3. Lokišetša Dijo le go di Bea Gabotse

MOAPEI yo a sego šedi wa kua Isiraele ya bogologolo o ile a yo kga maraka a naga gaešita le ge a be a se a “a tlwaela.” O ile a tšhela dijo tšeo ba bego ba se ba di tlwaela ge a apea. Batho bao ba bego ba di ja, bao ba bego ba tšhoga gore dijo tšeo di ka ba di na le mpholo, ba ile ba lla ka gore: “Go na le lehu ka mo pitšeng.”—2 Dikgoši 4:38-41.

Go etša ge mohlala wo o lego ka mo godimo o bontšha, re swanetše go ba šedi gore re se ke ra ja dijo tše di sego tša lokišetšwa gabotse ka gobane di ka ba kotsi goba gaešita le go bolaya. Ka baka leo, e le go thibela malwetši ao a bakwago ke dijo tše di sa šireletšegago, ithute go lokišetša dijo le go di bea gabotse. Ela hloko ditšhišinyo tše di latelago tše nne:

● O se ke wa tološa nama ka go fo e ntšha ka setšidifatšing.

Lefapha la Temo la United States le re: “Gaešita le ge bogare bja nama bo ka ba bo sa kgahlile ge e dutše e tologa, karolo ya yona ya ka ntle e ka ba kotsing, ge e le magareng ga 4°C le 60°C—e lego dithempheretšha tšeo paketheria e atago ka lebelo go tšona.” Go e na le moo, tološa dijo ka go di bea ka setšidifatšing moo di ka se kgahlego goba o di tsenye ka gare ga microwave goba ka meetseng a go tonya di le ka gare ga sephuthelwana se se sa dutlego.

● Butšwiša dijo tša gago.

Go ya ka Mokgatlo wa Lefase wa tša Maphelo, “go butšwiša dijo go bolaya mo e ka bago ditwatši ka moka tše kotsi.” Ge o apea dijo, kudukudu disopo, kgonthišetša gore di fihlelela thempheretšha ya 70°C. * Ka ge go ka ba thata go tseba thempheretšha ya ka gare ya dijo tše itšego, baapei ba bantši ba diriša thermometer ya nama.

● Di je kapejana.

Dijo tše di apeilwego ga se tša swanela go bewa ka nako e telele, ka gona di je kapejana goba gateetee e le gore di se ke tša senyega. Dijo tše di swanetšego go jewa di tonya di je di sa tonya gomme tše di fišago o di je di sa fiša. O ka bea nama yeo e fišago ka ontong o e beile go 93°C.

● Boloka dijo tše di šetšego gabotse.

Anita, e lego mma wa kua Poland, o ja dijo gateetee ge di se na go butšwa. Eupša ge e ba go na le dijo tše di šetšego, o re: “Ge ke fetša go di sola, ke di kgahliša ka diphuthelwana tše dinyenyane gore go tle go be bonolo go di tološa.” Ge e ba o bea dijo tše di šetšego ka setšidifatšing, di je pele go feta matšatši a mararo goba a mane.

Ge o le mabenkeleng a go jela, o apeelwa ke motho yo mongwe. Ka gona, o ka šireletša bjang lapa la gago ge le eja mabenkeleng ao?

[Mongwalo wa ka tlase]

[Lepokisi go letlakala 16]

TLWAETŠA BANA BA GAGO: “Ge bana ba ka ba apea, ke ba gopotša gore ba bale le go latela ditaelo tšeo di ngwadilwego diphuthelwaneng tša dijo.”—Yuk Ling, Hong Kong