Na Dijo tša Gago di Šireletšegile?

“Sekolo sa Jeremane se a Tswalelwa ka Baka la ge Barutwana ba Bangwe ba Fetetšwe ke Paketheria ya E. Coli.”—REUTERS NEWS SERVICE, JEREMANE.

“Dinageng tše Hlano go na le Paketheria ya Salmonella Yeo e Tswalanywago le Dihlašana Tšeo di Hlogago.”—USA TODAY.

“Nama ya Dikgomo tše 6 Tšeo di Neilwego Mahlaka ao a Nago le Mahlasedi a Dikhemikhale tše Kotsi e Fihla Dileteng tše 9.”—THE MAINICHI DAILY NEWS, JAPANE.

DIHLOGO tše tša ditaba di ile tša tšwelela ka dibeke tše pedi tša go latelana ngwagola. Banyakišiši ba akanyetša gore ngwaga o mongwe le o mongwe mo e ka bago 30 lekgolong ya batho dinageng tšeo di hlabologilego ba swarwa ke malwetši ao a bakwago ke dijo tše di sa šireletšegago.

Dipego tše bjalo di go kgoma bjang? Hoi, e lego tate wa kua Hong Kong o re: “Ke a tshwenyega e bile ke a befelwa. Ke na le bana ba babedi gomme ke tshwenyega ka gore dijo tša bona di dirwa kae le gona bjang.”

Dinageng tšeo di diilago kudu, malwetši ao a bakwago ke dijo tše di sa šireletšegago le meetse a ditšhila a bolaya batho ba dimilione ngwaga o mongwe le o mongwe, kudukudu bana. Bola yo a dulago Nigeria o re: “Mebarakeng ya mo, dijo di bobolelwa ke dintši, di nelwa ke dipula, di fokwa ke phefo e bile di tšhelwa ke marole. Ge ke bala goba ke ekwa ka malwetši ao a bakwago ke dijo, ke kwa ke boifa. Ke nyaka go šireletša lapa la ka.”

Na go a kgonega gore o šireletše lapa la gago dijong tše di sa šireletšegago? Mokgatlo wa Canadian Food Inspection Agency o re: “Ge eba dijo tše di sa šireletšegago di hwetšagala mabenkeleng a rena, e ba dintlhakgolo tša dihlogo tša ditaba. Le gona seo ga se makatše. Eupša malwetši ao a bakwago ke dijo tše di sa šireletšegago a ka tšweletšwa ke seo re se dirago goba re sa se dirego ka dikhitšhing tša rena.”

O ka dira’ng gore o šireletše lapa la gago malwetšing ao a bakwago ke dijo tše di sa šireletšegago? Re tlo ahlaahla ditsela tše nne tša go dira gore dijo tša gago e be tšeo di šireletšegilego.

[Lepokisi go letlakala 13]

KE BOMANG BAO BA LEGO KOTSING?

Batho ba bangwe bao ba lego kotsing e kgolo ya go swarwa ke malwetši ao a bakwago ke dijo tše di sa šireletšegago ke:

● Bana ba nywaga ya ka tlase ga e mehlano

● Baimana

● Batho ba ka godimo ga nywaga e 70

● Batho bao ba nago le tshepedišo e fokolago ya go lwantšha malwetši

Ge e ba wena goba batho bao o jago le bona ba wela go le lengwe la magoro a, o swanetše go ba šedi kudu ka dijo tšeo o di lokišetšago, o ba neago tšona le go di ja.

[Mothopo]

Mothopo: New South Wales Food Authority, Australia.