge o se wa kgodišega ka seo o se dumelago gomme ke be ke sa nyake go se kgodišege ka tumelo ya ka. Ka gona, ke ile ka katanela go hwetša mabaka a tiilego le ao a kwagalago a seo ke se dumelago. Go e na le go botša batho gore: ‘Nka se kgone go dira seo, se kgahlanong le bodumedi bja ka,’ ke be ke ba botša gore ‘nna ga ke bone e le se se nepagetšego.’ Se ke seo nna ke se dumelago.”—Danielle.

Mafelelong, na o ka rata go swana le eng—letlakala la sehlare le le welego leo le fokwago ke phefšana e nngwe le e nngwe goba sehlare seo se tsemilego medu seo se ka kgonago go ema kgahlanong le ledimo le matla? Tseba seo o lego sona gomme o tla swana le sehlare seo. Le gona seo se tla go thuša go araba potšišo e rego, Ke nna mang?