Na Bosodoma bo a Amogelega ka Dinako tše Dingwe?
Pono ya Beibele
Na Bosodoma bo a Amogelega ka Dinako tše Dingwe?
PALO ya batho bao ba amogelago bosodoma e a ata dinageng tše dintši. Sehlopha sa kereke e nngwe ya kua United States se dira boipiletšo bja gore seo Beibele e se bolelago ka bosodoma se fetošwe go dirišwa seo go thwego ke bohlale bja mehleng yeno. Moruti wa kua Brazil yo a sa tšwago go nyalana le motho wa bong bjo bo swanago le bja gagwe le yena o ile a kgothaletša gore “Beibele e fetošwe,” gore go dumelelanwe le pono ya mehleng yeno ya ditho tša kereke ya gagwe.
Ka lehlakoreng le lengwe, gantši go thwe bao ba sa thekgego ditiro tša bosodoma ba na le kgethollo. Ke’ng seo ge e le gabotse Beibele e se bolelago ka bosodoma?
Beibele e Re’ng?
Beibele ga e kgothaletše batho gore ba kgethollane. Lega go le bjalo, pono ya yona mabapi le ditiro tša bosodoma e a kwagala.
“O se ke wa robala le motho yo motona ka tsela yeo o robalago le mosadi ka yona. Ke selo se se šišimišago.”—Lefitiko 18:22.
Ka ge thibelo ye e be e le karolo ya Molao wa Moshe, e be e le o mongwe wa melao ya boitshwaro yeo e bego e neilwe setšhaba sa Isiraele ka go lebanya. Lega go le bjalo, taelo ye e bontšha kamoo Modimo a lebelelago ditiro tša bosodoma ka gona, go sa šetšwe gore di dirwa ke Bajuda goba bao e sego Bajuda, ge e re: “Ke selo se se šišimišago.” Ditšhaba tšeo di bego di dikologile Baisiraele di be di dira bosodoma, di eba le dithobalano le diphoofolo, bohlotlolo le ditiro tša mehuta e mengwe tšeo di bego di sa dumelelwa ke Molao. Ke ka baka leo Modimo a bego a lebelela ditšhaba tšeo e le tše di sa hlwekago. (Lefitiko 18:24, 25) Na pono ya Beibele e ile ya fetoga mehleng ya Bakriste? Ela hloko lengwalo le le latelago:
“Modimo [o ba gafetše] dikganyogong tše di hlabišago dihlong tša go robala ga monna le mosadi, gobane le ba batshadi ba bona ba fetošitše tsela ya bona ya tlhago gore e be e fapanego le tlhago; ka mo go swanago gaešita le ba batona ba tlogetše tsela ya tlhago ya go robala le yo motshadi gomme ba fišwa o šoro kganyogong ya bona e feteletšego ya go fišegelana, ba batona ba fišegela ba batona, ba dira se se lešago dihlong.”—Baroma 1:26, 27.
Ke ka baka la’ng Beibele e re ditiro tša bosodoma ga se tša tlhago e bile ke tše di lešago dihlong? Ka gobane thobalano yeo e dirwago moo e dirwa ka tsela yeo e bego e sa rerwa ke Mmopi. Thobalanong ya bosodoma ga go belegwe bana. Beibele e bapetša mediro ya bosodoma le ditiro tša thobalano yeo barongwa ba marabele, bao ba ilego ba feleletša ba tsebja e le batemona, ba bilego le yona le basadi pele ga Meetsefula a mehleng ya Noa. (Genesi 6:4; 19:4, 5; Juda 6, 7) Go ya ka Modimo, ditiro tšeo ka moka ga se tša tlhago.
Na go na le Dilo Tšeo di ka Dirago Gore Bosodoma bo Amogelege?
Ba bangwe ba ka ipotšiša gore: ‘Na dikarolwana tša leabela, tikologo goba diphihlelo tše bohloko tša bophelo, tše bjalo ka go gobošwa ka thobalano, di ka lokafatša go ineela ga motho dikganyogong tša bosodoma?’ Aowa, di ka se ke. Ela hloko mohlala wo: Motho a ka ba le selo seo borathutamahlale ba bangwe ba se lebelelago e le mokgwa wo a o abetšego mabapi le go diriša bjala gampe goba a ka ba a godišeditšwe lapeng leo bjala e bego e le ga mantšha-o-tlogele. Ruri batho ba bantši ba ka kwela motho yo bjalo bohloko. Lega go le bjalo, a ka se kgothaletšwe gore a tagwe goba a tlogele go lwantšha tsela yeo a dirišago bjala gampe ka yona e le feela ka gobane a belegwe a na le tshekamelo yeo goba a godišeditšwe maemong a bjalo.
Baroma 7:21-25; 1 Bakorinthe 9:27) Go e na le moo, Beibele e nea thušo le kgothatšo yeo e ka thušago batho gore ba fenye ntwa kgahlanong le ditiro tša bosodoma.
Ka mo go swanago, le ge Beibele e sa sole bao ba lwantšhanago le ditshekamelo tša bosodoma, ga e thekge le gatee go ineela ditshekamelong tše bjalo, go sa šetšwe gore di bakwa ke dikarolwana tša leabela goba di tšwa mothopong o mongwe. (Thato ya Modimo ke Efe ka Batho Bao ba Nago le Dikganyogo tša Bosodoma?
Beibele e re kgonthišetša gore thato ya Modimo ke gore “mehuta yohle ya batho e phološwe gomme e fihle tsebong e nepagetšego ya therešo.” (1 Timotheo 2:4) Le ge Beibele e ganetša ditiro tša bosodoma, ga e kgothaletše gore basodoma ba hloiwe.
Pono ya Modimo ka bosodoma e ka se tšeelwe fase. Beibele go 1 Bakorinthe 6:9, 10, e hlalosa gabotse gore “banna ba ba robalago le banna” ba akaretšwa go bao “ba ka se [jego] bohwa bja mmušo wa Modimo.” Eupša temana 11 e oketša ka kgopolo e homotšago e rego: “Lega go le bjalo, seo ke se ba bangwe ba lena le bego le le sona. Eupša le hlatswitšwe la hlweka, eupša le kgethagaditšwe, eupša go boletšwe gore le lokile leineng la Morena wa rena Jesu Kriste le ka moya wa Modimo wa rena.”
Go molaleng gore bao ba bego ba tloga ba rata go rapela Modimo go ya ka ditekanyetšo tša gagwe ba ile ba amogelwa ka borutho ka phuthegong ya pele ya Bokriste. Go bjalo le ka batho ka moka ba dipelo tše di botegago bao ba nyakago go amogelwa ke Modimo—e sego ka go fetoša Beibele—eupša ka go dumelelanya maphelo a bona le yona.
NA O KILE WA IPOTŠIŠA?
● Beibele e re’ng ka ditiro tša bosodoma?—Baroma 1:26, 27.
● Na Beibele e kgetholla batho bao ba nago le dikganyogo tša bosodoma?—1 Timotheo 2:4.
● Na go a kgonega go phema ditiro tša bosodoma?—1 Bakorinthe 6:9-11.
[Seswantšho go letlakala 29]
Na tsela yeo Modimo a lebelelago bosodoma ka yona e swanetše go hlahlobja lefsa?