2. Kgomarela Bohlweki

GO FO swana le ge ngaka e šireletša balwetši ba yona ka go hlapa diatla, go hlwekiša dilo tšeo e di dirišago le go hlwekiša lefelo leo e šomelago go lona, le wena o ka šireletša lapa la gago ka gore o itlhwekiše, o hlwekiše khitšhi ya gago le dijo tša gago.

● Hlapa diatla.

Mokgatlo wa Public Health Agency wa Canada o re “diatla di phatlalatša mo e ka bago 80 lekgolong ya malwetši a tlwaelegilego a go fetela a bjalo ka mpshikela le mokgohlwane.” Ka gona hlapa diatla tša gago ka mo go tseneletšego ka meetse le sesepa pele o eja, ka morago ga go ya ntlwaneng le ge o lokišetša dijo.

● Hlwekiša khitšhi ya gago.

Nyakišišo e nngwe e utollotše gore le ge ntlwana go bonagala e be e le lefelo le le hlwekilego kudu ka ntlong, “dilo tša ka ntlong tšeo di bego di tletše dipaketheria tše dintši kudu e be e le dipontšhe tša go hlatswa dibjana le difatuku ka khitšhing.”

Ka gona, fetoša difatuku tša gago kgafetšakgafetša, le gona o diriše meetse a go fiša ao a nago le sesepa goba selo sa go tloša ditwatši go hlwekiša khitšhi ya gago. Ke therešo gore ga se ka mehla se se lego bonolo. Mosadi yo a bitšwago Bola o dula ntlong yeo e se nago dipompi. O re: “Go boima. Eupša ga re ke re hloka sesepa le meetse e le gore khitšhi le legae la rena di dule di hlwekile.”

● Hlatswa dijo.

Pele ga ge dijo di ka rekišwa, di ka ba di ile tša tšhelwa ke meetse a ditšhila, tša šilafatšwa ke diphoofolo, mantle goba dijo tše dingwe tše di sa butšwago. Ka gona, gaešita le ge o ebola dienywa goba merogo, e hlatswe ka mo go tseneletšego gore o tloše dipaketheria tše kotsi. Go tšea nako go dira se. Daiane, e lego mma wa kua Brazil o re: “Ge ke dira salate, ke leka gore ke se ke ka hlaganela e le gore ke hlatswišiše merogo ka moka.”

● Bea nama e sa butšwago ka thoko.

E le go thibela gore dipaketheria di se ke tša phatlalala, phuthela nama e khwibidu, nama ya kgogo le mehuta ya dihlapi gomme o se ke wa di hlakanya le dijo tše dingwe. Diriša dilo le dithipa tše di fapafapanego go sega dijo goba o di hlatswišiše ka sesepa le meetse a go fiša pele le ka morago ga gore o bee nama goba dihlapi godimo ga tšona.

Ka ge bjale wena, ditlabakelo tša gago le dijo tša gago di hlwekile, o ka lokišetša bjang dijo ka tsela e šireletšegilego?

[Lepokisi go letlakala 15]

TLWAETŠA BANA BA GAGO: “Re ruta bana ba rena go hlapa diatla pele ba eja le go hlatswa dijo goba go di lahla ge di wetše fase.”—Hoi, Hong Kong