1. Reka ka Bohlale
1. Reka ka Bohlale
GE EBA o sa bjale merogo le dienywa tšeo o di jago, go ra gore o di reka mmarakeng goba lebenkeleng. Ge o yo reka, o ka kgetha bjang dijo tšeo di nago le phepo?
● Rulaganya gore o reka neng dijo tše itšego.
Mokgatlo wa Food Safety Information Council wa kua Australia o eletša ka gore: “Thoma ka go reka dijo tše di sa bolego. Feleletša ka tšeo di bewago ka ditšidifatšing.” Le gona, ge e ba o tlo reka dijo tše di fišago, di reke ge o šetše o eya gae.
● Kgetha dijo tše di sa tšwago go goroga.
Ge e ba go kgonega, leka go reka dijo tše di sa tšwago go goroga. * Ruth, e lego mmago bana ba babedi wa kua Nigeria o re: “Gantši ke tsogela mmarakeng ge dijo di sa tšwa go goroga.” Elizabeth wa kua Mexico le yena o reka dijo mmarakeng. O re: “Moo ke kgona go reka dienywa le merogo yeo e sa tšwago go goroga le gona ke ikgethela yona. Ka mehla ke reka nama yeo e hlabilwego lona letšatšing leo. Ge e ba go nyakega, yeo ke sa e apeego ke e bea ka setšidifatšing.”
● Hlahloba dijo tša gago.
Ipotšiše gore: ‘Na bokantle bja selo seo ke se rekago bo sa le boemong bjo bobotse? Na nama yeo ke e rekago e a nkga?’ Ge e ba dijo di phuthetšwe, hlahloba selo seo di phuthetšwego ka sona. Dilo tša go phuthela tšeo di senyegilego di ka dira gore dipaketheria di tsene dijong.
Chung Fai yoo a rekago dijo lebenkeleng kua Hong Kong o re: “Ke gabohlokwa gore o lebelele le letšatšikgwedi leo dijo tšeo di senyegago ka lona leo le gatišitšwego dijong tšeo o di rekago.” Ka baka la’ng? Ditsebi di lemoša gore gaešita le ge dijo tšeo di senyegilego di ka bogega gabotse, tša nkga bose le go latswega gabose, di sa dutše di ka dira gore o babje.
● Di bee gabotse.
Ge e ba o diriša mekotla goba dipolasitiki tšeo o ka di dirišago gantšinyana, di hlatswe leboelela ka meetse a go fiša le sesepa. Tsenya nama le hlapi ka mokotleng o tee e le gore di se ke tša senya dijo tše dingwe.
Enrico le Loredana, e lego banyalani ba kua Italy, ba reka dijo lefelong la gabo bona. Ba hlalosa gore: “Ka go dira bjalo, ga go hlokagale gore re tloge le dijo kgole kudu gomme mo tseleng di senyege.” Ge e ba go tla go tšea metsotso ya ka godimo ga e 30 gore o fihle gae, bea dijo tše di kgahlilego ka mokotleng o tswaletšwego goba o di bee ka tsela e nngwe, go kgonthišetša gore ga di tologe.
Sehlogong se se latelago, ithute kamoo o ka bolokago dijo tša gago di šireletšegile ge di fihla ka gae.
[Mongwalo wa ka tlase]
^ ser. 6 Bona sehlogo seo se rego: “Eja ka Bohlale,” ka tokollong ya Phafoga! ya April–June 2011.
[Lepokisi go letlakala 14]
TLWAETŠA BANA BA GAGO: “Ke ruta bana ba ka gore ba lebelele letšatšikgwedi leo dijo tšeo di phuthetšwego di senyegago ka lona, tše bjalo ka dimonamonane, pele ga ge ba ka di reka.”—Ruth, Nigeria
