Pono ya Beibele

O ka ba le Khutšo le ba Bangwe Bjang?

BEIBELE ge e bolela ka batho e re: “Bohle ba dirile sebe gomme ba hlaelelwa ke letago la Modimo.” (Baroma 3:23) Ka ge lefase le tletše ka batho ba fetago dibilione tše šupago bao ba sa phethagalago, go ka ba le go se kwane ka baka la dimelo. Re ka ba le khutšo bjang ka tlase ga maemo a bjalo?

Beibele e nea keletšo e botse. E hlalosa Mmopi e le “Modimo wa khutšo,” yo leina la gagwe e lego Jehofa. (Baheberu 13:20; Psalme 83:18) Modimo o nyaka gore bana ba gagwe bao ba lego lefaseng ba be le ditswalano tša khutšo. E bile ke yena a re beelago mohlala tabeng ye. Ge banyalani ba pele ba be ba direla Modimo sebe, ba senya ditswalano tša khutšo, gateetee o ile a gata mogato wa go dira poelano le dibopiwa tša gagwe e lego batho. (2 Bakorinthe 5:19) Ela hloko dilo tše tharo tšeo o ka di dirago gore o be le khutšo le ba bangwe.

Lebalela ka Bolokologi

Beibele e re’ng? “Tšwelang pele le kgotlelelana gomme le lebalelana ka bolokologi le ge e ba motho a na le lebaka la go ba le pelaelo ka yo mongwe. Go etša ge Jehofa a le lebaletše ka bolokologi, le lena le dire bjalo.”—Bakolose 3:13.

Tlhohlo ke efe? Mohlomongwe o na le ‘lebaka le le kwagalago la go ba le pelaelo’ gomme o bona o swanetše go kgaogana le motho yo a go kgopišitšego. O ka ba wa nagana gore motho yo a go kgopišitšego e swanetše go ba yena a go kgopelago tshwarelo. Eupša ge e ba motho a sa lemoge gore o fošitše, goba a nagana gore ke wena o fošitšego, gantši go se kwešišane moo go ka dula go le gona.

O ka dira’ng? Latela keletšo ya Beibele ka go lebalela motho yoo ka bolokologi, kudukudu ge e ba bothata e le bjo bonyenyane. Gopola gore ge nkabe Modimo a latišiša diphošo tša rena, re be re ka se eme pele ga gagwe. (Psalme 130:3) Beibele e re “Jehofa o a gaugela e bile o a šokela, o diega go galefa e bile o tletše botho. Gobane yena o tseba gabotse kamoo re bopegilego ka gona, a gopola gore re lerole.”—Psalme 103:8, 14.

Ela hloko le seema sa Beibele se se rego: “Temogo ya motho e fokotša bogale bja gagwe gomme go botse ge a sa latišiše molato.” (Diema 19:11) Temogo e re thuša go bona modu wa bothata, re kgone go bona lebaka le le dirago gore batho ba bolele goba ba dire dilo ka tsela yeo ba di dirago ka yona. Ka gona ipotšiše gore: ‘Na motho yo a mphošeditšego o be a lapile, a babja goba a gateletšegile?’ Go lemoga maikemišetšo a kgonthe a batho ba bangwe, maikwelo a bona le maemo ao ba lego go ona go ka phohliša kgalefo ya gago gomme gwa dira gore o hlokomologe diphošo tša bona.

Bolela

Beibele e re’ng? “Ge e ba ngwaneno a dira sebe, eya gomme o mmontšhe phošo ya gagwe e le wena le yena le nnoši. Ge e ba a go theetša, gona o ruile ngwaneno.”—Mateo 18:15.

Tlhohlo ke efe? Maikwelo a sa lokago a go swana le go ba le poifo, kgalefo le go lewa ke dihlong di ka go šitiša go ya mothong gore le rarolle bothata. E bile o ka lekega gore o nyake thekgo ya batho ba bangwe ka go ba botša bothata bjoo, ka go re’alo wa e nametša thaba mola e hlotša.

O ka dira’ng? Ge bothata e le bjo bogolo gomme o nagana gore o ka se kgone go bo hlokomologa, eya mothong yoo gomme o mmotše ka bjona. Leka go swaragana le bothata ka tsela ye:

(1) Ka bjako: O se ke wa dikadika. Ge o ka dikadika, bothata bo ka befela pele. Leka go diriša  keletšo ya Jesu, ya gore: “Ge o tliša mpho ya gago aletareng gomme ge o le moo wa gopola gore ngwaneno o na le se sengwe ka wena, tlogela mpho ya gago moo pele ga aletare, o tloge. Thoma ka go dira khutšo le ngwaneno, ke moka ge o boile, o iše mpho ya gago.”—Mateo 5:23, 24.

(2) Le nnoši: Leka gore o se ke wa seba le ba bangwe ka bothata. “Sekišana le wa geno, fela o se ke wa utolla diphiri tša ba bangwe.”—Diema 25:9.

(3) Ka khutšo: Phema mokgwa wa go nyaka go bona gore ke mang yo a nepilego le gore ke mang yo a fošitšego. Pakane ya gago ke go dira khutšo, e sego go fenya ngangišano. Phema go diriša lentšu “o” gomme o diriše “ke.” Go botša motho gore: “Ke kwele bohloko ka gobane . . . ” go ka ba kaone kudu go e na le gore: “O nkwešitše bohloko!” Beibele e re: “A re phegeleleng dilo tše di išago khutšong le dilo tše e lego tša go agana.”—Baroma 14:19.

O se ke wa Fela Pelo

Beibele e re’ng? “Le se ke la bušetša bobe ka bobe. . . . Eupša ‘ge e ba lenaba la gago le swerwe ke tlala, le fepe; ge e ba le nyorilwe, le nee sa go nwa.’”—Baroma 12:17, 20.

Tlhohlo ke efe? Ge e ba maiteko a gago a mathomong a go dira khutšo a sa atlege, o ka nyema moko.

O ka dira’ng? O se ke wa fela pelo. Batho ga ba lebelele dilo ka go swana. Ba bangwe go ba tšea nako gore ba theoše maswafo; ba bangwe ba sa ithuta go bontšha dika tša go boifa Modimo. Dula o ba bontšha botho le lerato. Beibele e re: “O se ke wa itesa o fenywa ke bobe, eupša tšwela pele o fenya bobe ka botse.”—Baroma 12:21.

E le gore re be le khutšo le ba bangwe, re swanetše go bontšha boikokobetšo, temogo, go se fele pelo le lerato. Ruri go na le mohola go ba le ditswalano tša khutšo le ba bangwe!

NA O KILE WA IPOTŠIŠA?

● Ke’ng seo se ka go thušago gore o lebalele motho yo mongwe ka bolokologi?—Bakolose 3:13.

● Ke’ng seo se ka go thušago gore o ye mothong gomme o mmotše bothata?—Mateo 5:23, 24.

● O ka dira’ng ge e ba maiteko a gago a go dira khutšo a sa atlege?—Baroma 12:17-21.

[Ntlhakgolo go letlakala 11]

“Temogo ya motho e fokotša bogale bja gagwe gomme go botse ge a sa latišiše molato.”—DIEMA 19:11