Kgauswinyane—Bohle ba tla ba le Dijo tše di Nago le Phepo!

O KA gata megato yeo e tla go thušago gore o thabele dijo tše di šireletšegilego. Lega go le bjalo, go na le dilo tše dintši tšeo re sa kgonego go di laola. Ka mohlala, o ka se kgone go hlahloba dijo ka moka pele ga ge o di reka goba o di apea. O ka swanelwa ke go reka dijo tšeo di šetšego di apeilwe gomme tša phuthelwa ke moka tša romelwa di etšwa kgole. Le gona tše dingwe tša dijo tšeo o di rekago di ka ba di šilafaditšwe ke dikhemikhale tše kotsi tšeo di lego moyeng, ka meetseng goba mmung.

Pegong yeo e nago le sehlogo se se rego: “Go Laola Malwetši ao a Bakwago ke Dijo tše di sa Šireletšegago ke Bothata bja Ditšhaba tše Dintši,” bahlankedi ba Mokgatlo wa Lefase wa tša Maphelo ba bolela gore mathata a mangwe a go šireletšega ga dijo “a ka se ke a rarollwa ke mmušo o tee feela; go nyakega gore mebušo ya lefase ka moka e swarišane.” Malwetši ao a bakwago ke dijo tše di sa šireletšegago ke bothata bja lefase ka moka!

Ke mo go kwagalago gore batho ba bantši ba ka ipotšiša lebaka leo ka lona re bolelago ka kgodišego gore kgauswinyane bohle ba tla ba le dijo tše di nago le phepo. Ke ka gobane “Jehofa, Morena wa lefase ka moka” o holofetša gore o tla rarolla mathata a batho a dijo. (Joshua 3:13) Ba bangwe ba ka bolela gore dijo tše di sa šireletšegago di hlatsela gore Modimo a ka se botwe. Eupša nagana ka se: Ge e ba motho yo a neago ba bangwe dijo a di  swara bošaedi, na e tla ba ga maleba go sola moapei? Aowa.

Ka mo go swanago, batho—e sego Mmopi—ke bona ba senyago dijo tšeo di šireletšegilego. Go ata ga dijo tše di sa šireletšegago ke bothata bjo bo bakilwego ke batho. Modimo o holofetša gore o tla “senya bao ba senyago lefase.”—Kutollo 11:18.

Therešo ke gore Modimo o šetše a bontšhitše gore o tshwenyega ka dijo tšeo re di jago. Ke Yena a hlodilego lefase gomme a dira le dihlare tšeo di “kgahlišago ge motho a [di] lebelela” e bile e le tše ‘dibose ge di lewa.’ (Genesi 2:9) Gaešita le ka morago ga gore batho ba thome go babja, Jehofa Modimo o ile a nea batho ba gagwe ditaelo tše di lebanyago tšeo di bego di tla šireletša dijo le mebele ya bona.—Bona lepokisi leo le rego: “Melao ya Maphelo.”

Modimo o nyaka gore re je dijo tša mohuta ofe? Beibele e re botša gore: “O hlogišetša diphoofolo bjang bjo botala, le dimela gore di hole batho, gore o ntšhe dijo lefaseng, le beine yeo e thabišago pelo ya motho wa nama le madi, o phadimiša sefahlego ka makhura, o dira senkgwa seo se fepago pelo ya motho wa nama le madi.” (Psalme 104:14, 15) Le gona Beibele e bolela gore “le ka ja phoofolo e nngwe le e nngwe e phelago.”—Genesi 9:3.

Ge Lentšu la gagwe le re holofetša bokamoso, le re: “Peu ya lena yeo le e bjetšego mmung o tla e nešetša pula gomme mmu wa tšweletša senkgwa se se humilego ka phepo le sa makhura. Mohlang woo diruiwa tša lena di tla fula mafulong a ikadilego.” (Jesaya 30:23) Ee, kgauswinyane dihlogo tša ditaba tšeo di boifišago di tla tšeelwa legato ke tsebišo ye: “Dijo tše di nago le phepo bakeng sa bohle!”

[Ntlhakgolo go letlakala 19]

Mmopi o re holofetša bokamoso bjo bo kgahlišago moo dijo tše bose e tla bego e le maphaaphaa

[Lepokisi go letlakala 18]

“MELAO YA MAPHELO”

Baisiraele ba ile ba newa Molao wa Moshe nywaga e ka bago e 3 500 e fetilego. Molao woo o ile wa šireletša Baisiraele malwetšing a mantši ao a bakwago ke dijo tše di sa šireletšegago. Ela hloko ditaelo tše di latelago:

● O se ke wa swara didirišwa tše di sa hlwekago le dibjana tšeo di kgomilego phoofolo yeo e hwilego: “Sebjana le ge e le sefe seo le se dirišago se tsenywe ka meetseng, e be seo se sa hlwekago go fihla mantšiboa gomme e tla ba gona se hlwekago.”—Lefitiko 11:31-34.

● O se ke wa ja phoofolo e hweditšwego e hwile: “Le se ke la ja setoto le ge e le sefe.”—Doiteronomio 14:21.

● O se ke wa tlogela dijo tše di šetšego di sa jewe ka nako e telele: “Se se šetšego sona se ka jewa letšatšing le le latelago. Eupša letšatšing la boraro nama e šetšego ya sehlabelo seo e fišwe ka mollo.”—Lefitiko 7:16-18.

Ngaka A. Rendle Short, o ile a makatšwa ke gore Molao wa Moshe—ge o bapetšwa le melao ya ditšhaba tšeo di bego di dikologile Baisiraele—o be o na le “melao e bohlale kudu le yeo e kwagalago ya maphelo.”