Bohlale Bja Leihlo

● Leihlo la motho le dirilwe ka bokgwari. Eupša ga go felele moo. Le na le matla. Puku ya Visual Impact, Visual Teaching e re “40 lekgolong ya megalatšhika ka moka yeo e re thušago go bona yeo e kgokagantšwego le bjoko e kopana le retina,” e lego tlhalenama e sesane yeo e dikologago bokagare bja leihlo.

Jesu Kriste o itše leihlo ke “lebone la mmele.” Ge a be a hlalosa seo a bego a se bolela, o tšwetše pele ka gore: “Ge e ba leihlo la gago le lokile [le botega, le tsepeletše dilong tše dibotse], gona mmele wa gago ka moka o tla taga. Eupša ge e ba leihlo la gago le le kgopo, gona mmele wa gago ka moka o tla swifala.” (Mateo 6:22, 23) Ge Jesu a be a bolela mantšu ao, o be a nyaka go re bontšha ntlha ya gore leihlo le na le matla, le kgona go re tutueletša go nagana, go ba le maikwelo le go gata mogato. Dikgopolo tše dibotse di hlabišetša bophelo bja motho seetša; dikgopolo tše mpe di a bo swifatša.

Ka mohlala, ela hloko mantšu a Jesu ao a hwetšwago go Mateo 5:28, 29 a rego: “Yo mongwe le yo mongwe yo a tšwelago pele a lebeletše mosadi e le gore a mo kganyoge o šetše a hlotlotše le yena pelong ya gagwe. Bjale, ge e ba leihlo leo la gago la le letona le go diriša sebe, le gonye [ka tsela ya seswantšhetšo].” O be a leka gore’ng? Leihlo leo le yago kua le kua le ka tsoša dikganyogo tše di fošagetšego go fihla bokgoleng bja gore ge sebaka se ka tšwelela, motho a ka dira dilo tše di gobogilego gomme a se sa hlwa a amogelwa ke Modimo.—Jakobo 1:14, 15.

Ruri go tloga go le kaone go ba le boitshwaro, gaešita le ge go dira bjalo go ka ba thata go etša go gonya leihlo! Le gona, na e tla ba mo go swanetšego go lahlegelwa ke bophelo bjo bo sa felego e le feela ka baka la dinako tše sego kae tša boipshino bja nakwana?

E bile seo re se lebelelago se ka dira gore re be le megabaru. Ke ka baka leo Beibele e re lemošago gore “kganyogo ya mahlo [e nago le boithati] . . . ga [e] tšwe go Tate, eupša [e] tšwa lefaseng. Go feta moo, lefase le a feta gomme go bjalo le ka kganyogo ya lona, eupša yo a dirago thato ya Modimo o dula a le gona ka mo go sa felego.”—1 Johane 2:16, 17.

Na Beibele e nea dithibelo tše di sa kwagalego? Aowa! Go hlokomologa keletšo ya yona ke go ipakela mathata le manyami. (Bagalatia 6:7, 8) Go kwa Lentšu la Modimo, go akaretša le tlhahlo ya lona e bohlale mabapi le leihlo la rena la seswantšhetšo, go tla re tlišetša lethabo. Jesu o itše: “Go thaba bao ba kwago lentšu la Modimo gomme ba le boloka!” (Luka 11:28) Go oketša moo, ba na le kholofelo ya go phela lefaseng ka mo go sa felego mola bao ba hlagolelago leihlo le le gobogilego le la megabaru ba tla lahlegelwa ke lethabo le bophelo.