Go ja Bogale
Go ja Bogale
Monna yo a bego a reka dijo lebenkeleng la go jela o ile a galefa a nagana gore dijo tša gagwe di diegile go fihla. O ile a tšhošetša mošomi wa lebenkele leo, a mo kgoromeletša khaonthareng gomme a mo tia ka mpama. Monna yo a galefilego o ile a phamola dijo tša gagwe gomme a tšwa ka moo lebenkeleng.
KA MOKA ga rena re fela re galefa. Ge e le gabotse, kgalefo ke e nngwe ya dilo tšeo re belegwago re na le tšona go swana le lerato, kholofelo, dipelaelo, manyami le poifo. Ge kgalefo e ka laolwa, e ka dirišwa ka mo go swanetšego gomme ya ba le mohola. Ka mohlala, kgalefo e ka ba le mohola ge e ba e thuša motho gore a ikemišetše go lebeletšana le mapheko a itšego.
Go etša ge pego e lego ka mo godimo e bontšha, ka dinako tše dingwe kgalefo e ka ba kotsi. Batho ba bangwe ke difelapelwana go feta ba bangwe. Ge ba hlohlwa, ba ka go botša tšeo o di jelego mohla wa tlala goba ba lwa. Ge e le gabotse, ba laolwa ke kgalefo mola e le bona bao ba swanetšego go e laola. Kgalefo e bjalo e sa laolwego e kotsi, ke ka baka leo ka dinako tše dingwe e bitšwago “go ja bogale.” *
Bao ba dulago ba jele bogale ba bakela bona le batho ba bangwe manyami. Motho yo bjalo o galefišwa le ke dilo tše dinyenyane gomme a feleletša a bakile mathata a go šiiša. Ela hloko mehlala e latelago:
Monna yo a bego a sepela le bagwera ba gagwe o ile a thuntšhwa molaleng ka morago ga gore mokotla wa yo mongwe wa bagwera ba gagwe o kgwathe monna yo a bego a iphetela tseleng ya leemaema.
Lesogana la nywaga e 19 le ile la tula lesea la mmeeletšwa wa lona la dikgwedi tše 11 go fihlela le ehwa. Lesogana le le be le bapala papadi e šoro ya bidio gomme la galefa ge lesea le le be le kgwatha e nngwe ya didirišwa tša papadi yeo gomme la dira gore lesogana leo le fenywe.
Go bile le dipego tše di swanago go dikologa lefase tše di bontšhago gore batho ba bantši ba palelwa ke go laola kgalefo. Ke ka baka la’ng kgalefo e atile gakaakaa?
[Mongwalo wa ka tlase]
^ ser. 4 Poroutšha ya Boiling Point—Problem Anger and What We Can Do About It e hlalosa “go ja bogale” e le “tsela e sa tlwaelegago ya go galefa yeo e dulago e bakela motho mathata bophelong mokgweng woo a naganago ka wona, a ikwago ka wona, a itshwarago ka wona le ditswalanong tša gagwe le batho ba bangwe.”
[Lepokisi go letlakala 3]
Kgalefo ke e nngwe ya dilo tšeo re belegwago re na le tšona. Ka gona, go galefa e ka ba mo go swanetšego ka dinako tše dingwe. Lega go le bjalo, dihlogo tše di bolela ka go galefa ka tsela e sa swanelago, moo go ka gobatšago rena le ba bangwe maikwelong, mmeleng le moyeng.
