Go Phela Ntle le go Tlaišega—Ke Kholofetšo e ka Botwago

“[Modimo] o tla phumola megokgo ka moka mahlong a bona gomme lehu le ka se hlwe le sa ba gona, le ge e le manyami goba sello goba bohloko di ka se hlwe di sa ba gona. Dilo tša pele di fetile.”—Kutollo 21:4.

NA KHOLOFETŠO ye yeo e kgothatšago e ka botwa? Ela hloko e nngwe ya ditemošo tša mathomong tšeo di ilego tša newa motho. Modimo o boditše Adama gore ge e ba a ka se kwe, “o tla hwa lehu.” (Genesi 2:17) O ile a hwa, go etša ge Modimo a itše go tla direga. Se gotee le lehu le tlaišego yeo batho ba bilego le yona ke bohlatse bja gore Modimo a ka botwa. Na go na le lebaka la go belaela gore kholofetšo ya Modimo ya go bušetša lefase maemong a phethagetšego le yona e ka se phethagale?

Le gona gopola dika tša Modimo tšeo di ahlaahlilwego sehlogong se se fetilego. Kganyogo yeo re nago le yona ya gore tlaišego e fele e fo ba e le ponagatšo ya gore Modimo o na le kwelobohloko, lerato le toka. Go feta moo, ditiragalo tša lefase le dikgopolo tše di atilego lehono di hlatsela gore nako ya gore Modimo a tšee kgato e batamela ka lebelo.—Bona lepokisi le le rego: “Dilo tše di tla Direga Neng?”

Ke ka baka la’ng Jehofa Modimo e le yena feela a swanelegago kudu go fediša tlaišego ya batho? Nagana kamoo a kgonago e bile a rulagantšego go tumola dibaki tša tlaišego ka medu—a diriša Morwa wa gagwe Jesu.

Boikgethelo. Rakgolokhukhu wa rena e lego Adama o dirile kgetho yeo e baketšego ditlogolo tša gagwe ka moka masetlapelo. Moapostola Paulo o ngwadile gore: “Tlholo yohle e tšwela pele e tsetsela gotee gomme e ekwa bohloko gotee.” (Baroma 8:22) Pheko ya Modimo ke ya go loka, e na le kgaugelo e kgolo e bile e tloga e le bonolo. Baroma 6:23 e hlalosa gore: “Moputso woo sebe se o lefago ke lehu, eupša mpho yeo Modimo a e neago ke bophelo bjo bo sa felego ka Kriste Jesu Morena wa rena.”

Monna yo a phethagetšego e lego Jesu o phetše bophelo bjo bo se nago sebe. Lehu la gagwe koteng ya tlhokofatšo le butše tsela ya go lokolla batho bao ba kwago thogakong ya sebe le lehu. Ga bjale re na le kholofelo ya go phela ka mo go sa felego lefaseng leo re tla bago re se sa na tshekamelo ya sebe ya go dira dikgetho tše di sego bohlale. Batho bao ba tlaišago ba bangwe ka boomo le bona ba tla be ba se sa le gona, ka gobane “badirabobe bona ba tla fedišwa.”—Psalme 37:9.

Ditiragalo tše di sa letelwago le go se phethagale. Kgoši yeo e kgethilwego ke Modimo, e lego Jesu Kriste, e na le bokgoni bja go laola matla a tlhago a lefase. Lekgolong la pele la nywaga C.E., Jesu le baapostola ba gagwe ba be ba nametše sekepe sa go thea dihlapi ge go be go “tsoga ledimo le legolo le lešoro, maphoto a tšwela pele a kgaphetšegela ka sekepeng, moo sekepe se bego se le kgauswi le go tlala meetse.” Ge Jesu a be a kgopelwa gore a thuše, o ile “a tsoga a kgalema phefo gomme a re go lewatle:  ‘Homola o re tuu!’ Phefo ya okobala, gwa homola gwa re tuu.” Baapostola ba gagwe ba be ba maketše. Ba ile ba re: “Gaešita le phefo le lewatle di a mo kwa.”—Mareka 4:37-41.

Ka tlase ga pušo ya Jesu, batho bao ba kwago ba “tla dula [ba] bolokegile [ba] sa tšhoge go welwa ke masetlapelo.” (Diema 1:33) Seo se akaretša masetlapelo a dikotsi tša tlhago. Go feta moo, go swara lefase gampe, go aga meago yeo e sa šireletšegago le go hlokomologa matla a tlhago a lefase gotee le diphošo tše dingwe tšeo di dirwago ke motho, di tla be di se sa le gona. Go ka se sa ba le motho yo a tla tlaišegago ka baka la go ba lefelong le le fošagetšego ka nako e fošagetšego.

Ge Jesu a be a le mo lefaseng, o ile a bolela ka karolo e nngwe ya pušo ya gagwe yeo e ka fedišago tlaišego e lego gona ga bjale yeo e bakwago ke ditiragalo tšeo di sa letelwago. O itše: “Ke nna tsogo le bophelo.” (Johane 11:25) Ee, Jesu o na le matla le kganyogo ya go tsoša batho ba dimilione bao ba hwilego ga sehlogo ba bolawa ke dikotsi tša tlhago. Na kholofetšo ye ke toro feela? Jesu o ile a tiiša lebaka la gore re mo holofele ge a be a phela mo lefaseng ka go tsoša bahu. Ka Beibeleng, go begilwe dipego tše tharo tša ge a be a tsoša bahu.—Mareka 5:38-43; Luka 7:11-15; Johane 11:38-44.

“Mmuši wa lefase le.” Modimo o kgethile Kriste Jesu gore “a fediše yo a nago le mokgwa wa go baka lehu, e lego Diabolo.” (Baheberu 2:14) Jesu o itše: “Lefase le le a ahlolwa; bjale mmuši wa lefase le o tla lahlelwa ntle.” (Johane 12:31) O tla “fediša mediro ya Diabolo” ka go mo tloša gore a se sa tutuetša lefase. (1 Johane 3:8) Anke o nagane kamoo moloko wa batho o tla bago o fapane ka gona ge moya wa Diabolo wa megabaru, wa bomenetša le wa boithati o tla be o se sa le gona!

[Lepokisi go letlakala 9]

“Dilo tše di tla Direga Neng?”

Balatedi ba Jesu ba ile ba mmotšiša gore: “Dilo tše di tla direga neng, le gona pontšho ya go ba gona ga gago le ya bofelo bja tshepedišo ya dilo e tla ba eng?” (Mateo 24:3) Karabo ya Jesu, gotee le mangwalo a mangwe a buduletšwego ka morago ga lehu la gagwe, e re botša seo se bego se tla direga ge nako ya Modimo ya go fediša tlaišego e batametše. * Bapiša diporofeto tše di lego ka mo tlase le maemo gotee le dikgopolo tše di lego gona lehono.

● Ntwa ya lefase ka bophara —Mateo 24:7; Kutollo 6:4.

● Tlala le malwetši—Luka 21:11; Kutollo 6:5-8.

● Go senya lefase—Kutollo 11:18.

● “Barati ba tšhelete”—2 Timotheo 3:2.

● “Go se kwe batswadi”—2 Timotheo 3:2.

● “Ba ratago maipshino go e na le go rata Modimo”—2 Timotheo 3:4.

Dihlatse tša Jehofa di tla thabela go go thuša go bona gore bophelo bjo bo se nago tlaišego bo kgauswi kudu. Ikgokaganye le Dihlatse tša kgauswi le ga geno. Di tla thabela go ithuta Beibele le wena ka lapeng la gago goba lefelong le lengwe leo o le ratago.

[Mongwalo wa ka tlase]